Ժխտողականությունը ցանկացած բանի սխալ սկիզբ է. Գևորգ Կոստանյան
ԱԺ ՀՀԿ խմբակցության անդամ Գևորգ Կոստանյանը, լրագրողների խնդրանքով խոսելով երկրում ստեղծված իրավիճակից հնարավոր ելքերի մասին, նշեց. «Բարդ հարցեր եք տալիս, որոնց պատասխանը ես չունեմ։ Ոչ թե գտնում եմ, որ լուծումը չկա, այլ հարցերի պատասխանը չեմ կարող տալ»։
Արձագանքելով տեսակետին, թե Հանրապետական կուսակցություն, որպես այդպիսին, այլևս գոյություն չունի, Կոստանյանը պատասխանեց, որ նախ՝ ցանկացած կուսակցություն իր գաղափարախոսություններով և մոտեցումներով գոյություն ունենալու իրավունք միշտ ունի, երկրորդ՝ եթե ուզում են նոր մոտեցումներ, նոր գնահատականներ, եթե այդ մոտեցումները դրանք պետք է սկսեն ժխտողականությամբ, կապ չունի՝ ինչով է դա դրսևորվում, դա արդեն սխալ սկիզբ է որևէ բանի և ցանկացած բանի, հետևաբար ինքը չի ընդունում։
Հիշեցնենք, որ երեկ հենց միայն ՀՀԿ-ն էր, որ բացառությամբ մեկ մարդու, դեմ քվեարկեց վարչապետի միակ թեկնածուին, ինչն էլ որոշեց այդ քվեոարկության ճակատագիրը՝ վարչապետ չընտրվեց:
Լրագրողներից մեկի դիտարկմանը, թե վարչապետի՝ երեկ խորհրդարանում կայացած ընտրությունից առաջ ասվում էր, որ ՀՀԿ-ն դեմ կքվեարկի Նիկոլ Փաշինյանին, արդյո՞ք նույնը կարող է ասել նաև մեկ շաբաթ հետո կայանալիք ընտրության մասին, Կոստանյանն արձագանքեց, որ մինչև մյուս քննարկումը մեկ շաբաթ կա, հետո կխոսեն։
«Դիրքորոշումների հետ կապված՝ ինձ համար մի քիչ դժվար է կանխատեսումներ անել, առավել ևս, դուք շատ ժամանակ այս ամբողջ ընթացքում տեսել եք, որ ես կուսակցական որոշումներին իրոք չեմ մասնակցել, ինչու՞, որովհետև ես կուսակցական չեմ, շատ պարզ պատճառով։ Ինձ համար դժվար է այդ հարցին պատասխանել»,- ասաց նա։
ՀՀԿ խմբակցության պատգամավորից փորձեցին ճշտել՝ արդյո՞ք ճիշտ են տեղեկությունները, որ ՀՀԿ-ն մտադիր է կողմ քվեարկել «Ծառուկյան դաշինք»-ի ղեկավար Գագիկ Ծառուկյանին, նա խորհուրդ տվեց ճշտել այդ տեղեկությունների սկզբնաղբյուրից։
«Այդ որոշումների կայացմանը ես չեմ մասնակցում։ Եթե նկատել եք, եթե ես ինչ-որ բան գիտեմ, ասում եմ, եթե չեմ ասում, ուրեմն չգիտեմ, ոչ թե ստում եմ կամ խուսափում»,- նշեց նա։ Կոստանյանը հայտնեց, որ վարչապետի պաշտոնին իր նախընտրած թեկնածուն ունի, սակայն նրա անունը տալ չցանկացավ։
Հարցին՝ արդյո՞ք հանրապետականը հակված է գնալ արտահերթ խորհրդարանական ընտրությունների, նա պատասխանեց, որ չի կարծում, թե նման հետևության հանգելու բացարձակ հիմքեր կան, բայց չի էլ կարող դա բացառել։
«Դրանք սահմանադրական լուծումներ են, որոնք պահանջում են քաղաքական գնահատական, այսինքն՝ դա քաղաքական նպատակահարմարության հարց է ավելի շատ, որովհետև իրավական լուծումներ կան բոլոր հնարավոր տարբերակների համար, դրանցից յուրաքանչյուրի ընտրությունն ընդամենը քաղաքական նպատակահարմարության հարց է»,- ասաց նա։
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
