Ձեր վստահելի աղբյուրը

«Ի տարբերություն նախորդ կառավարությունների, այս կառավարությունն ունի բավականաչափ սոցիալական մեծ կապիտալ, դա համագործակցությունն է, պատրաստակամությունը և փոխվստահությունը»,- այս մասին այսօր «Հայաստանի տնտեսական քաղաքականության մարտահրավերները» թեմայով քննարկման ժամանակ ասաց փորձագետ Արտակ Մանուկյանը։

«Օրինակ՝ հրեական ադամանդագործության մեջ սոցիալական կապիտալը հնարավորություն է ընձեռում, որ մարդիկ առանց պայմանագրեր կնքելու, վստահության հիման վրա մեծացնեն արտադրական  շղթան»,- նշեց նա: 

Անդրադառնալով նոր կառավարության անելիքներին՝ Արտակ Մանուկյանն ասաց, որ ճիշտ կլինի կիրառել հարկային համաներում. «Սա քայլ է, որ բիզնես սուբյեկտներին հնարավորություն է տալիս ինքնամաքրվելու»:

Նաև նշեց, որ այս օրերին նկատվում է գների նվազում՝ հատկապես պարենային ապրանքների շուկայում։

«Ստվերի դեմ պայքարը նաև բերելու է գների որոշակի աճի, սակայն մրցակցության բարձրացման պայմաններում գները կնվազեն»,- ասաց նա:

Արտակ Մանուկյանի խոսքով՝ ներկայիս կառավարության ամենադժվար քայլը լինելու է տնտեսության ռազմավարության մշակումը,  քանի որ ակնհայտ է՝ ռազմավարության փոփոխությունը հնարավոր չի իրականացնել կարճ ժամկետում:

Հաջորդ խնդիրը, ըստ նրա, մարդկային կապիտալի զարգացումն է, քանի որ առանց դրա հնարավոր չէ ունենալ մրցունակ տնտեսություն. «Կառավարութան  թիվ մեկ խնդիրը  պետք է լինի երկրի մրցունակության բարձրացումը»:

Արտակ Մանուկյանը հատկապես կարևորեց երեք ոլորտ՝ կրթություն, գիտություն և առողջապահություն, որտեղ պետք է մրցակցությունը բարձրացնել։ Ըստ նրա՝ այս ոլորտներում պետք է առաջանցիկ տեմպերով ավելացնել ծախսերն ու եկամուտները։

«Շատ է խոսվում հակակոռուպցիոն միջոցառումների մասին: Այո, դրանք անհրաժեշտ, բայց ոչ բավարար պայման են։ Ենթադրենք կրթության ու գիտության ոլոտում չկա կոռուպցիա, բայց  եթե աշխատավարձը ցածր է, դու այդ ոլորտում երբեք չես ունենա պրոֆեսիոնալ մասնագետ: Այսինքն՝ եղած հնարավորություններով չես կարող կրթության որակը բարձրացնել», - ասաց տնտեսագետը։

Նույն խնդիրն, ըստ նրա, կա նաև պետական հատվածում: Երիտասարդների համար այն գրավիչ չէ, ուստի պետք է այստեղ էլ վարքագիծը փոխել: