Ձեր վստահելի աղբյուրը

Օսկարակիր դերասանուհի Մերիլ Սթրիփը նկարահանվելու է ռեժիսոր Սթիվեն Սոդերբերգի՝ «Պանամական թղթեր» անունով հայտնի դարձած օֆշորային գործարքների հիման վրա նկարահանվող ֆիլմում, որը կոչվելու է «Լվացքատուն»՝ «The Laundromat»:

Hollywood Reporter-ի հաղորդմամբ, օսկարակիր դերասանուհու հետ ֆիլմում, ամենայն հավանականությամբ, հանդես են գալու համաշխարհային աստղեր Գերի Օլդմենն ու Անտոնիո Բանդերասը, որոնց հետ ընթանում են բանակցություններ:

Հիշեցնենք, որ «Պանամական թղթեր» անունը ստացած սկանդալով հայտնի դարձան բազմաթիվ մարդկանց՝ այդ թվում քաղաքական գործիչների, երկրների ղեկավարների օֆշորային ֆինանսական կազմակերպությունների, նրանց իրականացրած խարդախությունների, հարկերից խուսափելու մասին:

Ֆիլմը նկարահանվելու է լրագրող Ջեյք Բերնշտեյնի «Գաղտնի աշխարհ» գրքի հիման վրա: Գրքում հեղինակը մանրամասն պատմում է, թե ինչպես են տարբեր երկրների հարուստ և ազդեցիկ մարդիկ  օգտվել պանամական  Mossack Fonseca իրավաբանական  ֆիրմայի ծառայություններից:

Հիշեցնենք, որ «The Guardian» պարբերականի կողմից անցկացված լրագրողական հետաքննությունը սկանդալային բացահայտումներ էր արել Ադրբեջանի ղեկավարության կողմից եվրոպացիներին կաշառելու վերաբերյալ, որն էլ հայտնի դարձավ «The Laundromat» անունով կամ «Ադրբեջանական լվացքատուն»: