Ձեր վստահելի աղբյուրը

Ըստ ՏԻՄ օրենքի՝ համայնքի ավագանին իրավասու է ձայների մեծամասնությամբ համայնքի ղեկավարին զրկել զբաղեցրած պաշտոնից: Երևանը փոթորկվում է Տարոն Մարգարյանի հրաժարականը պահանջելով, իսկ ավագանին իր ուղիղ պարտականություններից խուսափում է:

Համենայն դեպս՝ որևէ հայտարարություն ավագանու կողմից չի հնչեցվել: Տպավորություն է, որ ավագանու անդամները խնդիրը քննարկելու փոխարեն, գնում են հեշտ ճանապարհով՝ թող բողոքեն, կերևա...:

Իրավիճակի մասին հարցերով Panorama.am-ը խոսեց  Երևանի ավագանու «ԵԼՔ» խմբակցության ղեկավար Դավիթ Խաժակյանի հետ։

Նա նշեց, որ Երևանի մասին ՏԻՄ օրենքն ասում է, որ քաղաքապետին անվստահություն հնարավոր է հայտնել տարին մեկ անգամ՝ նրա լիազորությունը ստանձնելուց հետո մեկ տարի անց։

«Դեռևս այս գումարման ընթացքում Երևանի քաղաքապետ Տարոն Մարգարյանի մեկ տարին չի լրացել, այն լրանում է հունիսի 8-ին»,- ասաց ավագանու անդամը։

Խաժակյանից հետաքրքրվեցինք, թե լրանալուց հետո ի՞նչ որոշում է կայացնելու խմբակցությունը, ինչին ի պատասխան ասաց. «Երբ այն հնարավորությունը ստեղծվի, մենք կգնահատենք ներկա քաղաքական իրադրությունը, և գնահատականը, և մեր որոշումը կներկայացնենք։ Բայց հասկանալի է, որ այս ընթացքում եթե մենք ունենայինք այդ հնարավորությունը, բոլորին այլ կերպ կդասավորվեին հանգամանքները»։

Նշենք, որ Երևանի ավագանին  կազմված է 65 անդամից, իսկ անվստահություն հայտնելու համար անհրաժեշտ է 21 ավագանու ստորագրություն, իսկ քաղաքապետին պաշտոնից հեռացնելու որոշումը կայացվում է ավագանու ձայների մեծամասնությամբ:

Ստորև ներկայացնում ենք «Երևան քաղաքում տեղական ինքնակառավարման մասին» ՀՀ օրենքի 40 հոդվածում ամրագրված է.

1. Ավագանու անդամների ընդհանուր թվի առնվազն 1/3-ը կարող է ներկայացնել քաղաքապետին անվստահություն հայտնելու որոշման նախագիծ: Որոշման նախագիծը ներառում է ավագանու այն անդամի անուն-ազգանունը, որին նախաձեռնող խումբն առաջադրում է որպես քաղաքապետի թեկնածու, ինչպես նաև այն պետք է ստորագրեն նախաձեռնող խմբի բոլոր անդամները:
2. Քաղաքապետին անվստահություն հայտնելու վերաբերյալ որոշման նախագիծը հանձնվում է քաղաքապետին, ինչպես նաև ավագանու խմբակցություններին: Ավագանու խմբակցություններն այդ մասին անհապաղ տեղեկացնում են իրենց խմբակցությունների անդամներին:
3. Քաղաքապետին անվստահություն հայտնելու մասին որոշման նախագիծը ներկայացվելուց հետո` 36 ժամվա ընթացքում, նախաձեռնող խմբի մեջ չմտնող ավագանու անդամների ընդհանուր թվի առնվազն մեկ երրորդը կարող է ևս ներկայացնել քաղաքապետին անվստահություն հայտնելու վերաբերյալ որոշման նախագիծ` առաջադրելով քաղաքապետի այլ թեկնածու:
4. Քաղաքապետին անվստահություն հայտնելու մասին որոշման նախագիծը ներկայացնելուց հետո` երրորդ աշխատանքային օրը` ժամը 10.00-ին, օրենքի ուժով հրավիրվում է ավագանու նիստ, որում գաղտնի քվեարկությամբ որոշվում է քաղաքապետին անվստահություն հայտնելու հարցը:
5. Քվեարկությունն անցկացվում է գաղտնի` քվեաթերթիկների միջոցով, որում ընդգրկվում է քաղաքապետին անվստահություն հայտնելու մասին որոշման նախագծով առաջադրված թեկնածուն, իսկ եթե այդպիսի նախագծերը երկուսն են, ապա երկու թեկնածուները: Ավագանու յուրաքանչյուր անդամ ունի մեկ ձայնի իրավունք:
6. Քաղաքապետին անվստահություն է հայտնվում, եթե առաջադրված թեկնածուն (թեկնածուներից մեկը) ստանում է ավագանու անդամների ընդհանուր թվի ձայների մեծամասնությունը:
7. Գործող քաղաքապետը սույն հոդվածի 6-րդ մասով սահմանված դեպքում վայր է դնում իր լիազորությունները, իսկ նորընտիր քաղաքապետն իր լիազորությունները ստանձնում է մեկշաբաթյա ժամկետում՝ սույն օրենքի 47-րդ հոդվածով սահմանված կարգով:
8. Քաղաքապետին անվստահություն հայտնելու մասին որոշման նախագիծ ներկայացնելու նախաձեռնություն կարող է ցուցաբերվել քաղաքապետի լիազորություններն ստանձնելուց եւ անվստահության հարցը քննարկելուց ոչ շուտ, քան մեկ տարի հետո:
9. Քաղաքապետին անվստահություն հայտնելու առաջարկություն չի կարող ներկայացվել ռազմական կամ արտակարգ դրության ժամանակ: