Ձեր վստահելի աղբյուրը

19:06
Փաշինյանը հայտարարեց վաղվա անելիքների մասին։ Նա նշեց՝ վաղվանից, չնայած գործընթացները բարենպաստ ճանապարհով են ընթանում, սակայն 12։00-ից ՀՀ ողջ տարածքով Երևան մայրաքաղաքում վերսկսվում են քաղաքացիական անհնազանդության զանգվածային գործողությունները, բոլոր ճանապարհները փակվում են։

Նա, սակայն, ասաց՝ ճանապարհները ուղիղ 16։00-ին բացվում են, որպեսզի ժողովուրդն անարգել կարողանա հասնել Հանրապետության հրապարակ՝ մասնակցելու 19։00 կայանալիք հանրահավաքին։

Նա պատճառված անհարմարությունների համար ներողություն խնդրեց այն բոլոր քաղաքացիներից, ովքեր «մինչ այժմ կարողացել են անտարբեր մնալ այս իրադարձությունների նկատմամբ և նախընտրում են ֆուտբոլ նայել, կինո նայել», սակայն նշեց, որ իրենց պայքարը նաև նրանց համար է, որովհետև համոզված են՝ նաև իրենց համար է ստեղծվելու այնպիսի Հայաստան, որտեղ իրենց իրապես ազատ ու երջանիկ են զգալու։

«Այս բոլոր ակցիաները տեղի են ունենում մեկ պահանջով՝ ժողովրդի թեկնածուին անհապաղ ընտրել ՀՀ վարչապետ»,- ասաց նա։

Վանաձորի հանրահավաքը եզրափակվեց երթով։ 

19:03
«Ելք» խմբակցության ղեկավարը նշեց, որ Երևանում ջրցաններ, մահակներ, վահաններ պետք է չլինեն, պետք է լինեն ոստիկաններ, որոնք պետք է ապահովեն իրենց ակցիաների անվտանգությունը, բայց կրկին ընդգծեց՝ իրենց շարժումը բաց ձեռքերի շարժում է, և որևէ մեկի նկատմամբ անհարգալից վերաբերմունք չի կարող լինել։

Փաշինյանը կոչ արեց ողջունել ոստիկաններին, ապա նշեց. «Սա տրյուկ չէ, սրանից հետո սա լինելու է քաղաքացու և ոստիկանի հարաբերությունների էությունը։ Ես ուզում եմ հավատալ, որ այս պահից սկսած՝ ՀՀ-ում չեն լինելու բարիկադներ, հետևաբար բարիկադների բացակայությունը մեզ դնում է նույն կողմում»:

Նաև ասաց, որ այս պահից կանգնած են ուս ուսի՝ հանուն ազատ և երջանիկ Հայաստանի։

Փաշինյանը հանրահավաքի մասնակիցներին տեղեկացրեց, որ ՀՀԿ խմբակցությունը հայտարարել է՝ վարչապետի թեկնածու չի առաջադրելու։ Նրա խոսքով՝ սա վատ չէ, բայց լավ էլ չէ, իսկ որպեսզի լավ լինի, կարծում է՝ ճիշտ կլինի, եթե ՀՀԿ-ն հայտարարի, որ այլ խմբակցությունների հետ համատեղ վարչապետի թեկնածու է առաջադրելու ժողովրդի թեկնածուին։

«Ես պատրաստակամ եմ հանդիպել ՀՀԿ խմբակցության բոլոր պատգամավորների հետ՝ միաժամանակ, որ հավաստիացնեմ նրանց, որ այս պրոցեսով, երբ ասում ենք՝ փակում ենք ներհայաստանյան ատելության էջը, մենք դա ասում ենք ամենայն լրջությամբ, և եթե նրանք անեն իրենց քայլը՝ ՀՀԿ և մյուս խմբակցությունների պատգամավորները, նրանք դրանով կդառնան այդ պատմական նվաճման համահեղինակներ»,- ասաց նա՝ ևս մեկ անգամ ասելով, որ հուսով է՝ այլ քաղաքական ուժերը, քաղաքական գործիչներն անգամ չեն փորձի գողանալ ժողովրդի հաղթանակը, որովհետև դա կբերի այդ քաղաքական գործիչների և ուժերի դուրսմղմանը Հայաստանի ներքաղաքական դաշտից։ 

18:44
«Ելք» խմբակցության ղեկավար Նիկոլ Փաշինյանը նշեց, որ մարտի 31-ին Գյումրիից իրենց սկսած քայլարշավի հաջորդ կետը Լոռու մարզն էր, և ինքը երբեք չի մոռանա այն գորովանքը, այն սերը, այն օգնությունը, որ Լոռու մարզը ցույց է տվել իրենց։

«Վանաձոր հասնելու մեր քայլարշավն ամենածանրն էր երևի, որովհետև այդ օրը մենք տեղատարափ անձրևի տակ 22 կմ քայլեցինք, և մեզ թվում էր՝ վերջ, այդ օրվանից հետո ճանապարհը չենք կարող շարունակել, բայց այն ջերմությունը, որով մեզ ընդունեցին Վանաձորում ոչ միայն մեր ընկերները, այլև մարդիկ, ում տեսնում էինք առաջին անգամ, իմացեք՝ հավիտյան տեղ ունեք մեր սրտում, որովհետև դուք մեզ ուժ տվեցիք, նոր էներգիա տվեցիք»,- ասաց նա։

Փաշինյանը նշեց, որ քայլարշավով Վանաձոր մուտք գործելուց 22 օր հետո վերադարձել են՝ ՀՀ հպարտ քաղաքացիներին տեղեկացնելու, որ նրանք հաղթել են, և այդ հաղթանակը նրանց ձեռքից որևէ մեկը չի կարող գողանալ՝ լինի նա ընդդիմությունից, թե իշխանությունից։

«Շատերը փորձում են ներկայացնել, թե այս բանավեճը անձերի մասին է՝ ով պիտի զբաղեցնի ՀՀ վարչապետի պաշտոնը, իրականում խոսքն այն մասին է՝ արդյո՞ք այս ներքաղաքական ճգնաժամը լուծվելու է, թե՞ շարունակվելու է»,- ասաց նա։

Փաշինյանի խոսքով՝ եթե ՀՀ-ում մայիսի 1-ին վարչապետ ընտրվեց որևէ այլ մեկը, և ոչ ժողովրդի թեկնածուն, ապա ՀՀ-ում և Սփյուռքում բողոքի ակցիաները շարունակվելու են տասնապատիկ ծավալներով։

«Ես իլյուզիաներ չունեմ, որպեսզի մտածեմ, որ դուք իմ անունը վանկարկելիս իմ անունն եք վանկարկում, ես հավատում եմ, որ դուք ինքներդ ձեր անունն եք վանկարկում, որովհետև ասել եմ և ասում եմ՝ Հայաստանում հաղթանակած թավշյա, ոչ բռնի հեղափոխությունն ունի մեկ առաջնորդ, և այդ առաջնորդը դու ես»,- ասաց նա։

Փաշինյանը հույս հայտնեց, որ մյուս խմբակցությունները ոչ միայն թեկնածու չեն առաջադրելու, այլև առանց նախապայմանների պաշտպանելու են ժողովրդի թեկնածուին։

«Հակառակ դեպքը չեմ ուզում նույնիսկ քննարկել, որովհետև հակառակ դեպք չի լինելու»,- ասաց նա։

18:24
«Ելք» խմբակցության անդամ Սասուն Միքայելյանը, հանրահավաքի մասնակիցներին դիմելով, ելույթը սկսեց Գարեգին Նժդեհի խոսքերով՝ «Երբ ազգը դառնում է բանակ, հնարավոր չէ նրան ծնկի բերել»։

«Այս ազգը իր համախմբվածությամբ բանակ դարձավ 88 թ., այսօր այս հաղթանակած ժողովուրդը, որ տարիների ընթացքում աղքատության, արտագաղթի շեմին է հասել, նորից դարձել է բանակ՝ իր ազատության, անկախության համար»,- ասաց նա՝ հավելելով, որ այդպիսով ժողովրդին ստիպել են համախմբվել։

«Էս ժողովուրդը մուրացկան չի, աշխարհահռչակ ազգ ենք մենք, երբեք թույլ չենք տա, որ մեր պապերի գերեզմանները պղծվեն, մեր զոհված եղբայրները մոռացվեն, մեր կենդանի հերոսները, լեգենդները մնան անշուք, անհավատ»,-ասաց Միքայելյանը։

Նա կրկին հիշեցրեց՝ վրեժխնդրություն չի լինելու։ 

17:55
Նիկոլ Փաշինյանը ժամանեց։ Նա ծափերի ու բացականչությունների ներքո բարձրացավ հարթակ։

17:40
Վանաձորի Հայքի հրապարակում քիչ անց կմեկնարկի «Իմ քայլը» նախաձեռնության հանրահավաքը։ Մարդիկ հրապարակ են եկել անձրևանոցներով։ Նրանք այժմ սպասում են «Ելք» խմբակցության ղեկավար Նիկոլ Փաշինյանի ժամանելուն։

Վանաձորցիները հրապարակ են եկել «Նիկոլ, Վանաձորը քո հետ է», «Նիկոլ, դբա լավը», «Նիկոլ, վարչապետ» և այլ պաստառներով։