Ձեր վստահելի աղբյուրը

20:40
«Քաղաքացիական պայմանագիր» կուսակցության պատգամավոր Սասուն Միքայելյանը նշեց, որ վաղը կկարողանան սկիզբը կապել վերջին: Սասուն Միքայելյանը մեջբերեց Գարեգին Նժդեհի խոսքը, ըստ որի՝ երբ ազգը բանակ է դառնում, երբեք նա ծնկի չի գա:

20:35 
«Հիմա մենք նոր փուլ ենք թևակոխում, վերջնական, հաղթական, բայց նաև ավելի դժվար։ Մենք պետք է եռակի անգամ ավելի ուժեղ լինենք, ավելի անկեղծ, իմաստուն ու կազմակերպված։ Վաղը ես վստահ եմ ԱԺ-ն Նիկոլ Փաշինյանին կընտրի ՀՀ վարչապետ, որից հետո պետք է կազմվի ժամանակավոր կառավարություն։ Այս կառավարությունից պետք է ակնկալել, պահանջել չորս հիմնական  գործառույթ՝ ապահովել լայն քաղաքական համերաշխություն, ապահովել երկրի բնականոն գործունեությունը, տալ օպերատիվ լուծումներ առաջնային հարցերին ,տալ առաջնային տնտեսական լուծումները, ստեղծել մեխանիզմներ ընտրական համակարգի բարեփոխման համար և ամենահիմնականը՝ արտահերթ խորհրդարանական ընտրությունների կազմակերպում։ Ակնլալել տնտեսական հրաշքներ ժամանակավոր կառավարությունից, ձեր թույլտվությամբ, չենք կարող»,- հայտարարեց «Ելք» խմբակցության պատգամավոր Արարատ Միրզոյանը։

Պատգամավորը հավաքվածներից խնդրեց ու պահանջեց՝ այս պրոցեսում իրենց մենակ չթողնել։

20: 22
«Քաղաքացիական պայմանագիր» կուսակցության անդամ Նարեկ Բաբայանը նշեց. «Ժողովուրդ, մենք պարտավոր ենք այս լուսեղեն գործընթացը հասցնել հաղթական ավարտի, մենք պարտավոր ենք սկիզբ դնել մեծ հայրենադարձության»։
Հանրահավաքի մասնակիցներին իր երախտագիտությունը հայտնեց դերասանուհի Արսինե Խանջյանը, նշելով, որ նրանց պայքարը շատ գեղեցիկ է։



«Այսօր ֆրանսիական թերթում կարդացել եմ, որ Հայաստանն օրինակ է շատ երկրների համար՝ Բելառուսի, Ադրբեջանի, նույնիսկ Ռուսաստանի։ Մենք միասնաբար մեծ գործ ու անելիք ունենք»,- ասաց նա։

Դիմելով սփյուռքի հայրենակիցներին՝ դերասանուհին հավելեց. «Դուք ականատես եղաք, որ այսօր Հայաստանն իր քաղաքացիներով օրինակ դարձավ աշխարհին, և ձեր պարտականությունն է մասնակից դառնալ Հայաստանի նոր իրողությանը՝ ներգաղթով»։

20:02 
«Քաղաքացիական պայմանագիր» կուսակցության անդամ Գնել Սանոսյանն էլ նշեց, որ սա միակ շարժումն է, որտեղ ընդգրկված են Հայաստանի բոլոր մարզերի բնակիչները։
Ելույթով հանդես եկավ նաև լողորդ Շավարշ Կարապետյանը։

«Պարոն Փաշինյան, խորին շնորհակալություն քեզ։ Այսօր Ռուսաստանի հայ  երիտասարդներն ինձ որպես դեսպան են ուղարկել՝ Ձեզ ասելու, որ բոլոր երիտասարդները, ուսանողները և աշխատավոր ժողովուրդը Ձեր կողքին են»։

19։43
Հանրապետության հրապարակում մեկնարկեց «Իմ քայլը» նախաձեռնության հանրահավաքը։

Ելույթ ունեցավ «Իմ քայլը» նախաձեռնության անդամ Արմեն Գրիգորյանը, ով նշեց. «Հայաստանի ապագա կառավարման համակարգում ամենհիմնարար սկզբունքներից մեկը պետք է լինի ազատությունը։ Իշխանությունը պետք է պաշտպանի քաղաքացիների հիմնարար ազատությունները։ Շատ կարևոր է, որ այս շարժման ապակենտրոն կառավարման սկզբունքները տեղափոխվեն նաև իշխանության մակարդակ»։

Նրա խոսքով՝ այս փուլում իրենք իրենց համար ամենագլխավոր թիրախ են համարում մոտ ապագայում Հայաստանում անցկացնել ազատ և արդար ընտրություններ։

«Բոլորը մեզ հարցնում են արդարադատության մասին, կարծում եմ, որ համաշխարհային փորձը, ինչպես նաև մեր ունեցած գիտելիքները ցույց են տալիս, որ լավագույն գործիքը անցումային արդարադատություն ապահովելն է։ Նախկինում բոլոր տուժվածները այդ կառավարման համակարգից պետք է արդար փոխհատուցում ստանան»,- հայտարարեց նա։