Ձեր վստահելի աղբյուրը

ՀՀ նախագահի նստավայրի դիմաց «Ամուլսարն առանց հանքի»,  «Մենք ենք տեր մեր երկրի», «Ոչ հանքերին» պահանջով բողոքի ակցիա էր իրականացվում: Նրանք նշեցին, որ նամակ են բերել՝ հանձնելու ՀՀ նախագահի գրասենյակ:

«Եթե նախագահը դուրս գա, ավելի լավ»,-հայտարարեցին ակցիայի մասնակիցները:

Բողոքի մասնակիցների հետ հանդիպմանը դուրս եկավ ՀՀ նախագահ Արմեն Սարգսյանը: Մինչ նրա դուրս գալը ակցիայի մասնակիցները նամակն արդեն արկղի մեջ էին գցել, հույս հայտնեցին, որ հնարավորինս կարճ ժամանակում պատասխան կստանան:

Ա. Սարգսյանը նշեց, որ երկրում կարևոր շատ խնդիրներ կան, առանձնացրեք կարևորագույն մի քանիսը՝ անվտանգությունը, կրթությունը:

Անդրադառնալով նրանց կողմից բարձրաձայնած խնդրին, ասաց՝ հարցն ուսումնասիրության կարիք ունի: Նա մեկ անգամ էլ հայտարարեց, որևէ կապ չունի Ամուլսարի հանքի, «Լիդիան» ընկերության հետ:

«Երբեք չեմ ունեցել կապ, մի քանի ամիս եղել եմ տնօրենների խորհրդի անդամ»,-ասաց նա:

Արմեն Սարգսյանը ակցիայի մասնակիցների հետ նաև այլ հարցերի շուրջ խոսեց, օրինակ հիշեցրեց, որ վարկերի էֆեկտիվության համար պատասխանատու է ոչ թե բանկը, այլ վարկը վերցնողը:

«Եկեք ճիշտ հասկանանք՝ ներդումները պետք է քաջալերենք, բայց մեր արժանապատվությունը, պետականությունը չպետք է զոհենք: Բոլորիս համար մենք բոլորս պատասխանատու ենք նախագահից մինչև ով ուզես, այդ դեպքում երկիրը երկիր կդառնա»,-ասաց նախագահը:

Արմեն Սարգսյանի հետ զրույցից հետո ակտիվիստները նախագահին հրավիրեցին փողոցում իրենց հետ քոչարի պարելու: Նախագահը չմերժեց: