Ձեր վստահելի աղբյուրը

Ամփոփվել է Մալթայի միջազգային երաժշտական փառատոնը, որը մայիսի 15-ից սկսած՝ դասական երաժշտության հրավառություն էր կազմակերպել 2018թ. Եվրոպայի մշակութային մայրաքաղաք Վալետայում։

Փառատոնի ամփոփիչ համերգն ուղիղ եթերում հեռարձակում էր euronews.com-ը։ Երեկոյի ընթացքում Հայաստանի պետական սիմֆոնիկ նվագախումբը՝ դիրիժոր Սերգեյ Սմբատյանի ղեկավարությամբ, ունկնդրին ներկայացրել է Չարլզ Քամիլերիի «Մալթա» սյուիտը, հատվածներ Սերգեյ Պրոկոֆևի «Ռոմեո և Ջուլիետ» սյուիտից, Քշիշտոֆ Պենդերեցկու Երրորդ սիմֆոնիայի ադաջոն, ինչպես նաև՝ փառատոնի ռեզիդենտ կոմպոզիտորի՝ Ալեքսեյ Շորի կլարնետի և նվագախմբի համար գրված «Վերդիանան»։

Փառատոնի հյուրն էր լեհ մեծ կոմպոզիտոր Քշիշտոֆ Պենդերեկցին։ Նա նշել է, որ մալթյան փառատոնի ծրագիրը տպավորիչ է։

«Տպավորիչ է նաև այն, ինչ արել է Հայաստանի պետական սիմֆոնիկ նվագախումբը։ Զարմանալի է, երբ մեկ նվագախումբը կատարում է փառատոնի բոլոր համերգները։ Իհարկե դա նաև մեծ նվաճում է Հայաստանի համար։ Ես հետևում եմ Հայաստանի պետական սիմֆոնիկ նվագախմբի գործունեությանը, ուրախ եմ, որ նրանք այսքան նվիրումով են իրականացնում իրենց առաքելությունն այս հիասքանչ իրադարձության շրջանակներում»,- ասել է մաեստրո Պենդերեցկին:

Փառատոնի ռեզիդենտ կոմպոզիտոր Ալեքսեյ Շորը, ամփոփելով երաժշտական այս տոնի երկու շաբաթները, այն բնութագրել է ֆանտաստիկ։ «Եվ այս ամենը մենք ունեցանք մեծ մասամբ շնորհիվ Հայաստանի պետական սիմֆոնիկ նվագախմբի աննկարագրելի կամքի, կատարողական վարպետության»,- ասել է Ալեքսեյ Շորը։

Լատվիացի կոմպոզիտոր, երաժշտագետ Գեորգ Պելեցիսը՝ որպես Արամ Խաչատրյանի աշակերտ, նշել է, որ շատ ուրախ է Մալթայում Հայաստանի մշակույթի օրերի անցկացման համար. «Արամ Խաչատրյանը համաշխարհային մեծության կոմպոզիտոր է, հետաքրքիր էր զգալ փառատոնի հայկական շունչը, պետք է ասեմ, որ այն նաև իմ երաժշտական կարիերայի վրա նկատելի է: Ես հպարտությամբ եմ հիշում, որ աշակերտել եմ մեծն Արամ Խաչատրյանին: Իսկ այն, թե ինչպես իրենց գործը կատարեցին հայ երաժիշտները՝ Հայաստանի պետական սիմֆոնիկ նվագախումբը, ուղղակի հիասքանչ էր»:

Լյուդվիգ վան Բեթհովենի անվան Զատկի փառատոնի գլխավոր տնօրեն Էլժբետա Պենդերեցկան նկատեց, որ Մալթայի համար նման մեծածավալ փառատոնն իրականություն դարձնելը շատ կարևոր հանգամանք է:

«Իհարկե, փառատոնային ընթացքին նշանակալի շուք հաղորդեց Հայաստանի պետական սիմֆոնիկ նվագախումբը: Պետք է ասել, որ մի առանձնահատուկ բան էր նրանց գործունեությունն այս ընթացքում: Ես ցավոք ներկա չեմ եղել բոլոր համերգներին, հիմա թերթում եմ ծրագիրն ու հասկանում, որ ամեն նվագախումբ չէ, որ ի զորու էր դա իրականություն դարձնել. համարյա ամեն օր հանդես գալ միջազգային ճանաչում ունեցող արտիստների հետ՝ նման բարդ ու հագեցած ծրագրով»,- ասել է տիկին Պենդերեցկան:

Կլարնետահար Անդրեաս Օտենզամերը, որ եզրափակիչ համերգի ընթացքում կատարեց Շորի «Վերդիանան», նշել է, որ ստեղծագործությունը իդեալական օրինակ է տարբեր ոճերի և ժանրերի  միաձուլման։ Նա նշել է նաև, որ Շորի երաժշտությունը քնարական է, հասանելի ունկնդրին։

Ի դեպ, համերգի և փառատոնի եզրափակիչ ակորդը նույնպես հայկական էր: Նվագախուբն առանց դիրիժորի հնչեցրել է Արամ Խաչատրյանի Լազգինկան «Գայանե» բալետից:

Ապրիլի 15-ից մայիսի 1-ը Վալետայում Մշակույթի աջակցության եվրոպական հիմնադրամի կազմակերպմամբ անցկացվել է Մալթայի միջազգային երաժշտական փառատոնը, որի պաշտոնական նվագախումբն էր Հայաստանի պետական սիմֆոնիկ նվագախումբը։ Փառատոնի շրջանակներում անցկացվել են նաև Հայաստանի մշակույթի օրեր։