Ձեր վստահելի աղբյուրը

Յուրաքանչյուր ծխախոտից հետո ավելանում են արյան սիստոլիկ և դիաստոլիկ ճնշումները, հաճախանում է սրտի զարկերի թիվը, առաջանում է ծայրամասային անոթների նեղացում: Այս տվյալները ներկայացրել է ՀՀ ԱՆ Առողջապահության ազգային ինստիտուտի տեղեկատվական վերլուծական կենտրոնը: 

Ըստ աղբյուրի՝ ծխախոտի ծխի մեջ պարունակվող ածխածնի օքսիդը կապվում է հեմոգլոբինի հետ՝ առաջացնելով թթվածնային քաղց: Ծխելը հանգեցնում է արյան մեջ խոլեստիրինի մակարդակի, պլազմայում՝ հագեցած ճարպերի մակարդակների բարձրացմանը: Այս ամենը կարող է հանգեցնել ծայրամասային անոթների աթերոսկլերոզի, սրտի իշեմիկ հիվանդությունների, հանկարծամահության:

ԱԱԻ-ի տվյալների համաձայն՝  ծխողների 10-ից 3-ը (32.7%) ծխում են 25 և ավելի ծխախոտային գլանակ, որը հանդիսանում է մեծ սպառնալիք ՉՆ և  ԱՇՀՀ առաջացման համար:

Նշվում է նաև, որ հարցվածների 10-ից 5-ն ենթարկվում է երկրորդային ծխի վնասակար ազդեցությանը տնային պայմաներում (56.4%), իսկ յուրաքանչյուր չորորդը` աշխատավայրում (26.6%):

Այսպիսով, կարելի է ենթադրել, որ ՀՀ չափահաս բնակչության յուրաքանչյուր երկրորդ անձը ծխող է: Ի դեպ, ԱԱԻ-ի տվյալներով՝ ծխողների 94.1%-ն օգտագործում են գործարանային արտադրության ծխախոտ: Ամեն օր ծխող ռեսպոնդենտներն օրական միջինում ծխում են 24.4 գլանակ:

Գործարանային արտադրության ծխախոտի ձեռք բերման համար ամսական միջին ծախսը կազմում է 15 460 դրամ: Այսինքն, յուրաքանչյուր ծխող իր առողջությունը վատթարեցնելու նպատակով տարեկան ծախսում է 185 520 դրամ:

Գործարանային արտադրության գլանակների 100 տուփի վրա կատարված ծախսը՝ մեկ մարդու հաշվով, ՀՆԱ տոկոսը  կազմում է 2.5: