Ձեր վստահելի աղբյուրը

ԱԺ ՀՀԿ խմբակցության անդամ Արման Սաղաթելյանը խորհրդարանում իր ելույթի ժամանակ նշեց, որ ԱԺ ամբիոնը սովոր է կատեգորիկ հռետորաբանությանը, ինչը պառլամենտական խոսքին, կարծես թե, այնքան էլ խորթ չէ։

«Ես վստահ եմ, որ այսօրվա քննարկումներից, քվեարկությունից, քաղաքական ուժերի հռետորաբանությունից ու պահվածքից է կախված մեր վաղվա օրը և մեր անվտանգությունը կամ գոնե թե այն գիտակցումը, թե ինչպես է պետք գնալ և ուր մտնել, որ ճանապարհով գնալ դեպի մեր վաղվա օրը»,- ասաց նա։

Սաղաթելյանը մի քանի ճշմարտություն ներկայացրեց։ Դրանցից առաջինն այն է, որ յուրաքանչյուր կառավարման համակարգ ունի իր տրամաբանությունը, գործունեության մեխանիզմը, փիլիսոփայությունը, դրանց հակառակ արված ցանկացած քայլ բերում է ծանր հետևանքների։ Նրա խոսքով՝ հարկադրանքը, դրա ցանկացած դրևսորումը կամ սպառնալիքը հակահամակարգային են և կործանարար։

«Պառլամենտական կառավարման ձևի պարագայում կառավարություն ձևավորվում է պառլամենտական մեծամասնության կողմից, և ձևավորում է այն ուժը, որը այդ մեծամասնությունն ունի, պառլամենտը արձակվում է, եթե այն ի զորու չի լինում ձևավորել կառավարություն. ի հեճուկս բոլոր չկամեցողների՝ իշխող մեծամասնությունը առավել քան միասնական է»,- ասաց նա։

Սաղաթելյանը նշեց՝ Կառավարության գործունեության համար պատասխանատվություն է կրում այն քաղաքական ուժը, որը կազմավորել է պառլամենտական մեծամասնություն, «քաղաքական պատասխանատվություն կրողը շարժումն է» ձևակերպումը կեղծ կատեգորիա է։ Նրա խոսքով՝ քաղաքական ուժերը կողմ են քվեարկում մեկ այլ քաղաքական ուժի թեկնածուին, եթե նրա հետ ձևավորել են քաղաքական կոալիցիա և ստանձնել են քաղաքական պատասխանատվություն, ցանկացած այլ դրևսորում պատասխանատվությունից խուսափել է, կեղծ մեծամասնության աջակցության իմիտացիա ստեղծել։

«Պառլամենտում ներկայացրած երկրորդ ամենափոքր կոալիցիոն ուժի առաջադրած թեկնածուին երկու ուժեր պատրաստվում են կողմ քվեարկել՝ վերջինիս հետ չունենալով որևէ կոալիցիոն հուշագիր։ Քաղաքականության մեջ հաջողության գրավականը քաղաքական ծրագիրն է, քաղաքական թիմը։ Անթույլատրելի է հանրային ճանաչում ունեցող մեկ անձով գնալ չգիտեմ ուր, չգիտեմ ոնց, բայց ասել, թե գիտենք՝ ինչու ենք գնում»,- ասաց նա։

Սաղաթելյանը վարչապետի թեկնածու Նիկոլ Փաշինյանին դիմեց նաև որպես ՀՀ ԶՈՒ հրամանատարական կազմի պահեստազորի սպա, նշեց՝ ինքը և իր զինակից ընկերները կարծում են, որ գերագույն հրամանատարի գործառույթ ենթադրող պաշտոնին հավակնելը ենթադրում է ավելին, քան «4 եվրո 99 ցենտ արժողությամբ զինվորական, իսկ ավելի ճիշտ կլինի ասել՝ որսորդական շապիկը և «ռազմագիտություն» առարկայի շրջանակներում ստացած զինվորական գիտելիքները»։

«Դուք Ձեզ պատկերացնու՞մ եք պատերազմական դրության ժամանակ՝ շրջապատված մի քանի տասնյակ գեներալներով ու ձեր՝ դպրոցական ռազմագիտության գիտելիքներով։ Ես՝ ոչ։ Դուք շատ լավ պառլամենտական եք, դասական պառլամենտական եք, և ես կարծում եմ՝ մենք շատ արագ կարող ենք կորցնել լավ պատգամավորի ու ստանալ ոչինչ կամ վատ վարչապետ, մեր երկրին իրենից անկախ վտանգներ բերող վարչապետ։ Գիտակցու՞մ եք Դուք դա այսօր. ինձ թվում է՝ ոչ»,- ասաց նա։

ՀՀԿ-ական պատգամավորը նաև նշեց, որ չի ցանկանում հավատալ շրջանառվող այն կարծիքներին, որ անգամ Նիկոլն ու ընկերները չեն գիտակցում՝ այս ամենը դրսից ուղղորդվող մի վատ սցենարի սկիզբ է միայն, սցենարի, որի ավարտը Արցախի հարցի ոչ հայանպաստ լուծումն է։ Սաղաթելյանը նաև ներկայացրեց տարիներ առաջ «Հայկական ժամանակ» թերթի այն համարը, որտեղ Նիկոլ Փաշինյանի խոսքերն էին մեջբերված՝ Արցախի ազատագրված տարածքների վերաբերյալ։ Փաշինյանը նշել էր, որ այդ խոսքերն իրեն են վերագրում, սակայն դա ապատեղեկատվություն է։

«Պարոն Փաշինյան, «Հայկական ժամանակ»-ի 2001 թ. լույս տեսած ահա այս համարը երեկվանից դրված է իմ աշխատանքային սեղանին, ուղղակի ես չուզեցի ձեզ ընդհատել, որովհետև ես ունեի խոսք ու կարող էի բերել նաև իրեղեն ապացույցը ու նաև նայել ձեր աչքերին»,- ասաց նա։