Ձեր վստահելի աղբյուրը

Ազգային անվտանգության ծառայության ղեկավար Արթուր Վանեցյանի տպավորությամբ իր նշանակումը համակարգում ոգևորությամբ է ընդունվել։

«Համակարգում նշանակումս, իմ գնահատմամբ, ընդունվել է լավ ու ոգևորությամբ։ Տպավորություն կար, որ դրսից մարդ պետք է նշանակեին, իսկ ԱԱԾ-ն այն կառույցն է, որը չի ընդունում դրսից մարդ։ Նշանակվեց մարդ, որը վերջին 20 տարին աշխատում է համակարգում»,-Aysor.am-ի փոխանցմամբ, հայտարարել է Վանեցյանը։

Նրա խոսքով,  երկար տարիներ լինելով համակարգում՝ շատ լավ գիտի կառույցի առանձնահատկությունները.  «Անձամբ ճանաչում եմ գրեթե բոլորին»:

Անդրադառնալով առաջիկա անելիքներին՝  ԱԱԾ պետը նշել է, որ վարչապետի հանձնարարությամբ ծառայությունում կառուցվածքային փոփոխություններ են կատարվելու:

«Կառուցվածքը պահպանում է խորհրդային տարիների կառուցվածքը, հիմա պետք է փոխել, որ այսօրվա պահանջներին համահունչ ու արդյունավետ լուծում տանք»,-հայտարարել է նա։

Ծառայությունն այժմ ակտիվ աշխատանք է իրականացնում կոռուպցիայի դեմ պայքարում:

«Ավանդական կոռումպացված հիմնարկները ամբողջությամբ դադարեցրել են հակաօրինական գործունեությունները»,-հայտարարել է նա՝ մատնանշելով «մաքսային, հարկային, դատական, ոստիկանության որոշ ծառայություններ»։

Նրա խոսքով, Հայաստանում նախկինում կատարված հանցագործությունների գործող կոռուպցիոն շղթաների հայտնաբերման գործողություններ են իրականացնում.  «Շուտով կբացահայտնվեն խոշոր հարստացած մարդիկ, որոնք գործել են կոռուպցիոն սխեմաներով»:

ԱԱԾ ղեկավարը, ներկայացնելով մանրամասներ, ասել է, որ այդ սխեմաների շրջանակում որոշները պետությունից գումար են գողացել տարիներ շարունակ ու ապօրինի հարստացել են։

«Պետք է գտնենք լուծումներ, որ գումարը հետ վերադարձնեն ոչ թե գնան, բանտ նստեն, քանի որ դա հարցի լուծում չէ: Հայաստանում 350 մարդ կա, որոնք տեղյակ չեն, որ խոշոր գործարարությամբ են զբաղվում ու հարկեր չեն մուծում։ Իրանց անձնագրերը վերցրել են ու բիզնես են գրանցել։ Մինչև ամսվա վերջ կունենանք ամբողջական պատկեր»,-նշել է նա:

ԱԱԾ ղեկավարը նաև մտահոգություն է հայտնել պետական մարմիների շենքերից ուղիղ եթերների հեռարձակումների առնչությամբ։

«Կան իրավիճակներ, որոնք կարող են սպառնալիք լինել ազգային անվտանգությանը։ Մենք պետք է քննարկենք մեր գործընկերների հետ, որ գտնենք ճիշտ լուծումներ»,- ասել է Արթուր Վանեցյանը:

ԱԱԾ ղեկավարի հանդիպումից այլ մանրամասներ՝ սկզբնաղբյուր կայքում: