Ձեր վստահելի աղբյուրը

Վարչապետի պաշտոնում Նիկոլ Փաշինյանի թեկնածությունն առաջադրած ՀՅԴ-ն մասնակցելու է քվեարկությանը: Խմբակցության ղեկավար Արմեն Ռուստամյանն այսօր լրագրողների հետ ճեպազրույցում հայտարարեց, չի բացառում որևէ զարգացում, բայց Փաշինյանին կողմ չքվեարկելը չի բխում Հանրապետական կուսակցության շահերից:

«Եթե երկրորդ անգամ կատարվի հայտարարությանը հակառակ քայլ, Հանրապետականը ի՞նչ ռեսուրսով պետք է մասնակցի առաջիկա ընտրություններին, ռեյտինգային համակարգն էլ չի օգնի»,-ասաց դաշնակցական պատգամավորը:

Վարչապետի ընտրությունից հետո, Ռուստամյանի խոսքով, երկիրը ճիշտ ռելսերի վրա դնելն ու արմատական բարեփոխումներ իրականացնելու արագությունը մեծացնելը պետք է լինի գլխավոր խնդիրը:

«Կա ժողովրդի հստակ պահանջ, որը պետք է իրականացվի, հակառակ դեպքում որևէ այլ լուծում ժողովուրդը չի ընդունելու: Սա է իրականությունը: Իրականությունը տեսնելով ավելորդ մարտավարական կամ խարդավանաքային տրամաբանության մեջ չպետք է տեղափոխել հարցերը, այսինքն ինչ դե յուրե կա, պետք է դե ֆակտո հաստատել»,-ասաց բանախոսը:

Նրա դիտարկմամբ, որպեսզի արտահերթ խորհրդարանական ընտրությունների արդյունքները կասկածի տակ չդրվեն, պետք է կատարվեն մի քանի անհրաժեշտ քայլեր՝ փոփոխություններ Ընտրական օրենսգրքում, սարքավորումների առկայություն բոլոր տեղամասերում՝ կրկնակի քվեարկությունը բացառելու համար, վարչապետի լիազորությունների պակասեցում, որ նախարարություն դառնան ԱԱԾ-ն ու ոստիկանությունը:

«Պետք է իրականացվի հետագա ապակենտրոնացում, ընտրակաշառքի կանխման մեխանիզմների մշակում, քաղաքական բոլոր ուժերի համար հավասար հնարավորությունների ստեղծվում ու ապահովում, որ նրանք կարողանան մասնակցել ընտրությունների, որովհետև համաժողովրդական շարժումն այսօր իր մեջ կլանել է բոլորի ընտրազանգվածը:  Պետք է ընտրությունների համար այնպիսի  միջավայր ձևավորվի, որ դա լինի ժողովրդավարական ու հավասար պայմաններով, որպեսզի որևէ կասկած չառաջանա արդյունքների վերաբերյալ»,-ասաց նա՝ դժվարանալով արտահերթ խորհրդարանական ընտրությունների անցկացման հստակ ժամկետ նշել: