Ձեր վստահելի աղբյուրը

«Իմ քաղաքապետը Տարոնն է», «Տարոն Մարգարյան մնա քաղաքապետ» գրություններով պաստառներով ակցիայի մասնակիցների հետ քիչ առաջ  հանդիպման դուրս եկավ Երևանի  քաղաքապետ Տարոն Մարգարյանը: Նրան դիմավորեցին ծափահարություններով ու բացականչություններով:

Քաղաքապետը շնորհակալություն հայտնեց իր աջակիցներին քաղաքապետարան գալու ու ակցիա կազմակերպելու համար:

«Ձեր խոսքը լսելի է, հասանելի է, շնորհակալ եմ: Խնդրում եմ՝ հիմա միացեք ձեր ընտանիքներին, լավ օր եմ մաղթում բոլորիդ, շնորհակալ եմ, որ եկել եք ու պաշտպանում եք ձեր քաղաքապետին: Ես միշտ եղել եմ ձեր կողքին, մենք միասին ենք կառուցելու Երևան քաղաքը, շենացնելու մեր Երևանը»,-ասաց քաղաքապետ Տարոն Մարգարյանը:

Լրագրողների հարցին ի պատասխան, թե ինչու ավելի վաղ չի եկել, երբ ցուցարարները պահանջում էին իր հրաժարականը, Տ. Մարգարյանն ասաց, որ աշխատանքային այցով Երևան քաղաքի վարչական շրջաններից մեկում էր:  Գիտի բարձրաձայնած խնդիրների, դժգոհությունների մասին:

«Ես հարգում եմ մեր երևանցիների խոսքը, միշտ լսել ենք նրանց, անպայման հաշվի ենք առնելու խնդիրները»,-ասաց նա:

Նա ասաց դատապարտում է ակտիվիստների գործողությունները. «Հստակ երևում է, որ անօրինականություն է եղել, ակտիվիստները ներխուժել են քաղաքապետարանի շենք, փորձել ենք աշխատանքների բնականոն հունը խանգարել: Ես կոչ եմ անում իրավապահ մարմիններին, որ զբաղվեն այս խնդրով: Նման անօրինականությունները մենք չենք հանդուրժի»:

Ինչ վերաբերում է այգում կատարված աշխատանքներին, ապա քաղաքապետն ասաց, որ դա դեռ տարիներ առաջ տրված էր վարձակալության, շնորհակալություն հայտնեց վարձակալած Վարդանյանների ընտանիքին, որ այն վերադարձվել է համայնքին:

«Մենք խնդրել ենք, որ այսօր լրատվամիջոցներին ներկայացվի այգու բարեկարգման ողջ ծրագիրը, որպեսզի երևա, թե Վարդանյանների ընտանիքն ինչ բարեգործություն է անում: Ուզում եմ վստահեցնել, որ այգու տարածքում սրճարանների համար հատկացումներ չեն արվելու»,-նշեց նա, հավելելով,  որ այդ տարածքում կանաչ տարածքի ավելացում է լինելու:

Մարգարյանին հիշեցրեցին, որ իր հրաժարականն են պահանջում, նա արձագանքեց՝  ամբողջ աշխարհում նման փորձ չկա, երբ իշխանության եկած ուժը փորձի ճնշել ընտրված ՏԻՄ ղեկավարին: