Ձեր վստահելի աղբյուրը

Իրանական գազը սահմանին ավելի թանկ է, քան ռուսական գազը։ Այս մասին այսօր Մեծամորի ատոմակայանում լրագրողների հետ ճեպազրույցում հայտարարեց ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը` պատասխանելով հարցին, թե իրանական գազը ռուսական գազի այլընտրանք դիտարկու՞մ է, թե ոչ։

«Վերջին տվյալներով, իրանական գազը սահմանի վրա 1000 խմ դիմաց առաջարկվել է 165 դոլար, իսկ ռուսական գազը՝ 150 դոլարով է, դրան գումարած ռուսական «Գազպրոմ» ընկերության կողմից կան 27-28 մլն դոլարի ներդրումային ծրագրեր, որն ավելի է էժանացնում ռուսական գազը, քան իրանականը: Իհարկե դա մեզ չի ստիպում, որ մենք քարացած նստենք ու չշարունակենք բանակցությունները: Դրանք մշտապես լինելու են, մենք փորձելու ենք էժան գազի այլ աղբյուրներ փնտրել»,- ասաց  Արթուր Գրիգորյանը:

Դիտարկմանը, թե ինչո՞ւ է ռուսական գազը սահմանին 150 դոլար, իսկ բնակարաններում մարդիկ ավելի շատ են վճարում, նախարարը նշեց, որ այս պահին ինքն այդ հարցի պատասխանը չի կարող տալ և առաջարկեց դիմել Հանրային ծառայությունները կարգավորող հանձնաժողով։