Ձեր վստահելի աղբյուրը

Մարդու իրավունքների պաշտպանի համար 2017 թ. նշանավորվեց նրանով, որ ուժի մեջ մտավ Մարդու իրավունքների պաշտպանի համար սահմանադրական օրենքը, որը նախատեսեց աշխատանքի սկզբունքորեն նոր լուծումներ»,-  այսօր Ազգային ժողովում Մարդու իրավունքների պաշտպանի տարեկան հաղորդումը ներկայացնելիս ասաց  Արման Թաթոյանը։

Նա հայտնեց, որ 2017 թ. նախորդ տարվա համեմատ  1300-ով ավել դիմում-բողոքներ են ստացվել, իսկ 2015-2016 թթ. համեմատությամբ անցած տարի գրեթե երեք անգամ աճել է դրական լուծված գործերի թիվը:

«2017թ. արժևորվել է նաև 15 արտահերթ զեկույցներով, որից 15-ը հրապարակվել են, 2-ը՝ կհրապարակվեն առաջիկայում: Տարին նշանավորվեց նաև ընտրություններով: Ընտրական իրավունքի պաշտպանությունն իմ գործունեության հիմնարար ուղղություններից է: Պաշտպանի աշխատակազմի կողմից ընտրական գործընթացների դիտարկման արդյունքներով 2017թ. արձանագրվել են մտահոգիչ տեղեկություններ ու դեպքեր ընտրակաշառքի բաժանման, վարչական ռեսուրսի չարաշահման վերաբերյալ: Եղել են լրագրողների աշխատանքը խոչընդոտելու դեպքեր: Արձանագրվել են հանրային ծառայողների, դպրոցների աշխատակիցների վրա ճնշումներ գործադրելու, ընտրողներին վախեցնելու դեպքեր, առկա են եղել աշխատանքից հեռացնելու սպառնալիքի, հարկադրանքի միջոցով աշխատակիցների ընտրական իրավունքի իրացման վրա ներգործելու հրապարակումներ»,- մանրամասներ ներկայացրեց Արման Թաթոյանը:

Անդրադառնալով լրագրողների մասնագիտական գործունեությանը՝ օմբուդսմենն ասաց. «Լրագրողների մոտ պահպանվում է արդարացի ընկալում այն մասին, որ պատասխանատվության մեխանիզմի ոչ լիարժեք գործադրման պատճառով ստեղծվում է անպատժելիության տպավորություն և չի կանխարգելում նման ապօրինությունները: Երկրում պետք է ձևավորվի այնպիսի մթնոլորտ, որ լրագրողը զգա, որ պետության կողմից պաշտպանված է մասնագիտական աշխատանքի հանդեպ ցանկացած գործունեությունից»։

ԱԺ պատգամավոր Մարինա Մարգարյանը Թաթոյանին խնդրեց առանձնացնել այն երեք խոցելի ոլորտները, որտեղ ամենից շատ են ոտնահարվում մարդու իրավունքները:

«Առաջին ոլորտը, որը լուրջ մարտահրավեր է, սոցիալ-տնտեսական իրավունքն է, երկրորդը՝ ազատությունից զրկված անձանց իրավունքների պաշտպանության վիճակն ու երրորդը՝ երեխաների, հաշմանդամություն ունեցող անձանց իրավունքների պաշտպանությունը:
Յուրաքանչյուր խումբ առավել կարևոր է, քան նախորդը, դժվար է գնահատել: Սա պայմանական տարանջատում է»,- պատասխանեց նա:

Օմբուդսմենը նաև հավելեց, որ Լոռու և Տավուշի մարզերում ՄԻՊ գրասենյակներ ունենալու անհրաժեշտությունը և հույս հայտնեց, որ կառավարության հետ աշխատանքի արդյունքում գոնե երկու-երեք աշխատակից այդ մարզեր կուղարկվի: