Ձեր վստահելի աղբյուրը

Հանրապետական խմբակցության անդամ Խոսրով Հարությունյանը վարչապետի թեկնածու Նիկոլ Փաշինյանին Հանրապետական խմբակցության հատուկ նիստում հիշեցրեց, որ բոլոր տեսակի խոստումների կատարումն ապահովող ինստիտուտը կառավարությունն է, ապա հետաքրքվեց, եթե նա ընտրվի վարչապետ, ովքեր են լինելու առաջին փոխվարչապետը, պաշտպանության, արտաքին գործերի, Ֆինանսների նախարարները:

«Համաձայնեք, որ սա զուտ հռետորաբանական հարցադրում չէ ու որևիցե մեկի քաղաքական հետաքրքրությունը բավարարելու նպատակ չի հետապնդում: Կախված այն բանից, թե ովքեր են լինելու այս պաշտոններում, Ձեր խոստումները կարող են իրականանալ, կարող են չիրականանալ»,-ասաց Հանրապետական պատգամավորը:

Ի պատասխան Փաշինյանը ներկայացրեց իր պատկերացումը՝ որոշումները պետք է լինեն առավելագույնս քննարկված ու ինստիտուտցիոնալ:

«Կարծում եմ պետության կայացվածության մակարդակը կայանում է նրանում, որ ոչ թե ինչքանով են ազդում որոշումների կայացման վրա պաշտոնյաների սուբյեկտիվ ընկալումները, այլ թե դրանք որքանով են հակակաշռված ինստիտուտների ձևավորած եզրակացություններով: Ես երկորրդ մոտեցման կողմնակիցն եմ, ինստիտուտի սխալվելու հավանականությունն ավելի փոքր է»,-ասաց նա:

Փաշինյանը հիշեցրեց, որ կառավարության ձևավորումը տեղի է ունենում ֆորսմաժորային իրավիճակում, երբ քաղաքական ճգնաժամի հանգուցալուծման խնդիր կա:

«Եթե սա լիներ սովորական ընտրական պրոցես, ապա կառավարության ձևավորումն այլ տրամաբանությամբ կընթանար: Բայց քանի որ մենք ունենա այսօրվա իրավիճակը, առաջին խնդիրը, որ պետք է լուծվի, պետք է արձանագրվի այն հենարանը, շրջանակը, որն ուղղակի կամ անուղղակի դառնում է վարչապետի ընտրության իրականացնողը: Կառավարության կազմը պետք է ընտրվի այդ շրջանակի հետ քննարկումների արդյունքում, ինչպես արդեն ասացի, մեր նպատակը համերաշխության մթնոլորտի ստեղծումն է, որտեղ հնարավոր կլինի քննարկել խաղաղ պայմաններում օրահասական բոլոր խնդիրները: Այսինքն կառավարության ապագա կազմը կձևավորվի  կախված նրանից, թե վաղը քվեարկությունն ինչպիսի քաղաքական պատկեր ցույց կտա: Կձևավորվի կառավարության կազմն այդ պատկերի շրջանակում քննարկումների ու խորհրդակցությունների արդյունքում, ես հիմա չեմ ուզում անել հավակնոտ հայտարարություններ, մեր ձգտումը պետք է լինի ձևավորել համաձայնության կառավարություն»,-ասաց Փաշինյանը:

Խոսրով Հարությանը մեկ անգամ էլ նշեց, որ հարցը հռետորական չէ, կասկած հայտնեց, որ Փաշինյանը չունի կառավարության ուրվագծած կազմը, գոնե առանցքային դերակատարներին:

«Եթե անուններ չեք հնչեցնում, անորոշ է ստացվում, եթե նրանք չկան, առավել ևս անորոշությունը մեծանում է»,-ասաց Հարությունյանը:

Փաշինյանն էլ արձագանքեց, որ իրենց խնդիրը եղել է գործընթացը սահմանադրության ու օրենքի շրջանակում, ասաց, որ 15 օր ժամանակ ունեն կառավարության ձևավորման համար:

«Մեր Սահմանադրությունն ու օրեննքերը չեն պարտադրում, որ սկզբից պետք է կառավարության կազմը հրապարակվի: Մենք տրամադրված չենք, որ կառավարության կազմով արձանագրենք կողմերից մեկի հաղթանակ, և կողմերից մեկի պարտություն: Մենք ունենք կադրային բազա, բայց մենք չենք գալիս կադրային ջարդ անելու, ոչ մերոնքականներին մերոնքականներով փոխարինելու»,-ասաց նա: