Ձեր վստահելի աղբյուրը

«Ելք» խմբակցության ղեկավար Նիկոլ Փաշինյանն այսօր խոսեց  տեղական և օտարերկրյա լրատվամիջոցների հետ։

«Ժողովրդի հաղթանակն այս փուլում պետք է նաև դե-յուրե ամրագրվի, հարցն այն է՝ ցանկանու՞մ է արդյոք ՀՀԿ-ն այս ճգնաժամը լուծել։ Եթե վարչապետի պաշտոնում ընտրվի ՀՀԿ-ական, ապա այդ ճգնաժամը չի լուծվի, մենք կշարունակենք մեր ցույցերը, երթերը, կփորձենք բացատրել ՀՀԿ-ականներին, որ իրենք չեն պատկերացնում Հայաստանում ստեղծված քաղաքական իրավիճակը»,- ասաց նա։

Անդրադառնալով մայիսի 1-ին նախատեսված ԱԺ հատուկ նիստին նա նշեց, որ այդ օրը կանխորոշում է, որ ՀՀ հարյուր հազարավոր քաղաքացիներ վաղ առավոտից կլինեն Երևանում, կհեղեղեն Երևանի փողոցներն ու հրապարակները, այդ թվում՝ ԱԺ հարակից փողոցներն ու հրապարակները։

Փաշինյանը խոսեց նաև շարժմանը միանալու հայտարարություն արած խորհրդարանական ուժերի՝ ՀՅԴ և «Ծառուկյան» դաշինքի մասին, հույս հայտնեց, որ նրանք իրենց դիրքորոշումները կհստակեցնեն և առաջիկա երկու օրերին, հստակ կհայտարարեն, թե ինչպես են պատրաստվում քվեարկել։ Նա ասաց, որ իր համար քաղաքականությունը հրապարակային գործընթաց է, մարդիկ կարող են հազար բան ասել խորհրդապահական խողովակով, բայց քանի դեռ խոսքը գործ չի դարձել, ոչինչ չի կարող ասել։

Կարեն Կարապետյանի՝ բանակցություններին չներկայանալու մասին խոսելով՝ նա նշեց. «Ես կարծում եմ՝ Կարեն Կարապետյանը պարզապես վստահ չէ իր բանակցային ուժերին»։

Փաշինյանը կրկին ընդգծեց՝ այս շարժման մեջ աշխարհաքաղաքական ենթատեքստ պետք չէ փնտրել։

«Ես գնահատում եմ, որ ՌԴ-ն, որպես միջազգային իրավունքը հարգող պետություն, չի միջամտում ՀՀ ներքին գործերին։ Ես դրանում վստահ եմ։ Դա մաքուր ներհայկական հարց է»,- ասաց նա։

«Ելք» խմբակցության առաջնորդը նշեց, որ իրենք ունեն գլխավոր մանդատը՝  Հայաստանի ժողովրդի, և ոչ միայն Հայաստանի, նաև Սփյուռքի հայ ժողովրդի մանդատը, և խորհրդարանը պետք է հաշվի առնի ժողովրդի կամքը։

«Ես կարծում եմ՝ իմաստ ունի, որ բոլոր պատգամավորների հեռախոսները հրապարակվեն, և քաղաքացիները կապ հաստատեն, հստակեցնեն նրանց դիրքորոշումները։ Ինչու չէ, նաև հասցեները, որ մարդիկ կարողանան խոսել նրանց հետ»,- ասաց նա։

Փաշինյանը նշեց, որ իր հույսը դնում է ժողովրդի դիրքորոշման վրա, որովհետև եթե լինի զանգվածային ճնշում, ՀՀԿ-ն պիտի հաշվի նստի, իսկ եթե այդ ճնշումը չլինի, հույս դնել չի կարելի։

Հարցին՝ ինչպե՞ս են ճնշելու՝ նա ասաց. «Զանգերով, ցույցերով, հրապարակումներով»։

ՀՀ երկրորդ նախագահ Ռոբերտ Քոչարյանին վարչապետի պաշտոնում առաջադրելու մասին խոսակցություններին անդրադառնալով՝ Փաշինյանը նշեց. «Ես դա համարում եմ անլուրջ խոսակցություն»։

Նա տեղեկացրեց, որ երկու օրով դադարեցնում են բոլոր ակցիաները, որպեսզի մարդիկ հանգստանան, ուժ հավաքեն, ապա՝ ապրիլի 29-ին նոր թափով վերսկսեն։

«Եթե որևէ մեկը մտածում է՝ մենք որևէ պարագայում հետքայլ ենք անելու, ինքը խորապես սխալվում է»,- ասաց նա։

Պատգամավորը կոչ արեց խուսափել անհանդուրժողականության դրսևորումներից, նշեց, որ Հայաստանի մասին իրենց պատկերացումներով՝ յուրաքանչյուր ոք պետք է ազատորեն իր կարծիքը արտահայտելու, տարածելու, տեղեկատվություն փնտրելու, տարածելու հնարավորություն ունենա։

«Հատկապես մեր շարժման ներկայացուցիչները պետք է էմոցիոնալ պոռթկումներ չունենան, որովհետև մեր շարժումը կշռադատված, հանդուրժողականության և սիրո շարժում է»,- ասաց նա։

Փաշինյանը ևս մեկ անգամ կոչ արեց շարժման ֆինանսավորման օտար աղբյուրներ չփնտրել, նշեց, որ իրենց ֆինանսավորած ամեն մի լուման հրապարակելու են, և Հայաստանում, ՌԴ-ում, ԵՄ-ում ու բոլոր հետաքրքրված կողմերը կարող են ստուգել իրենց ֆինանսավորման աղբյուրները. «Սա մաքուր, 100 տոկոսով հայկական պրոցես է, և այստեղ մի լումա անգամ ներդրված չէ օտարերկրյա որևէ կազմակերպությունից»:

«Ելք» խմբակցության ղեկավարը ընդգծեց, որ իրենք չեն պատրաստվում կադրային ջարդ անել, կլինեն և նոր նշանակումներ, և դեպքեր, երբ գործող մարդիկ կաշխատեն։

Փաշինյանը կրկին նշեց, որ իրենք նախկինի պես բաց են քննարկումների համար, իրենց դիրքորոշման մեջ ոչինչ չի փոխվել, սակայն մի պայման կա՝ պետք է համոզված լինեն, որ լիազորված անձի հետ են բանակցում։