Ձեր վստահելի աղբյուրը

Այն  խորհուրդը, որ տվել է 1918 թվականը, պետք է օգնի, որ մեր պետականությունն ու ապագան միշտ մեր ձեռքերում պահենք։ Ցանկացած գործողության հիմքում միայն ու միայն հայ ժողովրդի, ՀՀ քաղաքացու բարօրությունն ու անվտանգությունը պետք է լինի։ Սարդարապատի հուշահամալիրում այսօր լրագրողների հետ զրույցում այս մասին ասաց ՀՀ տնտեսական զարգացման և ներդրումների նախարար Արծվիկ Մինասյանը:

«Համոզված եմ, որ նոր կառավարությունը, Նիկոլ Փաշինյանի գլխավորությամբ, առաջ է շարժվելու այս սկզբունքներով»,- ասաց նա։

Լրագրողներն Արծվիկ Մինասյանից հետաքրքրվեցին՝ իրեն ավելի հարմարավետ զգում է Էկոնոմիկայի՞, թե Բնապահպանության նախարարի պաշտոնում։ Դաշնակցական գործիչը պատասխանեց, որ Բնապահպանության նախարարությունն իրեն մեծ փորձառություն է տվել։

Նա միաժամանակ նշեց, որ կառավարության  երիտասարդ անդամների աշխատանքի առնչությամբ մտահոգություններ չկան, կա զգուշավորություն։

«Համոզված եմ, որ երիտասարդ լինելով հանդերձ, երբ ապագայի հիմքում դրվում են փորձը և ապագայի նկատմամբ ազգային, պետական արժեքները, հաջողություն ենք ունենալու։ Որևէ մեկը նախարար կամ կառավարման հմտություններ ձեռք բերած չի ծնվել»,- նշեց նորանշանակ նախարարը։

Ինչ վերաբերում է արտահերթ խորհրդարանական ընտրություններին, Արծվիկ Մինասյանը համոզմունք հայտնեց, որ դրանք անպայման կայանալու են, քանի որ ընտրական համակարգը պետք է փոփոխության ենթարկվի։

«Այն, որ խորհրդարանի՝ այսօր ներկայացված հարաբերակցությունը ակնհայտորեն չի համապատասխանում մեր իրողություններին, փաստ է, բայց թե ինչ ժամկետում պետք է խորհրդարանական ընտրություններ լինեն, ավելի մանրամասն կներկայացնի վարչապետը։ Դաշնակցությունը միշտ պատրաստ է»,- ամփոփեց գործադիրի ներկայացուցիչը։