Ձեր վստահելի աղբյուրը

««Հայֆիլմ»-ը պետք է լինի մեր ազգային բրենդը, այստեղ անցյալի արժևորման վրա հիմնվելով՝ այն պետք է շարունակի գործունեությունը»,- այսօր լրագրողների հետ հանդիպմանն այս մասին ասաց «Հայֆիլմի վերածնունդ»  նախաձեռնության ղեկավար, ռեժիսոր Հայկ Բաբայանը՝ ներկայացնելով նախաձեռնության նպատակն ու առաջիկա անելիքները։

Ռեժիսորը տեղեկացրեց, որ այսօրվանից մեկնարկում է ստորագրահավաք՝ «Հայֆիլմ» կինոստուդիայի պետական կարգավիճակը պահպանելու համար։ Ստորագրահավաքի ձևաթղթի վրա գրված է. «Դեմ եմ «Հայֆիլմ»-ի մասնավորեցմանը, պետականացնել «Հայֆիլմ»-ը, մշակութային ազգային արժեքը հայ ժողովրդի սեփականությունն է»։

««Հայֆիլմ»-ն աղքատ ընտանիքի վերջին ոսկեղենը չէ, որ դնես գրավ կամ վաճառես՝ պարտքերից ազատվելու համար, այն հայ ժողովրդի ընտանեկան հարստությունն է։  Կինոստուդիան պետք է պետական մակարդակով պահպանվի։ «Հայֆիլմ»-ի մասին միայն պատերով պետք չէ դատել։ Այն պետք է միավորի նկարիչներին, անիմատորներին, սետեղծագործողներին, որտեղ կարելի է սովորել դրամատուրգիա, սցենարի վարպետություն, տեխնիկական կարևոր մեթոդիկա»,- ասաց Հայկ Բաբայանը։

Նրա կարծիքով՝ «Հայֆիլմի» ու Մատենադարանի միջև որևէ տարբերություն չկա, մեկը մեր գրականությունն է, մյուսը՝ տեսողությունն ու լսողությունը։

Բաբայանի խոսքով, եթե  ստորագրությունների քանակը հասցնի 20-հազարի այն ինչ-որ եղանակ կարող է փոխել. «Մենք չենք նախատեսում ինքնանպատակ ստորագրահավաք կազմակերպել, ստորագրողը պետք է իմանա «Հայֆիլմ»-ի մասին, սրտացավ լինի, այլ ոչ թե նայի լոգոյին ու ասի՝ Սասուցի Դավիթն է»։

Նախաձեռնության համակարգող, կինոսցենարիստ Հայկ Զաքարյանն էլ նշեց, որ «Հայֆիլմ»-ը պետք է լինի ազգային բրենդը և անցյալի արժևորման վրա հիմնվելով՝ այն պետք է շարունակի գործուներությունը. «Այն ֆիլմերը, որոնք մենք տեսել ենք, տեսել են մեր ծնողները ու համարվել է հայկական կինոարժեք, ամբողջը ստեղված են այս կինոստուդիայում»։

Panorama.am-ի հարցին, թե մշակույթի նորանշանակ նախարարին արդեն դիմել են խնդրի հետ կապված,  Հայկ Բաբայանը պատասխանեց. «Նամակ ենք գրել նրա ֆեյսբուքյան էջին, արձաքանք չի եղել»։

Նախաձեռնության անդամները նախարարին չշտապեցին մեղադրել իրենց նամակն անարձագանք թողնելու համար, նշելով. «Սպասելի էր։ Այս պահին պետք է դիմել թեկուզ պատգամավորներին, վարչապետի խորհրդականին, նման մասշտաբի մարդիկ այս հարցին ավելի լավ լուծում կարող են տալ, քան այս պահին մշակույթի նախարարը»։

Դիտարկմանը՝ եթե մասնավոր ինչ-որ մեկը վերցնի կինոստուդիան և իրականացնի իր առջև դրված բոլոր ծրագրերը Հայկ Բաբայանը նկատեց. «Պետությունն ինքը կարող է պահել, այդ հնարավորությունն ունի, սակայն եթե դիտարկենք նման դեպք, ապա եթե պետք է վերցնի, «Հայֆիլմ»-ի լոգոն դարձնի ազգային բրենդ ու պահպանի իր էությամբ, մենք դեմ չենք»։

Նախաջեռնության անդամները, գտնում են, որ նաև պետք է ստեղծվի անկախ ֆոնդ՝ հայկական կինոժառանգությունը պահպանելու համար։

«Հայկական կինոժառանգությունն այս պահին գտնվում է շատ վատ վիճակում, թե ժապավենների, թե տեխնիկական, թե բազային առումով։ Մենք առաջարկում ենք օր առաջ ստեղծել անկախ ֆոնդ, որտեղ կլինի դրամահավաք, կհավաքվի գումար, կներկայացվի ազգային կինոկենտրոնին կամ ղեկավարությանը, քանի ֆիլմ է փչանում, որոշվի որքան գումար է անհրաժեշտ դրանք պահպանելու համար։ Եթե այդ գումարից անգամ մեկ դոլար անհետացավ, ես այդ մեկ դոլարի համար գնալու եմ վարչապետ Նիկոլ Փաշինյանի առանձնատան դիմաց ու ասեմ՝ «այս մի դոլարը կերան ու այն պետք է դառնա մեծ պրոբլեմ»։ Այս անկախ ֆոնդը պետք է կառավարի չեզոք մարդ, լինի ազնվագույն, սրտացավ ու հայրենասեր մարդ, կարող է լինել անգամ քաղաքական գործիչ»,- հավելեց Հայկ Բաբայանը։