Ձեր վստահելի աղբյուրը

ՀՀ ոստիկանությունը քննարկումներ է սկսել՝ ճանապարհային երթևեկության կանոնների խախտումներով վարչական պատասխանատվության քաղաքականության մեջ իրականացվող փոփոխությունների շուրջ: Մայիսի 24-ի քննարկման ժամանակ Ոստիկանության պետի տեղակալ Հովհաննես Քոչարյանը նշեց, որ առաջին անգամ փորձելու են պետական հարկադրանքի կամ պատասխանատվության կիրառման մեթոդներից զատ նաև համոզման մեթոդներ կիրառել և դրանք զուգակցել:

Քոչարյանը նշեց, որ մի շարք իրավախախտումներ կատարած վարորդներն ազատվել են պատասխանատվությունից, և նրանք պատահաբար չեն ընտրվել, եղել է վերլուծություն, հաշվի են առել մի շարք գործոններ, այդ թվում՝ երթևեկության վրա այդ խախտումների ազդեցության աստիճանը:

«Մենք էլ ունենք մտավախություն, որ դրանք կարող են որոշակի բացասական ազդեցություն թողնել հիմնականում երթևեկության կազմակերպման վրա, սակայն հույս ունենք, որ երթևեկության մասնակիցների ջանքերով այդ ազդեցությունը կլինի նվազագույնը»,- ասաց նա: Քոչարյանը հայտնեց, որ ճանապարհային ոստիկանությունն այսուհետ պրոֆիլակտիկ գործունեությամբ է զբաղվելու, առավելապես կառավարչական գործառույթներով:

Նա տեղեկացրեց, որ իրենք այսուհետ ևս ուշադրությամբ հետևելու են անվտանգության վիճակին, ամենօրյա մոնիթորինգ է իրականացվելու, արդյունքները լինելու են հրապարակային, ներկայացվելու են հասարակությանը, և եթե անհրաժեշտություն եղավ դրանք շտկելու, այդ շտկումները կկատարեն:

«Մենք լիահույս ենք, որ պետական հարկադրանքով հարց լուծելու գործիքն իրեն սպառել է, ճիշտ կլինի ապավինել երթևեկության մասնակիցների գիտակցությանը, հասարակական իրավագիտակցության սատարմանը»,- ասաց նա: Քոչարյանը նշեց, որ առավելապես գիտակից, քան պատասխանատվությունից վախեցող վարորդների կարիք կա: