Ձեր վստահելի աղբյուրը

Գյումրիի քաղաքապետ Սամվել Բալասանյանը կշարունակի պաշտոնավարել:

Այսօր ավագանու նիստի օրակարգում ընդգրկված էր  գործող քաղաքապետին անվստահություն հայտնելու վերաբերյալ հարցը: Անվստահություն հայտնած ավագանու 13 անդամներից 10-ը «Բալասանյան» դաշինքի  անդամներն էին: Խմբակցությունը նաև քաղաքապետի թեկնածու էր առաջադրել՝ Տիգրան Հովհաննիսյանին:

Ավագանու մյուս խմբակցության ներկայացուցիչներն առաջարկեցին օրակարգից այդ հարցը հանել, քանի որ կեղծ է: «Գալա»-ից Լևոն Բարսեղյանն էլ նույնն առաջարկեց. «Առաջարկում եմ թարգը տալ, անտեղի տեղը էսքան մարդ խառնել իրար»:  Նա նիստը մասխարա է որակում: Ավագանու «Գալա» խմբակցության մեկ այլ անդամ Արմենուհի Վարդանյանի խոսքով էլ, սա կրկես է:

Քաղաքապետի թեկնածու առաջադրված, «Բալասանյան դաշինքի» անդամ Տիգրան Հովհաննիսյանն իր ելույթում  նշեց, որ կողմ է՝ Բալասանյանի շարունակի ղեկավարել Գյումրին, իրականացնի իր ծրագրերը: Կոչ արեց մյուսներին դեմ քվեարկել անվստահություն հայտնելու առաջարկին, ասաց՝ հարցերին չի պատասխանելու, դա իր իրավունքն է:

Նիստի վերջում ելույթ ունենալով, Ս. Բալասանյանը հայտարարեց, ուրախ կլինի եթե իրեն կանչեն ու պահանջեն, որ հրաժարական ներկայացնի:

«Բայց կափսոսամ իմ ծրագրերը, ո՞վ է տեսել 40 կմ մենակ քաղաքի մեջ ասֆալտ անեն, ո՞վ է նման բան լսել: Չգիտեմ, Երիտասարդական պալատ սարքեցի, հրապարակ ենք սարքելու, Շիրակ հյուրանոց ենք սարքում, Թումո կենտրոն, որ մի ծրագիրն ասեմ: Ինչի՞ եք քննադատում: Ես էդքան վատ մարդ եմ, որ քննադատում եք, գիշեր ցերեկ ձեզ համար աշխատում եմ: Ծառայողական մեքենա չունեմ, նույնիսկ բենզին չեմ լցնում, աշխատավարձ չեմ ստանում: Դրա համա՞ր եք քննադատում, 8 մլն եվրո մենակ իմ շնորհիվ մտավ քաղաք:  Բալասանյան Սամվելին որ կախեն հրապարակում, կուրախանա՞ք բոլորդ: Բա որ մի օր հրաժարական տա գնա, ո՞ւմ եք դնելու», -ասաց նա՝ ավելացնելով, որ սա ոչ թե կրկես  է, այլ քաղաքականություն, պետք էր թեկնածու առաջադրել, ոչ թե քննադատել ու վիրավորել:

Փակ գաղտնի քվեարկությամբ 18 դեմ արդյունքով, Սամվել Բալասանյանին անվստահություն հայտնելու առաջարկը մերժվեց: