Ձեր վստահելի աղբյուրը

Երևանի քաղաքապետ Տարոն Մարգարյանի հրաժարականի պահանջով բողոքի ակցիա իրականացնող ցուցարարների ու անհայտ անձանց միջև երեկ երեկոյան միջադեպ է գրանցվել։ Ըստ սոցկայքերում շրջանառվող տեղեկությունների՝ մայիսի 10-ին 20։00-ին 17JO... պետհամարանիշի սպիտակ գույնի Նիվա շեվրոլետ տեսակի ավտոմեքենայից մի խումբ մարդիկ իջել են և ծեծել ցուցարարներին։

Panorama.am-ը դիմեց Ոստիկանություն՝ կատարվածի մանրամասները պարզելու համար։

Ոստիկանության հասարակայնության հետ կապերի և լրատվության վարչությունից տեղեկացրեցին, որ մայիսի 10-ին՝ 21։10-ի սահմաններում, ահազանգ է ստացվել, որ Բաղրամյան պողոտայի SAS սուպերմարկետից ներքև ոստիկանի կարիք կա, 5 րոպե անց հաջորդ ահազանգ են ստացել՝ քաղաքացուց, որ նույն տեղում աղբամաններով փակել են ճանապարհը և ցուցարարները թույլ չեն տալիս իրենց տուն գնալ։

Մեկնած խումբը պարզել է, որ «Բաղրամյան պողոտա 75 հասցեի մոտ անցկացված բողոքի ակցիայի ընթացքում անհայտ անձը մոտեցել է ակցիայի մասնակիցներին, դիտավորյալ կոտրել մասնակիցներից մեկի բարձրախոսը՝ պատճառելով նյութական վնաս, հետո նրան հարվածել է՝ պատճառելով ֆիզիկական ցավ, ապա ձեռքով հարվածել է մյուս մասնակցի դեմքին՝ պատճառելով ցավ, որից հետո հեռացել է մեքենայով»։

Նշված մեքենան հայտնաբերված է, վարորդը այս պահին որոնվում է։

Տուժող քաղաքացուց հաղորդում է ընդունվել, հանգամանքները պարզվում են, կատարվում է հետաքննություն։

Միջադեպին իր ֆեյսբուքյան էջում անդրադարձել է նաև Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը։

«Քիչ առաջ որոշ կայքեր և սոցիալական ցանցերի օգտատերեր հրապարակել են ահազանգ այն մասին, որ Բաղրամյան-Օրբելի փողոցների խաչմերուկում իբր թե Երևանի քաղաքապետի կողմնակիցների և ցուցարարների միջև ընդհարում է տեղի ունեցել։

Պաշտոնապես հայտարարում եմ, որ տվյալ միջադեպը որևէ առնչություն չունի ո՛չ Երևանի քաղաքապետարանի և ո՛չ էլ Երևանի քաղաքապետի հետ, տվյալ ավտոմեքենան էլ որևէ կապ չունի Երևանի քաղաքապետարանի հետ: Մենք մշտապես դատապարտել ենք նմանատիպ երևույթները և կոչ ենք անում չտրվել սադրանքների և զերծ մնալ չճշտված տեղեկություններ տարածելուց»,- նշել է նա։