Ձեր վստահելի աղբյուրը

«Ես հույս ունեի լսել վարչապետի հայեցակարգային ելույթ, բայց ականատես եղա ժողովրդի ականջը շոյող ոչ ծրագրային ելույթի»: Դիմելով վարչապետի թեկնածու Նիկոլ Փաշինյանին՝ իր ելությում այս մասին հայտարարեց ԱԺ փոխնախագահ Էդուարդ Շարմազանովը:

«Այսօր շատ կարևոր օր է Հայաստանի, Արցախի ու համայն հայության համար: ԱԺ-ն պետք է ընտրի վարչապետ: Վարչապետ, որը ոչ միայն գործադիր մարմնի ղեկավարն է, այլև որը գերագույն հրամանատարն է ու դե ֆակտո գլխավոր բանակցողը Լեռնային Ղարաբաղի հիմնահարցում»,-հարց ու պատասխանից հետո ասաց Էդուարդ Շարմազանովը:

Մինչ այդ նա անդրադարձավ ներքաղաքական իրավիճակին, նշեց, որ երկում նոր իրողություններ են ու նոր ներքաղաքական վիճակ:

«Այս օրերին իշխանությունը ցուցաբերել է բացառիկ հանդուրժողականություն, զսպվածություն և հասարակությունը մերոնքների ու ձերոնքների չբաժանելու գործելաոճը: Անկախ այն բանից, հարգելի գործընկերներ դուք ընդունում եք, թե ոչ, դա այդպես է, և պատմությունն ամեն մեկիս կդնի իր տեղը: Մենք չենք գնացել մերժողական ճանապարհով, պատրաստ ենք եղել ու պատրաստ ենք երկխոսության, բայ ոչ երբեք վերջնագրերի»,-ասաց նա:

Հանրապետական խմբակցության ներկայացուցչի խոսքով, Հայաստանում ժողովրդավարական արժեքները այլընտրանք չպետք է ունենան, դեմոկրատիան մրցակցություն է, որը բաց է մասնակցության համար:

«Մենք պարտավոր ենք հարգել բազմակարծությունը, այլակարծությունը: Ինձ համար անընդունելի է ճնշման որևէ միջոցով փորձել ազդել պատգամավորի կարծիք արտահայտելու վրա: Պրեսինգն անթույլատրելի է: Մենք այստեղ բոլորս հանրության ընտրյալներն ենք, ու մեր խղճի մտոք կընտրենք մեր վարչապետին կամ կողմ, կամ դեմ քվեարկությամբ»,-նշեց ՀՀԿ-ական գործիչը:

Անդրադառնալով վարչապետի ընտրությանը, Շարմազանովն ասաց, ընտրելու են ոչ թե համաժողվրդական տրիբուն կամ լավ հռետոր, այլ գործադիրի ղեկավար, որը «նախ և առաջ պետք է աչքի ընկնի քաղաքական  քայլերի կանխատեսելիությամբ ու քաղաքական հստակ գաղափարախոսությամբ: Կանխատեսելի նշանակում է հայեցակարգային հարվերում լինել հետևողական ու անփոփոխ»:

Խորհրդարանի փոխխոսնակը մի քանի հարցեր բարձրաձայնեց՝ Նիկոլ Փաշինյանի ընտրվելու պարագայում ով է լինելու փոխվարչապետը, պաշտպանության, ֆինանսների նախարարները, ԱԱԾ ղեկավարը, ոստիկանապետը:

«Ո՞վ, ովքե՞ր: Պատասխան չկա: Ընդամենը մի քանի ամիս առաջ Դուք և Ելք խմբակցությունը իշխանությունից պահանջում էիք դուրս գալ ԵՏՄ-ից: Իսկ հիմա ասում եք՝ իրողություն է փոխվել: Կներեք, երբ մենք էինք խոսում իրողության փոփոխությունից, դուք մեզ մեղադրում էիք ստախոսության մեջ: Կարծում եմ, առնվազն արդար չէ»,-ասաց նա:

Շարմազանովը Փաշինյանին մեղադրեց նաև արցախյան խնդրի կարգավորման վերաբերյալ որևէ հայեցակարգ չներկայացնելու համար՝ ո՞րն է փոխզիջման  գինը, ո՞րն է լինելու յոթ ազատագրված տարածքների ճակատագիրը:

«Ասում եք ռազմական բյուջեն կավելացնեք: Շատ լավ է, բայց ինչպե՞ս: Ես այդ հարցի պատասխանը չստացա»,-ասաց նա:

Ինչ վերաբերում է  գաղափարախոսությանը, ՀՀԿ-ական պատգամավորը նկատեց,  անհնար է լինել մի քիչ սոցիալիստ, մի քիչ պահպանողական, մի փոքր էլ լիբերալ:

«Քաղաքական գործիչը պետք է ունենա գաղափարախոսություն: Այդպես է քաղաքակիրթ աշխարհում՝ Վաշինգտոնից մինչև Փարիզ, Բրյուսելից մինչև Մոսկվա: Ես հույս ունեի լսել վարչապետի հայեցակարգային ելույթ, բայց ականատես եղա ժողովրդի ականջը շոյող ոչ ծրագրային ելույթի: Մենք ևս մտահոգ ենք հայրենիքում առկա խնդիրներով, մենք չենք ժխտում, որ մեր երկրում եղել է ու կա կոռուպցիա, անարդարություն: Անկախ այն բանից, թե ով կլինի իշխանությունը, մենք պետք է խոսենք ոչ թե վերջնագրերով, այլ երկխոսության գնանք: Իմ գնահատականները բացառապես քաղաքական են, չկա որևէ անձնական վերաբերմունք: Պարոն Փաշինյան, ինչպես երեկ, այնպես էլ այսօր, դուք ինձ չհամոզեցիք: Ես չեմ տեսնում Ձեզ գերագույն գլխավոր հրամանատարի դերում»,-ասաց նա:

Շարմազանովը, եզրափակելով ելույթը, նշեց, եթե ոմանց պետք են ուժեղ ցնցումներ, ապա մեզ պետք է ուժեղ, միասնական, ժողովրդավարական ու ազգային Հայաստան.
«Աստված պահապան հայ ժողովրդին, ՀՀ յուրաքանչյուր քաղաքացու»:

Նշենք, որ ելույթի համար հերթագրվել է 19 պատգամավոր: