Ձեր վստահելի աղբյուրը

«Շիրակի պետական համալսարանի ռեկտոր Սահակ Մինասյանի դեմ սկսվել է 8 ամիս առաջ»,- այսօր լրագրողների հետ հանդիպմանն ասաց ՇՊՀ-ի նախկին դասախոս Գագիկ Համբարյանն, ով աշախատնքից ազատվել է մարտից։

Նախկին դասախոսի խոսքով՝  ռեկտորի անօրինականությունները սկսում են բուհի կանոնադրության կոպտագույն խախտումներով, վերջանում՝ գնումների հետ կապված տարատեսակ անօրիանականություններով։

«Դահլիճի շինարարություն, վերանորոգում, տարատեսակ, գնումներ, այս ոլորտներում են եղել ամենաշատ անօրինականությունները։ Սակայն Շիրակի մայր բուհը շատ այլ խնդիրներ է ունեցել, որոնք չեն լուծվել։ Նախկին ռեկտորից հետո բուհի բյուջեում եղել է շուրջ 500 մլն դրամ, սակայն այսօր բուհն ունի բյուջեի ճեղքված։ Եվ բացի սրանից՝ պարոն Մինասյանն ընդհանրապես չի հասկանում բարձրագույն կրթությունից։ Ռեկտորի անօրինականություններից մեկն էլ այն էր, որ ուսումնական տարին սկսելուց երեք ամիս անց՝ նա բուհից վտարեց յոթ տղա ուսանողի,որոնք օգտվում էին տարկետման իրավունքից»,- մանրամասնեց Գագիկ Համբարյանը։

Նույն բուհի նախկին դասախոս Հովհաննես Խորիկյանն էլ նշեց, որ աշխատանքից ազատվել է մարտի 15-ին։

«Մենք գործ ունենք հակակրթական, հակագիտական մի անձնավորության հետ, որի համար ամենակարևորը սեփական շահն է, և ամեն անգամ երբ բարձրաձայնում ենք փաստարկված խնդիրներ, ռեկտորը սա փորձում է ներկայացնել որպես աթոռակռիվ, և իր հանցագործությունները դարձնել միջանձնային հարաբերությունների խնդիր։ Մենք որպես մարդ նրա հետ ոչ մի խնդիր չունենք, մեր բողոքները կապված են ռեկտոր Մինասյանի հետ։ Մենք ամեն անգամ իրավապահ մարմինների ուշադրությունն ենք հրավիրել այս հանցագործությունների հետ կապված, բայց ոչ մի արձագանք չի եղել։ Մարզի դատախազն անընդհատ ասում էր, որ իրենց ուսումնասիրությունները շարունակվում են, բայց դրանց վերաբերյալ ոչ մի հրապարակում չի եղել»,- ներկայացրեց նախկին դասախոսը։

ՇՊՀ-ի նախկին պրոռեկտոր Անահիտ Ֆարմանյանը, ով 28 տարի աշխատել է բուհում և ազատվել է մայիսի 3-ին, ասաց. «Պարոն Մինասյանին է տրվել կայուն բյուջեով հավատարմագրված ու երկարաժամկետ ռազմավարական ծրագրով, բարեփոխումների գործաղությունների պլանով բուհ, բայց այսօր բուհը կանգնած է լրջագույն խնդիրների առջև»։

Նա շեշտեց, որ ՇՀՊ-ն այսօր գտնվում է օրհասական վիճակում. «Հնարավոր և անհնար բոլոր միջոցներով բարձրաձայնվել է բուհի խնդիրների մասին, սակայն ոչինչ չի փոխվել, հակառակը, մեր լավագույն ուսանողներն են սկսում հեռանալ բուհից»։

Հանդիպմանը ներկա Երևանի ավագանու «Ելք» խմբակցության անդամ, կրթության փորձագետ Անահիտ Բախշյանն էլ Շիրակի պետական համալսարանի վիճակի թիվ մեկ պատասխանատուն համարեց ԱԺ պատգամավոր, բուհի կառավարման խորհրդի նախագահ Ֆելիքս Ցոլակյանին։

«Այն բոլոր փաստաթղթերը, որով անօրինականություններ են արվել, առանց նրա ստորագրության չէին կարող լինել, հետևաբար թիվ մեկ պատասխանատուն ինքն է։ էլ չեմ ասում Շիրակի մարզի դատախազ և ոստիկանություն, որոնք հասկանալի չէ, թե ինչ են արել»,- ասաց  Բախշյանը՝ շեշտելով, որ բուհում համատարած մաքրություն պետք է կազմակերպվի։

Անահիտ Ֆարմանյանը հավելեց, որ այս խնդիրը կհանգուցալուծվի միայն այն ժամանակ, երբ նոր կրթության նախարար նշանակվի, ով էլ պետք է անհապաղ ՇՊՀ ռեկտորին հրաժարականի պահանջ ներկայացնի։