Չի եղել դեպք, որ հայ գիտնականները պարտվեն. Արեգ Միքայելյան
Հայաստանի պատմության գրեթե բոլոր փուլերում, երբ կարևոր հարցեր են եղել, Բյուրականի աստղադիտարանը եղել է առաջամարտիկ: Մայիսի 21-ին լրագրողների հետ հանդիպմանը ՀՀ ԳԱԱ Վիկտոր Համբարձումյանի անվան Բյուրականի աստղադիտարանի տնօրեն Արեգ Միքայելյանը նշեց, որ խորհրդային շրջանում ցեղասպանության մասին չէին բարձրաձայնում, բոլորը վախենում էին, միայն աստղաֆիզիկոս Վիկտոր Համբարձումյանն էր, որ համարձակություն ունեցավ «ցեղասպանություն» կամ «Եղեռն» տերմինները կիրառելու:
Նա նաև ասաց, որ աստղադիտարանն առաջնագծում էր նաև ԼՂ շարժման ժամանակ. շարժման առաջնորդները մի քանի անգամ թաքնվել են Բյուրականի աստղադիտարանում: Միքայելյանն ընդգծեց՝ հայ գիտնականն անպարտելի է, եթե այլ բնագավառներում, օրինակ՝ սպորտի ոլորտում մարզիկները երբեմն նաև պարտություն են կրում, ապա գիտնականները չի եղել դեպք, որ պարտվեն: Հայաստանի մասին, ըստ բանախոսի, գիտաժողովներից մեկի ժամանակ ասել են՝ «Փոքր երկիր՝ մեծ գիտություն»:
«Շատերը Հայաստանի տեղն էլ չգիտեն, մենք պետք է չերևակայենք, թե մեզ բոլորը ճանաչում են: Գիտության դերը մեր հասարակության մեջ պատշաճ մակարդակի վրա չէ, այստեղ երկուստեք պետք է մեղադրել. գիտնականներն են համեմատաբար պասիվ, թեկուզ վերջին այս շարժման ժամանակ քիչ մարդիկ կային, որ որևէ խոսք, գրառում են արել: Բայց նրանք էլ բողոքում են, ասում են՝ մեզ հաշվի չեն առել: Փոխադարձ քայլերով կարելի է միայն այս հարցը լուծել»,- ասաց նա:
Միքայելյանը նշեց, որ Բյուրականի աստղադիտարանը միջազգային աստղագիտական միության կողմից ճանաչվել է Հարավարևմտյան և կենտրոնական Ասիայի աստղագիտական կենտրոն, այսինքն՝ Եվրոպայի սահմաններից Ասիա, այդ ամբողջի կենտրոնը Հայաստանն է: Սա միակ դեպքն է, միակ ոլորտը, երբ Հայաստանն ունի տարածաշրջանային կենտրոնի կարգավիճակ, և այն ճանաչել են Վրաստանը, Իրանն ու Թուրքիան: Բանախոսն ընդգծեց՝ Բյուրականը նաև ազգային արժեք է ներկայացնում. միջազգային մի շարք կազմակերպություններում ներկայացնում է Հայաստանը, դիտվում պատուհան դեպի Արևելք:
«Մենք ինտեգրվում ենք Եվրոպային, դառնում առաջատար»,- ասաց նա:
Լրահոս
Տեսանյութեր
Արցախի ղեկավարությունը Բաքվում է, որովհետև նրանք առաջնորդել են մեր քաղաքական պայքարը. Բեգլարյան
