Ձեր վստահելի աղբյուրը

20:27
«Ելք» խմբակցության ղեկավար Նիկոլ Փաշինյանը նշեց, որ վերջին երկու օրերին ՀՀ քաղաքացիներին հաջողվեց վերջնականորեն և անշրջելիորեն բեկել ներքաղաքական իրավիճակը Հայաստանում: «Աշխարհը զարմացած է, թե ինչպես այս փոքրիկ հետխորհրդային երկրում հնարավոր եղավ այս ամբողջ գործընթացը կազմակերպել առանց մի կրակոցի, առանց մի կաթիլ արյան: Բայց այս պատմությունը դեռ չի ավարտվել, մենք պետք է չկորցնենք մեր զգոնությունը»,- ասաց նա՝ կոչ անելով լինել շատ ավելի կարգապահ, տանել շատ ավելի սիրո հեղափոխություն, քան մինչ օրս էր:
Փաշինյանը տեղեկացրեց, որ այսօր արյունավետ հանդիպում է ունեցել ՌԴ Պետդումայի պատվիրակության հետ, հանդիպումն անցել է ջերմ մթնոլորտում, բաժանվել են որպես բարեկամներ՝ արձանագրելով, որ այս գործընթացը հայ-ռուսական բարեկամությանը ոչ միայն չի սպառնում, այլև առաջիկայում հայ-ռուսական հարաբերություններն իրապես զարգանալու, խորանալու են, և Հայաստանի շահը առաջնային է լինելու:

Նա նաև խոսեց վաղվա անելիքների մասին:

«Եկել է մի պահ, երբ ուղղակի ծայրահեղ անհրաժեշտություն է գոնե օրվա կեսը անցկացնել գրասենյակային պայմաններում: Վաղն առավոտից ես շատ կարևոր աշխատանք ունեմ անելու ԱԺ-ում: Ես պետք է հանդիպում ունենամ խորհրարանական բոլոր խմբակցությունների ներկայացուցիչների հետ, որ դրանց արդյունքում օրվա վերջում կարողանամ տեղեկատվություն տալ, որ ձեր առաջարկած թեկնածուի ընտրությունը մայիսի 1-ին վարչապետի պաշտոնում երաշխավորված է»,- ասաց նա:

Փաշինյանը հայտարարեց, որ վաղը նորից դադարեցվում են քաղաքացիական անհնազանդության գործողությունները: Նա հորդորեց դադարեցնել նաև բոլոր ՀՀԿ-ական պատգամավորների հետ նամակների կամ զանգերի միջոցով կոնտակտի դուրս գալը և նրանց առաջ պահանջներ դնելը:

«Վաղը՝ 17:00-ին, ես գալիս եմ Երևանի Գարեգին Նժդեհի հրապարակ, և այնտեղից երթով գալիս ենք Հանրապետության հրապարակ: Այստեղ ես պատմում եմ մեր բանակցությունների արդյունքների մասին, և միասին որոշում ենք մեր հետագա անելիքները՝ կախված իրավիճակից»,- ասաց նա:

Փաշինյանը հայտնեց, որ մայիսի 1-ին վաղ առավոտյան՝ 08:00-ից, բոլոր մարզերից հավաքվում են Հանրապետության հրապարակում, իսկ թե այդ օրը ինչպես կանցկացնեն՝ կախված կլինի քաղաքական իրավիճակից:

Նա նաև պատասխանեց «օդում կախված» մի հարցի. «Այո, պատրաստ եմ պատասխանատու ձևով ստանձնել ՀՀ վարչապետի պաշտոնը, որովհետև ծառայում եմ Հայաստանի ժողովրդին, հայ ժողովրդին, ԼՂՀ-ին և Հայաստանի Հանրապետությանը»:

Հանրահավաքը եզրափակվեց համերգով:

20.02
«Այն, ինչ արեցիք շաբաթների ընթացքում, այն, ինչ շարունակում ենք անել, մի մեծ խենթություն է, մեծ երազանք է», - հանրահավաքի մասնակիցներին դիմելով՝ նշեց «Ելք» խմբակցության անդամ Արարատ Միրզոյանը: Նա հավելեց՝ պատմության կարևոր շրջադարձերում ամեն ինչի հիմքում խենթություններն ու երազանքներն են եղել:

Նա կրկին հիշեցրեց, որ կադրային ջարդ չի լինելու. կան բազմաթիվ լավ մասնագետներ, նրանք պիտի շարունակեն ծառայել մեր հայրենիքին, նաև ներգրավելու են նոր մասնագետների՝ ներսից, դրսից, ովքեր պիտի ծառայեն Հայաստանի Հանրապետությանը:

«Մենք հավաքելու ենք առաջարկներ, ստեղծելու ենք խումբ, որտեղ բոլորը գալու են ասեն. «ես ունեմ սենց միտք, հլա մի քննեք»: Մենք ապահովելու ենք այդ պրոցեսի քաղաքական առաջնորդությունը, ցուցաբերելու ենք քաղաքական կամքը՝ կերտելու մեր երազանքի հայրենիքը»,- ասաց նա:

19:43
Հանրահավաքի մասնակիցներին ողջունեց Արսինե Խանջյանը:

«Իմ շատ սիրելի հայ ժողովուրդ, ՀՀ քաղաքացիներ, ուր էլ որ գտնվում եք այս պահին, եթե իմանայիք միայն վերջին երեք օրվա իմ ապրումները, դրանք անբացատրելի են, բայց եթե Հայաստանում չլինեի, իսկապես չէի հասկանալու, թե ինչ գործողություն եք արել»,- ասաց նա:

Խանջյանը նշեց, որ Հայաստանում կատարվող իրադարձություններին հետևում են նաև Սփյուռքի իր ընկերները, ովքեր կարծում են, որ այս փոփոխությունները ՀՀ քաղաքացիները կատարեցին իրենց ձայնով, ներկայությամբ, ցանկությամբ, հույսով ու հավատով, որ մեր երկիրն ապագա ունի:

«Ինձ ասում էին՝ Հայաստանում բան չի փոխվի: Այո, Հայաստանում շատ բան է փոխվում: Ես ձեր ուրիշ բան պիտի ասեմ: Այս հեղափոխությունն անուն ունի՝ թավշյա հեղափոխություն: Երբ ճանապարհով ընթանում էի, դեմքեր էի տեսնում՝ ժպտուն դեմքեր, որ երբեք չեմ տեսել, սա ժպիտի հեղափոխություն է»,- ասաց նա:

Խանջյանը նշեց՝ եթե հանրահավաքի մասնակիցները ցանկանում են վարչապետի պաշտոնին տեսնել Նիկոլ Փաշինյանին, պետք է հետագայում նաև պահանջատեր լինեն նրա նկատմամբ, իսկ հարկ եղած դեպքում օգնեն նրան:

19:29
Հանրապետության հրապարակում մեկնարկել է հանրահավաքը:

«Քաղաքացիական պայմանագիր» կուսակցության մամուլի քարտուղար Տիգրան Ավինյանը թվարկեց այն ճանապարհները, որոնք այսօր փակված են եղել ակցիայի շրջանակներում: «Դա արվում է, որպեսզի այսօրվա դեռ դե յուրե իշխանությունները մտքներով չանցկացնեն, որ ՀՀ քաղաքացին պահանջատեր չէ: ՀՀ քաղաքացին հաղթել է, և իր հաղթանակը հասցնելու է մինչև վերջ»,- ասաց նա:

Ավինյանը տեղեկացրեց, որ Ստրասբուրգի հայ համայնքը վաղը Եվրախորհրդարանի առջև ցույց է անելու, Գլենդելում ևս տեղի հայությունը մտադիր է վաղը ցույց անել:

Երևանի ավագանու «Ելք» խմբակցության անդամ Ալեն Սիմոնյանը կրկին նշեց՝ իրենք քաղաքական վենդետաներով չեն զբաղվելու, բայց ընդգծեց. եթե որևէ մեկը համարձակվի օրենք խախտել, կպատժվի օրենքի ամբողջ խստությամբ:

«Սա ձեր հաղթանակն է, ձեզանից յուրաքանչյուրի, և հաղթանակները դեռ շատ են լինելու, հիշեք, սա դեռ սկիզբն է»,- ասաց նա:

17:02
Ֆրանսիայի հրապարակում հարվածային և փողային գործիքների հնչյունների ներքո մեկնարկում է քայլերթը դեպի Հանրապետության հրապարակ, որտեղ երեկոյան՝ 19:00-ին, տեղի կունենա հանրահավաք: Քայլերթի մեկնակետում հնչում են «Արդյոք ովքեր են», «Եռագույն դրոշ» և այլ երգերի գործիքային կատարումներ:

Նիկոլ Փաշինյանը միացել է քայլերթի մասնակիցներին և առաջնորդում է նրանց դեպի Հանրապետության հրապարակ:

16:00-ին քաղաքացիական անհնազանդության ակցիաները, ինչպես նախապես էր հայտարարվել, ավարտվեցին: Բոլոր փողոցներն ապաշրջափակվում են, իսկ 17:00-ին Ֆրանսիայի հրապարակից երթ է մեկնարկում, որին մասնակցելու է Նիկոլ Փաշինյանը։ Երեկոյան 19:00 Հանրապետության հրապարակում դարձյալ հանրահավաք կլինի:

15:38
Ցուցարարների մի խումբ փակել է Երևան Սիթի սուպերմարկետի մուտքը, նրանք սուպերմարկետի աշխատողներին կոչ են անում միանալ իրենց, իսկ սպառողներին՝ չօգտվել սուպերմարկետներից, դրանք փոխարինել փոքր խանութներով:

Ցուցարարները վանկարկում են «Աշխատանք, արժանապատվություն, իրավունք»:

14:40
Ֆրանսիայի հրապարակում ցուցարարներին միացավ կանադահայ դերասանուհի Արսինե Խանջյանը: «Մեր ապագան դուք եք, առանց ձեզ Հայաստան գոյություն չունի: Եթե շարունակենք այս գոյությունը միասնաբար, մոտենում ենք դրախտավայրի»,- ասաց նա: Խանջյանը հույս հայտնեց, որ մայիսի 1-ին արդար ընտրություն կանցկացվի, սակայն նաև շեշտեց՝ երկիրը մեկ օրում չի փոխվելու:

13:40
Ակտիվիստ Դավիթ Պետրոսյանը «Ազատության» հետ զրույցում մեկնաբանեց ԵՊՀ-ի առջև արված հայտարարությունը, նա տեղեկացրեց, որ սպառնալիքներ են հնչել ակցիաներին մասնակցած ոչ միայն ուսանողների, այլև դասախոսների հասցեին:

Ուսանողների՝ դասերից բացակայության հարցին անդրադառնալով՝ նա նշեց. «Մարդիկ կան՝ ուսանողներին ջուր ու հաց են բերում, մարդիկ կան՝ բացակա են նշանակում, այդտեղ ամեն ինչ ասված է»:

Պետրոսյանը նաև տեղեկացրեց, որ Թատրոնի ու կինոյի պետական ինստիտուտի ուսխորհուրդը հայտարարել է՝ դուրս է գալիս ՀՀԿ-ից։

13:33
Ուսանողները երթով հասան Ֆրանսիայի հրապարակում: Նրանք այստեղ բաժանվեցին խմբերի և փողոցներ փակեցին:

Այս ընթացքում Նիկոլ Փաշինյանն ԱԺ-ում հանդիպում է ՀՀԿ խմբակցության ղեկավարի հետ:


12:20
«Որոշողը մենք ենք», «Ազատ, անկախ ուսանող» կոչերով ուսանողները հասան ԵՊՀ: Ակտիվիստ Դավիթ Պետրոսյանը, դիմելով ակցիայի մասնակիցներին, նշեց, որ բուհերի ղեկավար կազմում պետք է չլինեն կուսակցական անձինք: Բուհում կուսակցական մարդու ներկայությունն, ըստ նրա, բացասական ազդեցություն է ունենալու ինքնիշխանության, կրթության որակի ու ռեսուրսների կառավարման վրա:

«Հեղափոխությունից հետո ղեկավար կազմում պետք է չլինեն կուսակցական անձինք, ու դա վերաբերում է բոլոր քաղաքական ուժերին: Նույնը վերաբերում է ուսխորհուրդներին»,- ասաց նա:

Պետրոսյանը շեշտեց՝ կարևոր է, որ համալսարաններում ազատ խոսքը, ազատ միտքը չհետապնդվի, իսկ կուրսի ավագները ոչ թե դեկանատի հրամանները պետք է իրականացնեն, այլ իրենց պարտավորությունները:

Նրա խոսքով՝ բուհերում պետք է նորմալ, ակադեմիական մթնոլորտ լինի:

Ուսանողական քայլերթի հաջորդ կանգառը Երևանի պետական բժշկական համալսարանն է, ուր էլ ուղևորվեցին ուսանողները՝ «Մենք ենք տերը մեր երկրի» վանկարկումով:

12:05
«Իմ քայլը» շարժման հայտարարած անհնազանդության ակցիաներն ապրիլի 29-ին վերսկսեցին: Ուսանողական խումբը Իսահակյան փողոցից քայլերթով շարժվեց դեպի Երևանի պետական համալսարան, որտեղ կարևոր հայտարարություններ են սպասվում:

Ուսանողները նախատեսում են երթի ընթացքում այցելել մի շարք բուհեր: Ակցիայի մասնակիցներին ուղեկցում են ոստիկանները: