Ձեր վստահելի աղբյուրը

13:35
Մեղադրող դատախազը նշեց, որ խափանման միջոցների օրինականությունն ու հիմնավորվածությունը փաստվել է մինչդատական վարույթի ընթացքում և դատական քննության փուլում` մի շարք օրինական որոշումներով: Նրա գնահատմամբ` միջնորդության հիմնավորումները որևէ իրավական հենք չունեն, ուստի մեղադրանքի կողմը կարծում է, որ ենթակա են մերժման:

Դահլիճից դատական նիստին հետևողները որոշեցին բոյկոտել դատախազի ելույթը- բարձր աղմկելով:

Դատարանը հեռացավ խորհրդակցական սենյակ: Որոշումը կհրապարակվի 16:00-ին:

12:58
Խափանման միջոցը փոխելու վերաբերյալ միջնորդությանը միացան բոլոր պաշտպանները:

Պավել Մանուկյանը նշեց, որ անհիմն է կարծել, թե ազատության մեջ հայտնվելով` ինքը կարող է փախուստի դիմել:

Նա ասաց. «Ես իմ ժողովրդին եմ նվիրել իմ ժպիտից, որ նա ժպտա, նվիրել եմ իմ ոտքից, որ նա երբեք չկաղա»:

Մանուկյանը նշեց, որ իր պաշտպանը խափանման միջոցը փոխելու միջնորդությունը ներկայացնելիս պատահական չէ, որ գրավի մասին չխոսեց, քանի որ ինքը չի կարող անհրաժեշտ գումարը վճարել: Նաև հավելեց`  կալանավայից դուրս կգա վերջում` միայն իր ընկերներից հետո:

11։56
Պաշտպան Արայիկ Պապիկյանը հանդես եկավ միջնորդությամբ՝ Վարուժան Ավետիսյանի ու Արայիկ Խանդոյանի նկատմամբ ընտրված խափանման միջոց՝ կալանավորումը փոխելու մասին: Դատավորը հայտնեց, որ այդ հարցին նախկինում էլ են անդրադարձել, ապա խնդրեց նշել՝ ինչ իրավական հիմք է փոխվել՝ հարցը կրկին քննարկելու համար: Պապիկյանն արձագանքեց, որ մինչ այժմ որևէ դատավոր այդ միջնորդությունը չի քննել:

Փաստաբան Լուսինե Սահակյանը ևս միացավ խափանման միջոցը վերացնելու վերաբերյալ միջնորդությանը: Նա իր միջնորդությունը հիմնավորեց նշելով, որ վերացել է ռիսկը, այլևս հիմք չկա մտածելու, թե Սասնա ծռերը պայքարելու են արդեն նախկին իշխանության դեմ:

11։39
Երևանի ընդհանուր իրավասության դատարանի Շենգավիթ նստավայրում մայիսի 16-ին մեկուկես ամիս ընդհատումից հետո շարունակվեց ՊՊԾ գնդի գրավման գործով 10 ամբաստանյալների դատական նիստը: Նիստի մեկնարկին նախագահող դատավոր Մեսրոպ Մակյանը նշեց, որ դատական նիստերը հիմնականում չեն կայացել ճանապարհների փակ լինելու հետևանքով:

Պաշտպան Արայիկ Պապիկյանը հիշեցրեց, որ նախորդ՝ չկայացած դատական նիստի ժամանակ հայտարարությամբ է հանդես եկել, դատարանն արձանագրել է, որ դա միջնորդություն է և խոստացել անդրադառնալ դրան:

Սասնա Ծռեր խմբի անդամ, ամբաստանյալ  Վարուժան Ավետիսյանը դիմում է ներկայացրել, որում նշել է՝ ցանկանում է խոսքի ազատության իր իրավունքից օգտվել և մինչև մայիսի 22-ը աշխատանքային որևէ օր Արմավիր ՔԿՀ-ում մամուլի ասուլիս կազմակերպել: Նա խնդրել է դրա մասին իրեն առնվազն մեկ օր առաջ տեղեկացնել:

Սակայն հաշվի առնելով, որ տեսակցությունների և ԶԼՄ-ների հետ հանդիպման սահմանափակում կա, վերացվել է միայն մերձավոր ազգականների տեսակցելու արգելքը, նշվել է, որ այս հարցին հնարավոր է անդրադառնալ միայն վարույթ իրականացնող մարմնի կողմից այդ արգելանքը վերացնելուց հետո:

Հաշվի առնելով, որ այդ մարմինը դատարանն է, Պապիկյանը հանդես եկավ միջնորդությամբ՝ ակնկալելով Վարուժան Ավետիսյանի համար բարենպաստ ձևակերպում:

Դատավորը խոստացավ միջնորդությանը անդրադառնալ դատական նիստի ավարտին: Պահանջեց՝ մասնակիցների վերաբերյալ կոնկրետ տեղեկություններ տրամադրել: Պապիկյանն արձագանքեց՝ միջնորդությունը վերաբերում է ընդհանրապես սահմանափակումները վերացնելուն:

Պավել Մանուկյանը նշեց, որ նույն խնդրով քրեակատարողական վարչության պետին դիմել է նաև ինքը, սակայն իր դեպքում որևէ արձագանք չի եղել:

Վարուժան Ավետիսյանը միջնորդություն ներկայացրեց՝ դատական նիստերի դահլիճում ընդմիջման ժամին մամուլի ասուլիս կազմակերպելու մասին: Դատախազն արձագանքեց, որ նման ընթացակարգ գոյություն չունի:

Դատարանը միջնորդությունը համարեց անհիմն և մերժեց: