Ձեր վստահելի աղբյուրը

Գործադիրի այսօրվա նիստում ՀՀ վարչապետ Նիկոլ Փաշինյանը ԳՆ Սննդամթերքի անվտանգության պետական ծառայության պետ Իշխան Կարապետյանից հետաքրքրվեց՝  մայիսի 10-ին և մայիսի 16-ին նամակներ է ստացել «Ռոսսելխոզնադզորի» կողմից, ինչո՞ւ ինքը տեղյակ չէ այդ նամակների մասին:

«Ինձ համար անակնկալ էր, որ ես տեղյակ չեմ այդ նամակներից: Պարոն Կարապետյան, ուզում եմ իմանալ այս նամակները ստանալուց հետո Ձեր կատարած գործողությունների մասին»,- դիմելով ՍԱՊԾ պետին՝ ասաց վարչապետը:

Իշխան Կարապետյանը նշեց, որ տարվա ընթացքում ստանում են բազմաթիվ նամակներ և իրենք էլ իրենց հերթին արձանագրված դեպքերի մասին բազմաթիվ  նամակներ են  ուղարկում գործընկերներին: «Տվյալ դեպքում աշխատանքային կարգով հարցը քննարկվել է մեր ռուս գործընկերների հետ»,- ասաց նա:

Նիկոլ Փաշինյանը հետաքրքրվեց՝ ո՞ւմ է զեկուցվել այդ խնդիրների մասին: «Ես վարչապետի պաշտոնն ստանձնելուց հետո զանգել եմ ձեզ և հարցրել, թե արդյոք խնդիրներ ունենք գյուղմթերքի արտահանման ոլորտում, Դուք ասել եք, որ խնդիր չկա: Դրանից հետո Դուք ստացել եք երկու նամակ: Իմանալով, որ ես անձամբ այդ հարցով հետաքրքրված եմ, բայց ո՞ւմ եք զեկուցել և ինչ գործողություն եք ձեռնարկել խնդիրը լուծելու համար: Գյուղատնտության նախարարին, փոխվարչապետերին, վարչապետին զեկուցե՞լ եք»:

Իշխան Կարապետյանը հայտնեց, որ աշխատանքային կարգով քննարկում են ունեցել, զրուցել է «Ռոսսելխոզնադզորի» ղեկավարի հետ: Նա նաև նշեց, որ փորձել է կապ հաստատել  առաջին փոխվարչապետ Արարատ Միրզոյանի հետ, բայց չի ստացվել և այդ պատճառով քննարկումներից հետո գործողություններ են իրականացրել:

Մասնավորապես,  իրականացվում է տեղական մթերքի ուժեղացված բացթողնման ռեժիմ, որի վերաբերյալ ծառայությունը տարածել է հայտարարություն, և դեպքը վերաբերել է մեկ ընկերությանը: Ըստ նրա՝  բարձրացվող հիմնական խնդիրները մակնշմանն են վերաբերում՝ արտահանվող կոնկրետ վայրին:

Սակայն Նիկոլ Փաշինյանը նշեց, որ նամակներում այլ բան է գրված՝ սանիտարական կանոնների պահպանման խնդիր, Իշխան Կարապետյանն էլ արձագանքեց, որ այդ նամակներում նշված է՝ տվյալ բեռում հայտնաբերվել է անհամապատասխանություն, բեռը հետ է ուղարկվել: Համապատասխան խմբաքանակն առանձնացնել է և հետ է վերադարձվել արտահանողին, իսկ մնացածը կրկին վերաարտահանվել է:

Նշենք, որ խոսքը վերաբերում է հայկական լոլիկի արտահանման ժամանակ ռուսական կողմի արգելքներին:

Վարչապետը հետաքրքրվեց, թե ո՞րն է այն մարմինը, որը կերաշխավորի՝  մեր երկրից գյուղմթերքը կարտահանվի սահմանված չափանիշներին խիստ համապատասխան, ինչին ՍԱՊԾ պետն արձագանքեց. «Շատ հաճախ, երբ մեր տնտեսվարողներն իրականացնում են արտահանում, չունենալով լոգիստիկ կարողություններ, համապատասխան փաթեթավորման հնարավորություններ, արտահանում են երկրորդային օգտագործման արկղերով, մակնշումն էլ հաճախ թերի են անում: Մենք համապատախան իրազեկում ենք իրականացրել տնտեսվարողների շրջանում և արդյունքում վերջին 2-3 օրում Վերին Լարսում որևէ ահազանգ չենք ստացել: Այսինքն՝ խնդիրը գնում է դեպի կարգավորման»:

Նիկոլ Փաշինյանը կոչ արեց ապահովել գործընթացը: «Այն ընկերությունը, որի կողմից արտահանվող լոլիկի հետ կապված խնդիր է առաջացել, զգուշացրեք այդ ընկերությանը, և դուք էլ ապահովեք, որ նման իրավիճակներ չծագեն հետագայում: Ակնկալում եմ, որ այս հարցը մենք քննարկում ենք վերջին անգամ: Արտահանումը պետք է իրականացվի գյուղմթերքների պահանջներին խիստ համապատասխան: Գյուղմթերքի արտահանման ծավալները մեծանալու են և ես խնդրում եմ, որ Ձեր ծառայությունը, գյուղատնտեսության նախարարությունը, ՊԵԿ-ը, բոլոր գերատեսչությունների ջանքերը գործադրել, որ գյուղմթերքի արտահանումը տեղի ունենա բնականոն ռեժիմով», - ասաց վարչապետը:

Նիկոլ Փաշինյանը միաժամանակ նշեց, որ այն ինչ խոսեցին, դա չի նշանակում՝ պետք է նոր խոչընդոտներ ստեղծել գյուղացիների համար արտահանման գործում: «Մեր նախարարությունները պետք է օգնեն գյուղացիներին, որ նրանք այդ բոլոր պահանջները կատարեն, փաստաթղթավորումը պետք է լինի արագ, առանց խոչընդոտների: Եթե ասում ենք, որ ֆիտոսանիտարական պահանջները պետք է կատարենք, դա չի նշանակում, որ գյուղացիների համար պետք է լրացուցիչ խոչընդոտներ ստեղծենք»: