Եթե կուսակցությունը պահանջի՝ Վարդանյանը մանդատը վայր կդնի, բայց Փաշինյանի օգտին չի քվեարկի
ՀՅԴ խմբակցության պատգամավոր Աղվան Վարդանյանն իր ելույթում նշեց, որ վերջին երկու- երեք օրերին ուշադիր հետևել է Նիկոլ Փաշինյանի արտաքին ու ներքին քաղաքականության վերաբերյալ այլևս զուսպ, հավասարակշռված հայտարություններին, և հրապարակում, և հարցազրույցներում, և ԱԺ երեք խմբակցություների հետ հանդիպումներում։
«Արցախ, Ռուսաստան, ԵՄ, Իրան, Վրաստան, ոչ մի տարբերություն, նույնը, ինչ ասում ու փորձում էր իշխանությունը։ Ներքին կյանքի կարգավորման հարցում նվազագույն տարբերություն այն ամենից, ինչ ծրագրում առաջնահերթ էր համարում քաղաքական կոալիցիան, այո, տեմպերի խնդիր կար, ինչը մեզ էլ չէր գոհացնում, և դեռ հարց է, մեծ հարց, Փաշինյանի վարչապետության դեպքում այդ տեմպերը մեզ՝ հանրությանը, հատկապես, խանդավառ երիտասարդության բավարարելու՞ են, մի քանի հնարավոր ժամանակավոր ազդեցության քայլերը չհաշված։ Մի խոսքով՝ տեսալականը, պատկերացումը, ծրագրային քայլերը շատ տարբեր չեն, էական բացառությամբ, այն էլ արդեն անշրջելի իրողություն, պարոն Սերժ Սարգսյանը հրաժարական է տվել, և եթե ամեն ինչ նույնն է, կամ գրեթե նույնը, մնում է Փաշինյանի անձը, անձային հատկանիշները և ժողովրդի ցանկությունը։
Այո, անսահման դժվար է հոսանքին հակառակ գնալը, թեև ժողովրդի վստահությունը վայելող այլ գործիչներ ենք տեսել նաև տխուր վերջաբանով։ Անձամբ ես՝ բարձր եմ գնահատում Նիկոլի անձնազոհությունն ու վճռականությունը, ես հավատում եմ նրա ձգտումների ազնվությանը, այսօրվա ելույթը, հարցերի պատասխաններն էլ այդ են վկայում»,- ներկայացրեց դաշնակցական պատգամավորը։
Նրա խոսքով՝ ինքը երբեք անձերով չի առաջնորդվել, կուռքեր չի ընդունել. «Ես վտանգի կանխազգացում ունեմ, այս պայմաններում չեմ կարող վստահ լինել, որ այս ամենը շատ ավելի մեծ խաղի բարդ ու բազմաշերտ սցենարների համակցություն չէ, ինձ առայժմ անհայտ ծալքերով, շահերով ու հետևանքներով։ Վստահ եղեք՝ ես առանց հիմքի ոչինչ չեմ ասում, և եթե այդ ծալքերն ինձ համար պարզ չեն, չեմ էլ կարող բացառել, որ դրանք անդառնալի ողբերգական հետևանքներ չեն ունենալու, իմ ժողովրդի, հրապարակի հրաշալաի երիտասարդների, Արցախի, իմ պետականության համար»։
Վարդանյանը շեշտեց, որ ինքը ևս ժողովուրդ է, ևս ոգևորված է այս շարժմամբ, այս անկախության սերնդով, ուզում է կուտակված հսկայական էներգիան ծառայի պետականության հզորացմանը, հանկարծ նոր հուսախաբության կորուսների դուռ չբացվի։
«Այս իրողություններից, այս հաստատումներից մեկնելով ես չեմ կարող անձնական պատասխանատվություն ստանձնել և կողմ քվերակել պարոն Փաշինյանին, հակառակ պարագայում՝ երեսպաշտորեն խախտած կլինեմ խղճով ու համոզմունքներով քվեարկելու իմ սահմանդրական իրավունքը։ Անկեղծ ասած՝ սա ընտրություն էլ չի, ինձ երկու տարբերակ են թողել՝ քվեարկել կամ Նիկոլին, կամ Փաշինյանին։ Հարգելի խորհրդարան, ես չեմ քվերակելու, բայց սա հարցի մի կողմն է, ես դաշնակցական եմ, խմբակցություն եմ ներկայացնում, որ կողմ քվեարկելու որոշում ունի, ինձ համար այս դժվար երկվությունից դուրս գալու մի ելք կա, եթե իմ կուսակցությունը պահանջի, պատրաստ եմ վայր դնելու մանդատս։
Իմ փորձառությամբ, հոգևոր-մշակութային իմ կառույցով ես բոլոր կողմերից պահանջում եմ բացառել ցանկացած բռնություն ու բախում։ Բանակցություններով գտնենք լուծումներ, միասին կազմակերպենք արթահերթ վստահելի ընտրություններ, երկիրը դուրս բերենք փակուղուց։ Գիտակցեք, սա ես ասում եմ հանրապետականներին, անցյալին վերադարձ չի լինելու»,- ամփոփեց Վարդանյանը։
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
