Արթուր Ալեքսանյանը վերադարձավ հայրենիք

Սպորտ 14:37 03/05/2018 Հայաստան

Արթուր Ալեքսանյանը վերադարձավ հայրենիք

ՌԴ Կասպիյսկ քաղաքում անցկացված Եվրոպայի առաջնությանը Եվրոպայի չեմպիոն դարձած Արթուր Ալեքսանյանն ու Մաքսիմ Մանուկյանը, բրոնզե մեդալ վաստակած Կարեն Ասլանյանը ժամանեցին հայրենիք։ «Զվարթնոց» օդանավակայանում հայ մարզիկներին դիմավորեցին ՀԱՕԿ նախագահ Գագիկ Ծառուկյանը, ըմբշամարտի ֆեդերացիայի նախագահի պաշտոնակատար Հրաչյա Ռոստոմյանը և բազմաթիվ երկրպագուներ։

Արթուր Ալեքսանյանը լրագրողների հետ զրույցում ասաց, որ չորրորդ չեմպիոնությունն իրեն մի քիչ դժվար տրվեց, բայց ինչի համար որ գնացել էին, հասան դրան։

«Դժվարությունը կապված էր այն բանի հետ, որ Եվրոպայի վերջին երկու առաջնություններին այդքան էլ լավ չէի մասնակցել, խնդիրներ կային, վնասվածքներ ունեի, մի քիչ լավ մարզավիճակում չէի, բայց փառք Աստծո, այս տարի ամեն ինչ լավ էր, լավ մարզավիճակում էի, և արդեն դարձա Եվրոպայի քառակի չեմպիոն»,- ասաց նա։

Ալեքսանյանը նշեց, որ իր վրա հոգեբանական ճնշում չկար, պարզապես կար լարվածություն, որը միշտ կա, բայց պետք է գտնել ճիշտ ճանապարհ, պետք է լարվածության միջից դուրս գալ, հաղթանակի հասնել։

Մրցակցությանն անդրադառնալով՝ Ալեքսանյանը նշեց, որ մրցակցությունը բարձր որակի էր, քանի որ Եվրոպայի առաջնություն է, որտեղ թույլ ըմբիշներ չկան։

Հարցին՝ արդյոք դժվար չէր պայքարի առաջին փուլում, երբ մրցակիցը հայ էր, Ալեքսանյանը նշեց. «Գորգից դուրս ընկերներ ենք, գորգի վրա՝ մրցակից»։ Նա ասաց, որ այս հաղթանակը շատ կարևոր է նաև ողջ երկրի, ժողովրդի համար։ Հայ մարզիկն իր այս հաղթանակն էլ նվիրեց մեր հերոս զինվորներին։

Կարեն Ասլանյանն ասաց, որ պայքարը շատ դժվար էր, ամեն մրցակցի հետ տարբեր դժվարություններ կային, և այս անգամ երրորդ տեղով բավարարվեց՝ նվաճելով բրոնզե մեդալ։ «Հոգեբանական ճնշում չկար, ես գնացել էի Ոսկե մեդալի հետևից, ինչ-ինչ պատճառներով չեղավ այն, ինչ մտածում էի։ Այս անգամ երրորդ տեղ գրավեցի, հուսով եմ՝ մյուս անգամ առաջին տեղ կգրավեմ»,- ասաց նա։

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: