Ձեր վստահելի աղբյուրը

«Մենք ունենք ճգնաժամ, և այդ ճգնաժամը չունի լուծումների այլ տարբերակ»: ԱԺ-ում իր ելույթում նման կարծիք հայտնեց «Ելք» խմբակցության պատգամավոր Էդմոն Մարուքյանը:

Նրա խոսքով, միակ տարբերակն այսօր խորհրդարանում Նիկոլ Փաշինյանին վարչապետ ընտրելն է:
«Ուրիշ տարբերակ այս լարված իրավիճակը լուծման համար չունի: Օրինակ, եթե դուք հիմա դեմ քվեարկեք, դուրս գաք, չի լուծվելու ճգնաժամը: Սա իմ համոզմունքն է ու բխում է իրողություններից, ՀՀ քաղաքացիների շահերից»,-ասաց նա:

Մարուքյանն ասաց, որ այս զարթոնքը կարելի է վերածել ներդրումների, մոնոպոլիաների, ատելության, կոռուպցիայի դեմ պայքարի: Նման իրավիճակի առաջացման համար ընդդիմադիր պատգամավորը մեղադրեց Հանրապետական պատգամավորներին:

««Ելք» խմբակցությունը եղել է արդյունավետ ընդդիմադիր ուժ: Ի՞նչ էիք  անում այդ օրերին: Դուք ձեռ էիք առնում մեզ, դուք մեր նախագծերը մերժում էիք, Դոնթի բանաձևով մեզ հասանելիք հանձնաժողովը կրճատում էիք: Դուք ամեն ինչ արեցիք ձեր մենիշխանությամբ, որ սա տեղի ունենա: Եվ սա տեղի է  ունեցել: Առկա է քաղաքական ճգնաժամ, բայց պետք է գնահատենք, չունենք զոհեր, չունենք խանութի կոտրված փեղկ, չունենք»,-ասաց Մարուքյանը:

Նա նշեց, որ քաղաքական ատելության մշակույթի վերջը դնելու խնդիր կա:

«Առաջինը ես ձայն կբարձրացնեմ, եթե Փաշինյանն անի այն, ինչ կանխատեսում են ՀՀԿ պատգամավորները»,-ասաց «Ելք» խմբակցության անդամը: