Ձեր վստահելի աղբյուրը

Մի շարք իրավախախտումներ կատարած վարորդների հինգ տարվա տուգանքների համաներման, Ճանապարհային երթևեկության կանոնների խախտումներով վարչական պատասխանատվության քաղաքականության փոփոխության ոչ դրական ընկալման պատճառը եղած անվստահությունն է: Մայիսի 24-ին Ոստիկանությունում կազմակերպված քննարկման ժամանակ այս մասին նշեց «Վարորդի ընկեր» հասարակական կազմակերպության համահիմնադիր Սերգեյ Ղահրամանյանը: Նա հորդորեց նմանատիպ քննարկումները պարբերական դարձնել, քանի որ շատ հարցեր կան քննարկելու:

«Կա անվստահություն, չնայած իրավիճակ է փոխվել: Ոստիկանությունը մեծ քայլ է անում՝ շատ խախտումներ կատարած վարորդներին ընդառաջ: Շատ տուգանքներ գուցե գնացել են տաքսու վարորդներին, հետաքրքիր է՝ քանի՞ վարորդի խախտումներից է գոյացել այդքան տուգանք»,- ասաց նա՝ նկատելով, որ այստեղ անարդարության ինչ-որ մաս կա: Ղահրամանյանը խոսեց նաև մեկ այլ հարցի մասին. նա նշեց, որ Կոտայքի մարզում ավելի շատ են վարորդական վկայականներ ստացել, քան Երևանում, այն դեպքում, երբ բնակչությամբ այդ մարզը զիջում է Երևանին:

Ոստիկանության պետի տեղակալ Հովհաննես Քոչարյանը նշեց, որ ծանոթ է այս փոփոխությունների շուրջ գնահատականներին, մի մասը ողջունում է դրանք, մի մասը՝ անարդարություն տեսնում:

Նա ընդգծեց՝ արդարության սկզբունքից դատելու դեպքում այդ համաներումը պետք չէ կիրառել, իսկ սոցիալական նկատառումներից ելնելով պետք է արդարության կոշտ չափանիշներով չդատել: «Սրանք այն գումարները չեն, որոնցից պետությունը զրկվելու է, մարդիկ են, որ սոցիալական ծանր վիճակի մեջ գտնվելով՝ չեն կարողացել վճարել: Եթե ի վիճակի լինեին՝ ԴԱՀԿ-ից այդ գումարները գանձած կլինեին: Մի մասի գույքը հետախուզման մեջ է, մի մասը իրենք են հետախուզման մեջ: Սա մարդկանց մեծագույն անհարմարություններ է պատճառելու: Եթե ամեն ինչ սկսում ենք նորից, սա էլ պետք է վերանայվի, այս համաներումն ուղղակի անհրաժեշտություն է»,- ասաց նա՝ հավելելով, որ ի վերջո, սա ոստիկանության որոշումը չէ: Համաներման առաջարկը ներկայացրել է Ոստիկանությունը, սակայն որոշում կայացնելու լիազորությունն իրենցը չէ:

«Վարորդի ընկեր» հկ նախագահ Տիգրան Քեյանը նկատեց, որ դատական ծախսերի խնդիր կա, որը պետք է լուծում ստանա, ինչին Քոչարյանն արձագանքեց, որ հարցի հասցեատերը Արդարադատության նախարարությունն է: Նա նշեց, որ կան մարդիկ, ովքեր տարաժամկետ էլ են վճարել, դրան ևս պետք է անդրադարձ արվի: Քոչարյանը տեղեկացրեց, որ այս նախագիծը վերջնական չէ, այն լրամշակվելու է:

Հարցին՝ ինչու են ներառվել մինչև 2017 թ. դեկտեմբերը, ոչ թե 2018-ի մայիսն արձանագրված խախտումների տուգանքները, Քոչարյանը նշեց, որ նախնական հաշվարկներով մինչև մայիսն էին ներառել, սակայն հաշվարկների արդյունքում հասկացան, որ դա համակարգը լուրջ խնդիրների առաջ է կանգնեցնելու:

Քոչարյանն անդրադարձավ նաև խախտումները կանխարգելելու միջոցառումներին, որոնք կարող են տուգանելուց արդյունավետ լինել: Նա ասաց, որ հասարակության գիտակցության բարձրացման ուղղությամբ արվող քայլերից են քարոզչությունը ԶԼՄ-ների միջոցով, քաղհասարակության ներկայացուցիչների հնարավորությունների օգտագործումը, այցելությունները կրթական հաստատություններ, իրավախախտում ծնող պատճառների վերացումն ու անվտանգության մշտական մոնիթորինգը:

Նա նաև տեղեկացրեց, որ ոստիկանությունը չի պատրաստվում հրաժարվել շարժական ու մեքենային ֆիքսված տեսանկարահանող սարքերից, իսկ ինչ վերաբերում է դրանց՝ անձի մասնավոր կյանքի տիրույթ ներխուժելուն, ապա Սահմանադրությունը նման լիազորություն տալիս է, եթե դա սահմանադրությամբ տրված լեգիտիմ նպատակներին է ուղղված, ինչպես այս դեպքում է: