Ձեր վստահելի աղբյուրը

Բուսաբանական այգու վարչական տարածքում ծառեր հատելու և հարսանյաց սրահ կառուցելու մասին լուրերն ապատեղեկատվություն են: Մայիսի 25-ին լրագրողների հետ հանդիպմանն այս մասին նշեց Բուսաբանական այգու փոխտնօրեն Սահակ Վարդանյանը: Նշվել է՝ իբրև հինգ հարյուր ծառ է հատվել, իրականում այդքան պետք է տնկվեր:

Վարդանյանը մանրամասնեց՝ այգու տարածքի մի հատվածը վարձակալության է հանձնված, այն կազմում է այգու 0,1 տոկոսը, բայց դրա շնորհիվ կարողանում են կարգի հրավիրել, գեղեցիկ տեսքի բերել այգին, որը հաճելի կլինի այցելուներին: Այգու փոխտնօրենը նշեց, որ ժամանակավոր վրան տեղադրելու միջոցով կարողանում են 40 հազար քմ տարածք բարեկարգել:

Վրանի տեղադրման հարցով, ըստ բանախոսի, զբաղվում է անհատ ձեռներեցը, ով պարտավորվել է չորս ամիս անց այդ վրանը ապամոնտաժել: Ըստ պայմանագրի՝ այնտեղ լինելու են մշակութային, էկոկրթական և այլ միջոցառումներ, կարող են լինել, օրինակ, բաց դասական համերգներ, այդ վրանը պատեր չունի, միայն ծածկն է ու հատակը:

Վարձակալության պայմանագրում, սակայն, սահմանափակումներ կան, որ ամսվա մեջ մեկ անգամ կարող է լինել հարսանիք, բայց ոչ թե բարձր երաժշտություն, խնջույք, այլ մեկ ժամ տևողությամբ միջոցառում, իսկ հիմնական նպատակն, ըստ պայմանավորվածության, այն է, որ դրսից մարդիկ են գալու, կազմակերպվեն սեմինարներ:

Այգու կարգապահության բաժնի վարիչ Մարինե Հովհաննիսյանը խոսեց իրենց ինստիտուտի մասին՝ որպես գիտական կենտրոնի, որ պատկանում է ՀՀ գիտությունների ազգային ակադեմիային, ոչ թե քաղաքապետարանին: Նա նշեց, որ իրենց մոտ որևէ ծառ չի պակասել, այգին բաղկացած է հավաքածուների մասից և զբոսնելու համար նախատեսված հատվածից, ունեն երկու թանկարժեք հողամասեր, որտեղ հավաքված են Հայաստանի բուսական աշխարհի տարբեր ներկայացուցիչներ, որոնք գիտնականները բարձր են գնահատում:

Հովհաննիսյանն ասաց, որ ինստիտուտը նույնպես շատ թանկարժեք հավաքածուներ ունի, հնաբուսաբանական հավաքածու, սերմերի բանկ, այդ հավաքածուների վրա լուրջ գիտական աշխատանք է տարվում: Նա տեղեկացրեց, որ նախորդ տարի այգուն աջակցության հիմնադրամ են ստեղծել, բայց մինչ օրս ոչ մի արդյունք չկա, գումարը չի ավելանում:

Ավագ գիտաշխատող Մերինե Սարգսյանը նկատեց՝ բուսաբանական ինստիտուտում և այգում աշխատում են մարդիկ, ովքեր իրենց կյանքը նվիրել են Հայաստանի բնության ուսումնասիրմանը, դա նշանակում է՝ գիտական արշավներ, գիշերը բնության մեջ մնալ, ուստի անհեթեթ է մեղադրանքը, որ կարող է ծառ հատվել: Նա ասաց՝ ունեն լավ փորձագետներ, նրանք ծրագրերում ընդգրկված են, համագործակցություն կա միջազգային փորձագետների հետ, օտարերկրյա գիտնականները հիացած են այգու հավաքածուով, ուստի տարօրինակ է, որ այգու մասին վատ բան կարող է ասել մեր հայը:

Նա տեղեկացրեց, որ իրենք էքսկուրսիաներ են անցկացնում, այգին նաև մեծ էկոկրթական նշանակություն ունի, այդ կրթությունը կարևորում են, քանի որ դրա շնորհիվ մեծանում են լավ քաղաքացիներ, լավ մարդիկ: Տարբեր մասնագիտության տեր երիտասարդներ գալիս են և իրենց պրակտիկան այստեղ անցկացնում: Բանախոսը համագործակցության կոչ արեց այգու և հասարակության միջև, որպեսզի կարողանան կատարված դրական աշխատանքը ցույց տալ:

Այգու գլխավոր գիտաշխատող Գոհար Օգանեզովան նշեց, որ վարձակալության գումարը նախատեսված է բանվորներ պահելու համար, քանի որ այգին պահելը հսկայական աշխատանք է, պետք է, որ լինի բանվորական ուժ, ոռոգում: Նա ընդգծեց՝ եթե հիմա այգի այցելեն, կտեսնեն՝ ինչ լավ վիճակում է այն, որովհետև բավարար ջուր կա, իսկ մեկ ամիս անց՝ հուլիսից, այդ գեղեցկությունը սկսում է նվազել, որովհետև ջուրը նվազում է, և դրա պատճառը ոչ թե միայն համակարգի մաշվածությունն է պատճառը, այլև այն, որ ջուր չի մտնում այգի:

Օգանեզովան նաև նշեց՝ այգում բռնկվող հրդեհները ոչ միշտ է, որ բնական են, այլև արհեստական: «Մենք ինչ գիտենք՝ ով է գալիս ոչ աշխատանքային ժամերին: Ասենք՝ վաղ առավոտյան հրդեհ է առաջանում, ով է մեղավոր: Մենք մեր այգին շատ ենք սիրում, ոչ մի անգամ չենք կարող վնաս տալ մեր այգուն»,- նշեց նա: