Պատգամավորների հարցերը՝ վարչապետի թեկնածուին (ուղիղ)
Խորհրդարանում ՀՀ վարչապետի ընտրության հարցի քննարկման ժամանակ վարչապետի թեկնածու Նիկոլ Փաշինյանի ելույթից հետո հաջորդեց պատգամավորների հարցերը թեկնածուին։
Փաշինյանին հարց ուղղելու համար հերթագրվել է 26 պատգամավոր։
ՀՀԿ պատգամավոր Հայկ Բաբուխանյանն այսօր խորհրդատանում ՀՀ վարչապետի ընտրության հարցի քննարկման ժամանակ վարչապետի թեկնածու Նիկոլ Փաշինյանից հետաքրքրվեց, թե վարչապետ դառնալու դեպքում արդյո՞ք երկիրը միմիայն լիբերալ գաղափարախոսությամբ է ղեկավարվելու:
Նիկոլ Փաշինյանն ի պատասխան նշեց, որ բազմիցս հայտարարել է, որ ինքը իրեն լիբերալ չի համարում, իսկ աշխարհում «իզմ»-երով պայմանավորված սահմանազատումները վերանում են. «Հիմա մի դարաշրջանում ենք ապրում, երբ ամենակարևորը ոչ թե «իզմն» է, այլ մարդու երջանկությունն ապահովելը»,-ասաց նա:
Հանրապետական խմբակցության պատգամավոր Շուշան Սարդարյանն էլ խնդրեց պարզաբանել, թե որոնք են սահմանադրական այն մեխանիզմները, որոնք հնարավորություն կտան արտահերթ խորհրդարանական ընտրությունները իրականացնել նրա նշած ժամկետում՝ վարչապետի ընտրությունից հետո երկու ամսվա ընթացքում։
Փաշինյանը պատասխանեց, որ մեխանիզմների տարբերակներից մեկը հետևյալն է. «Կառավարությունը ձևավորվում է, բայց խորհրդարանը չի հաստատում նրա ծրագիրը, և չի նշանակվում նոր վարչապետ, այդ պայմաններում մենք իրավունքի ուժով լուծարում ենք Ազգային ժողովը և տեղի են ունենում արտահերթ խորհրդարանական ընտրություններ։ Մենք կարծում ենք, որ կա հնարավորություն այս հարցի շուրջ քննարկումների միջոցով հասնել համաձայնության։ Ընդունում եմ, որ այստեղ նունպես չպետք է լինի կառավարության կամ իշխանության պարտադրանքի որևէ մեթոդաբանություն։ Հավատում եմ, որ կարող ենք քաղաքական անհրաժեշտություններն արձանագրելով՝ գալ ընդհանուր հայտարարի»։
Նույն խմբակցության պատգամավոր Կարինե Աճեմյանը հարցրեց. «Համոզվա՞ծ եք, որ կարող եք տանել այն բեռը, որը պատրաստվում եք վերցնել, որովհետև Ձեր հայրն էլ չի ուզում, որ դուք դառնաք վարչապետ»։
Նա պատասխանեց, որ ինքը որևէ գործ չի սկսում, եթե համոզված չի լինում, որ այդ գործը տանելու է մինչև վերջ. «Որևէ մեկին իմ քաղաքական կենսագրության մեջ հիմք չեմ տվել այլ կերպ մտածելու»։
«Թե արտախորհրդարանական, թե խորհրդարանական ուժերը պետք է վստահ լինեն, որ արդար և թափանցիկ ընտրություններ պետք է լինեն։ Ինչպե՞ս եք դու պատկերացնում այդ վստահության ապահովումը»,- հարցրեց «Ծառուկյան» խմբակցության պատգամավոր Արարատ Զուրաբյանը։
Կարևորելով հարցը՝ Փաշինյանը պատասխանեց. «Կա մի կարևոր նախապայման, պետք է հնարավորինս հավասար մեկնարկային հնարավորություններ ստեղծել բոլորի համար։ Այստեղ, ցավոք սրտի, ոչ տեսականում, ոչ գործնականում բոլորին հարյուր տոկոսանոց նույն պայմաններում հնարավոր չի դնել՝ սկսած նրա քաղաքական ակտիվությունը։ Ճիշտ եք ասում, որ այս հարցի շուրջ ժամկետների, մեթոդների, գործիքների շուրջ լինի հնարավորինս լայն կոնսոլիդացիա և կոնսենսուս, ակնհայտ է»։
«Ծառուկյան» խմբակցության պատգամավոր Գևորգ Պետրոսյանը հետաքրքրվեց. «Հույս ունենա՞նք, որ Ձեր ընտրվելու պարագայում մենք այլևս չենք ապրելու այն երկրում, որտեղ մանր ու միջին բիզնեսն ուղղակի կեղեքվում է հարկային մարմինների կողմից, որտեղ մեկ արկղ մանդարին կրողը ենթարկվում է հալածանքների։ Երաշխիք է պետք, ոչ թե խոստումներ, խոստումներ շատ ենք լսել»։
Վարչապետի թեկնածուն նշեց, որ երաշխիքները պետք է ստեղծվեն հընթացս. «Հիմա մենք ունենք ամենակարևոր երաշխիքը և այդ երաշխիքն այս դահլիճում չէ, այլ հրապարակում կանգնած ժողովուրդն է։ Վերջ, Հայաստանում իշխանության տերը ժողովուրդն է։ Մանցածը օրենսդրական կարգավորումների խնդիր է։ Մենք ընդամենը դե ֆակտո գոյություն ունեցող արգելքները վերացնելու ենք»։
ՀՀԿ-ական տագամավոր Տաճատ Վարդապետյանը հարցրեց, թե ընտրվելու պարագայում ինչպե՞ս է ուրվագծվելու պետության ռազմական ծախսերի դինամիկան։
«Ռազմական ծախսերը պետք է լինեն ադեկվատ՝ տարածաշրջանային իրավիճակին։ Այո, ես համարում եմ, որ Հայաստան ունի ռազմական ծախսերի մեծացման անհրաժեշություն, և ես համոզված եմ, որ կկարողանանք բյուջետային եկամուտներն էականորեն ավելացնել և դրա արդյունքում կավելանան նաև ռազմական ծախսերը»,- ի պատասխան ասաց Փաշինյանը։
ՀՀԿ-ական պատգամավոր Ռուստամ Մախմուդյանն էլ հետաքրքրվեց, թե ՀՀ-ի գործող իշխանությունների կողմից ազգային փոքրամասնությունների հարցում ինչպիսի՞ բացթողումներ կան, որո՞նք նրա վարչապետության օրոք կշտկվեն։
«ՀՀ ազգային փոքրամասնությունների իրավունքները լիարժեքորեն պաշտպանված են ՀՀ-ում: Փոքրամասնությունների իրավունքները ՀՀ-ում վատ վիճակում չեն, բայց գիտեմ ոլորտ, որտեղ նրանց համար էականորեն սահմանափակած են, դա ընդդիմադիր քաղաքական գործունեություն ծավալելու հնարավորությունն է։ Պետք է ավելի մեծ ջանքեր գործադրեն, որ շտկեն այդ բացը, նաև որպեսզի ազգային փոքրամասնությունները իրենց ավանդույթները պահպանելու և զարգացնելու իրավունք ունենան, ունենալով լիարժեք իրավունքներ»։
«Ծառուկյան» խմբակցության պատգամավոր Վահե Էնֆիաջյանը հարցրեց. «Ինչպե՞ս եք պատկերացնում արտագաղթի կասեցումը և ներգաղթի կազմակերպումը»։
Վարչապետի թեկնածուն ի պատասխան նշեց. «Կարծում եմ, որ այն ոգևորությունը, այն մթնոլորտը, որն «Իմ քայլը» շարժման շրջանակներում հաստատվել է Հայաստանում, այդ զգացողությունը մարդկանց լրջորեն կապում է իրենց հայրենիքի հետ։ Այսօր հազարավոր մարդիկ՝ Եվրոպայից, ԱՄՆ-ից, Ռուսաստանից եկել են Հայաստան, որպեսզի այս շարժմանը մասնակցեն, և համոզված եմ՝ արտագաղթի դադարեցման և ներգաղթի կազմակերպման պրոցեսն արդեն իսկ սկսվել է»։
Հարակից հրապարակումներ`
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
