Ձեր վստահելի աղբյուրը

ԱԺ «Ելք» խմբակցության ղեկավար, «Իմ քայլը» նախաձեռնության առաջնորդ Նիկոլ Փաշինյանի հետ հանդիպմանը ՀՀԿ պատգամավոր Հերմինե Նաղդալյանը դիմելով նրան ասաց. «Ադրբեջանական մամուլը վերջին օրերին իր մի շարք պետական-քաղաքական գործիչների շուրթերով իր գոհունակությունն է հայտնում այն իրադարձությունների կապակցությամբ, որոնք կատարվում են Հայաստանում և հատկապես նշում, որ հեռացավ ռազմաքաղաքական ղեկավարությունը և նրա փոխարեն գալու է ժողովրդավարական հայացքներով ղեկավարումը, որոնց հետ պատրաստ է Ադրբեջանը համագործակցել Արցախի հարցի կարգավորման ուղղությամբ։ Որևէ վտանգներ չեք տեսնու՞մ  հնարավոր ռազմական և այլ զարգացումների իմաստով, որ կարող է լինել Ադրբեջանի կողմից»։

Փաշինյանը պատասխանեց. «Եթե նկատել եք մեր ձեռնարկած քաղաքական գործընթացում հենց ձեր նշած հարցերին մենք առանձնապես անդրադարձ չենք ունեցել, չենք խոսել ղարաբաղյան հարցի մասին, չենք խոսել ԵԱՏՄ, արտաքին քաղաքականության մասին, մեր օրակարգը եղել է ներհայաստանյան։ Ռազմաքաղաքական էլիտայի վերաբերյալ Ադրբեջանի կողմից հնչող հայտարարություններին, ես կարծում եմ, որ բոլորս էլ արձանագրում ենք, որ մեր զինված ուժերի կայունությանը, այդ թվում և կադրային կայունությանը, ոչինչ չի սպառնում»։
Փաշինյանը ևս մեկ անգամ շեշտեց, որ իրենց տրամադրվածությունը կադրային ջարդ իրականացնելը չէ։

«Ես կարծում եմ, որ Ադրբեջանում ոչ թե ուրախանալու, այլ անհանգստանալու բան ունեն, քանի որ այս քաղաքական պրոցեսները էականորեն բարձրացրել են մեր ազգային ոգին՝ սրանից բխող ռազմաքաղաքական հետևանքներով։ Եթե նույնիսկ ադրբեջանում ուրախացել են, կարծում եմ՝ նրանք նույնպես իրավիճակը սխալ են գնահատում»։

Նաղդալյանն արձագանքեց. «Փաստորեն, որքան հասկացա, զինված ուժերի հետ կապված և նրանց պատրաստակամության հետ կապված դուք շարունակականության կողմանկից եք և դա ուրախալի է, շնորհակալություն դրա համար»։

Այնուհետև ՀՀԿ-ական պատգամավորը շարունակեց, որ «Ելք» դաշինքը երկար ժամանակ քննադատել է գործող իշխանություններին այն կապակցությամբ, որ մատը մատին չեն տալիս այն հարցի վերաբերյալ, որ մեր ռազմավարական գործընկեր Ռուսաստանը շարունակում է զենք վաճառել Ադրբեջանին և Թուրքիային։

«Այսօր և երեկ դուք ամրապնդեցի այն կարծիքը, որ Ռուսաստնը շարունակելու է մնալ մեր ռազմաքաղաքական գործընկերը, մեզ մնում է հարցնել, զենքի վաճառքը ե՞րբ է դադարելու կամ ինչպե՞ս եք այս խնդիրը լուծելու»,- հարցրեց նա։

Սրան ի պատասխան Նիկոլ Փաշինյանն ասաց. «Մենք մեր ռուսաստանցի գործընկերների հետ շփումներ արդեն իսկ ունեցել ենք և նույնիսկ այս կարճ և հրատապ ռեժիմով քննարկումների ընթացքում այդ թեման չենք շրջանցել և որևէ քննարկման ընթացքում չենք շրջանցելու։ Ցանկացած պատեհ առիթ օգտագործվելու է այդ հարցը բարձրացնելու համար»։