Զատուլին. Ես անկեղծորեն անհանգստանում եմ, հուսով եմ՝ ելք կգտնվի
Պետդումայի ԱՊՀ գործերով, եվրասիական ինտեգրման ու հայրենակիցների հետ կապերի կոմիտեի առաջին փոխնախագահ Կոնստանտին Զատուլինը պատրաստվում է այսօր հանդիպել ՀՀ վարչապետի պաշտոնակատար Կարեն Կարապետյանի հետ: Ապրիլի 28-ին լրագրողների հետ հանդիպմանը նա տեղեկացրեց, որ Երևանում է Ռուսաստանից ժամանած պատվիրակության կազմում:
«Ինձ թվում է՝ երկար պետք չէ բացատրել՝ ինչու ենք եկել, մենք անտարբեր չենք այն ամենի նկատմամբ, ինչ կատարվում է Հայաստանում»,- ասաց նա:
Նա հայտնեց, որ թեպետ Կարեն Կարապետյանին Ռուսաստանում շատերն են ճանաչում և բարձր են գնահատում, սակայն անձամբ այնքան էլ ծանոթ չէ: Զատուլինը նշեց՝ որքան իրեն է հայտնի, Կարապետյանի վարկանիշը Հայաստանում վատը չէ, և իրենք կցանկանային պարզապես նրան սատարել, սակայն որևէ մեկի կողմնակիցը չեն: Նրա խոսքով՝ ամեն ինչ պետք է անցնի օրինական ճանապարհով, և Ռուսաստանը ուշադիր հետևելու է դրան, ու ով էլ փորձի ուժով հասնել ինչ-որ հաղթանակի, Ռուսաստանն այդ արդյունքները չի ընդունելու:
Զատուլինը նշեց, որ իրենք ներհայաստանյան իրադարձություններին որևէ կերպ չեն միջամտելու, իրենց գործառույթը չէ՝ ով է լավը, ով՝ վատը, իրենք մտահոգ են, որ ՌԴ դաշնակից երկրում, երկրում, որի հետ կապված են ՀԱՊԿ պայմանագրով, որտեղ գլխավոր ներդրող են, որտեղ իրենց զինծառայողներն են, այդ երկրում առաջին շաբաթը չէ, որ իրադարձություններ են տեղի ունենում:
«Մենք դրանով անհանգստացած ենք և ժամանել ենք Հայաստան: Սա արդյունքների ամփոփման ասուլիս չէ, առջևում կարևոր հանդիպումներ են սպասվում: Ես անկեղծորեն անհանգստանում եմ, հուսով եմ՝ ելք կգտնվի, և այդ ելքը կլինի իրավական-սահմանադրական ճանապարհով: Դա ևս մեզ անհանգստացնում է»,- ասաց նա:
Զատուլինը հայտնեց, որ երեկ հանդիպել են ԱԺ խոսնակ Արա Բաբլոյանի և իր գործընկերների հետ, պատվիրակության կազմից ոմանք հանդիպում ունեցան միջխորհրդարանական հանձնաժողովի, իսկ այսօր խմբակցությունների ներկայացուցիչների հետ են հանդիպել:
«Ես երկու հանդիպմանը ներկա եմ եղել, զրուցել եմ «Ելք» և ՀՅԴ խմբակցությունների հետ: Ցավոք, ինչպես գիտեք, «Ելք»-ի ներկայացուցիչները հանդիպման եկան ոչ այն կազմով, ինչպես սպասում էինք, կես ժամ սպասումից հետո հանդիպման եկավ Արարատ Միրզոյանը, նա մյուսների բացակայությունը հիմնավորեց նրանով, որ վիրավորված են Նիկոլայ Ռիժկովի հետ հանդիպումից: Թե ինչ է պատահել, ես չգիտեմ, բայց մի՞թե խմբակցությունը, ում ղեկավարը վարչապետի պաշտոնին հավակնող անձ է, այդքան խոցելի է, որ պատրաստ չէ ամբողջ կազմով ներկայանալ հանդիպմանը»,- ասաց նա:
Զատուլինն ասաց, որ Հայաստանից պատրաստվում են մեկնել վաղը:
Լրագրողները մեջբերեցին ՌԴ Դաշնային խորհրդի անդամ, Հայաստանի ազգային հերոս Նիկոլայ Ռիժկովի խոսքերը և խնդրեցին արձագանքել՝ որքանով էին պատշաճ դրանք, ի պատասխան՝ Զատուլինը հորդորեց այդ հարցն ուղղել հենց իրեն՝ Ռիժկովին:
«Ես չեմ պատրաստվում ինչ-որ մեկին արդարացնել կամ ներողություն խնդրել, մենք բոլորս գիտակից մարդիկ ենք: Նա իր կարծիքն է արտահայտում, ասում է այնպես, ինչպես հարկ է համարում, իսկ դա ճիշտ է, թե ոչ, պետք է գնահատեն ունկնդիրները: Ես Կովկասում եմ ծնվել, չեմ պատրաստվում հանդես գալ Նիկոլայ Ռիժկովի ուսուցչի դերում և կոչ եմ անում լուն ուղտ չդարձնել: Շատ բան է ասվում, որից կարելի է կառչել, եթե մենք դա շարունակենք, որևէ արդյունքի չենք հասնի, ավելին՝ հայ-ռուսական հարաբերությունների զարգացման ճանապարհին կարգելակենք»,- ասաց նա:
Զատուլինը հայտնեց, որ արդեն իսկ հանդիպել է Արցախի Հանրապետության նախագահ Բակո Սահակյանի և ՀՀ երկրորդ նախագահ Ռոբերտ Քոչարյանի հետ: Երկրորդ նախագահի հետ հանդիպման վերաբերյալ մանրամասներ նա չհրապարակեց՝ նշելով, որ լիազորված չէ, սակայն ասաց՝ իրավիճակի նրա գնահատականն, ինչպես միշտ, սթափ է:
Լրահոս
Տեսանյութեր
Աշխարհի առաջնությունից առաջ ինձ «подножка տվեց» Սիմոն Մարտիրոսյանը. Փաշիկ Ալավերդյան
