Ձեր վստահելի աղբյուրը

Եվրոպայի խորհրդի խորհրդարանական վեհաժողովում կոռուպցիայի դեմ պայքարը տալիս է իր առաջին առարկայական արդյունքները: ԵԽԽՎ 4 պատգամավորների նկատմամբ սկսվել են կիրառվել պատժամիջոցներ՝ ապրիլի 22-ին  ԵԽԽՎ-ի կողմից ստեղծված Արտաքին հետաքննության մարմնի զեկույցի հրապարակումից հետո , որում ներկայացվում էր, թե ինչպես է Ադրբեջանը տարիներ շարունակ  ԵԽԽՎ-ում իրականացրել լոբբիստական աշխատանքներ, կանխիկ գումարով կաշառել պատգամավորներին՝ ԵԽԽՎ-ում Ադրբեջանի նկատմամբ քննադատությունը մեղմելու կամ հօգուտ Ադրբեջանի գործունեությունը խթանելու համար:

Այսպես, մայիսի 15-ին Փարիզում կայացած ԵԽԽՎ Կանոնակարգի հանձնաժողովի նիստի ժամանակ սանկցիաներ են կիրառվել Արտաքին հետաքննության մարմնի զեկույցում ներառված 4 պատգամավորների նկատմամբ:

ԵԽԽՎ-ում Գերմանիայի պատվիրակության անդամ Ֆրենկ Շվաբեն թվիթերում գրել է.«ԵԽԽՎ Կանոնակարգի հանձնաժողովը ուժեղ ազդակ է ուղարկում կոռուպցիայի դեմ պայքարում»:

Շվաբեն տեղեկացրել է, հանձնաժողովը պատժամիջոցներ է սահմանել ԵԽԽՎ անդամներ Պեդրո Ագրամունտի, Խորդի Շուքլայի, Սեզար Ֆլորին Պրեդայի ու ԵԽԽՎ-ում Ադրբեջանի պատվիրակության ղեկավար Սամադ Սեիդովի նկատմամբ:

Նշվում է, որ ԵԽԽՎ այս 4 անդամները զրկվել են ԵԽԽՎ անդամի հիմնական իրավունքներից՝ ներառյալ քվեարկության, բանաձևերի նախաձեռնման իրավունքը: Ագրամունտն այս իրավունքներից զրկվել է 10 տարով ու չի կարողանա լինել նաև ոչ մի դիտորդական առաքելության մեջ ու նաև չի կարող լինել զեկուցող: Այս սանկցիաները մյուս 3 անդամների նկատմամբ սահմանվել է 2 տարի ժամկետով:

Սպասվում է, որ այսօր կհրապարակվի պաշտոնական տեղեկատվություն, որը հնարավոր է ներառի նաև այլ պատժամիջոցներ:

Հիշեցնենք նաև, որ զեկույցի հրապարակումից հետո ԵԽԽՎ Բյուրոն որոշում էր կայացրել, որ զեկույցում ընդգրկված բոլոր նախկին ու ներկա պատգամավորների գործերը պետք է քննվեն առանձին-առանձին ու նրանց նկատմամբ կիրառվի անհատական պատժամիջոցներ: