Ձեր վստահելի աղբյուրը

«Պետք է այնպես անել, որ զինհաշմանդամ  տղաների թոշակը արժանի լինի իրենց նվիրումին»,- այս մասին այսօր Հայրենիքի պաշտպանի վերականգնողական կենտրոն այցելելուց հետո լրագրողների հետ զրույցում ասաց ՀՀ նախագահ Արմեն Սարգսյանը:

Նախագահը նշեց, որ եկել է այստեղ՝ կենտրոնում բուժում ստացող տղաների հետ Առաջին Հանրապետության 100–ամյա հոբելյանը նշելու համար:

«Մեր 100-ամյա պատմության ընթացքում ստիպված ենք եղել ոչ միայն քաղաքական որոշումներով ու հայտարարագրերով, այլ ուղղակի զենքի ուժով, մեր կյանքի գնով, մեր արյունով պաշտպանել մեր անկախությունը և ձեռք բերել այդ անկախությունը: Հետևաբար, երեկ ու այսօր զինվորների օրն է, ընդ որում զինվորների, որոնք իրենց կյանքն ու առողջությունն են տվել հայրենիքին։ Փայլուն տղաներ կան, որոնք Ռուսաստանից և այլ երկրներից  վերադարձել են Հայաստան ու կամավոր ծառայել բանակում:  Ինչպե՞ս կարող ենք այս մարդկանց մոռանալ անկախության օրվա առիթով, ուստի սա ոչ թե այցելություն էր, այլ պարտականություն, գալ, իրենց շնորհավորել և լսել նրանց»,-ասաց Արմեն Սարգսյանը:

Հանրապետության նախագահին հիացրել է  Հայրենիքի պաշտպանի վերականգնողական կենտրոնը, որն, ըստ նրա, աշխարհի լավագույն հիվանդանոցների, վերականգնողական կենտրոնների մակարդակ ունի:

Արմեն Սարգսյանի խոսքով՝ սա ճիշտ լուծում է, սակայն այսօր Հայաստանում կա 1500 զինհաշմանդամ, իսկ կենտրոնը կարող է ընդունել միայն 32 մարդու:

«Այստեղ գտնվող տղաները փայլուն բուժում են ստանում և դա չեն թաքցնում: Իրենք երջանիկ են, որ այստեղ են, երջանիկ են, որ ոչ միայն առողջական խնդիներն են լուծվում, այլ հոգեբանորեն են վերականգնվում: Հանգստի սենյակ ունեն, որ ԱՄՆ նախագահի աշխատասենյակի որակն ունի: Բայց դրան զուգահեռ ունենք մեծ խնդիր: Այս կենտրոնը կարող է սպասարկել 32 զինհաշմանդամի, իսկ ամբուլատոր բուժում կարող է ստանալ 50  հաշմանդամ, իսկ դրա կարիքն ունեն 1500-ը։  Այսինքն՝ այս բարի աշխատանքը պետք է շարունակել»,- նշեց նա:

Նախագահն ասաց, որ պետք է գտնել սիստեմատիկ լուծում։ 

Արմեն Սարգսյանի խոսքով, ցավոք սրտի, միայն առողջության վերականգնմամբ տղաների խնդիրները չեն վերջանում, նրանցից շատերն ունեն  սոցիալական խնդիրներ. «Ցավալին այն է, որ իրենց կյանքը վտանգի դրած տղաներն այսօր ստանում են թոշակ, որով առողջ մարդը չի կարող ապրել:  Պետք է այնպես անել, որ նրանց թոշակն արժանի լինի իրենց նվիրումին: Երկրորդ՝ նման կենտրոններ պետք է լինեն նաև շրջաններում, քանի որ հաշմանդամություն ունեցող մարդկանց դժվար է շրջաններից Երևան հասնելը։ Բայց ամենակարևորը՝ վերականգնողական կենտրոնը պետք է լինի մի քանի ուղղությամբ, մասնավորապես՝ լինի առողջական վերականգնման կենտրոն, հոգեբանական վերականգնման կենտրոն, երրորդը՝ սոցիալական վերականգնում»: 

Նախագահը խոստացավ, որ այդ հարցով առաջին հերթին կխոսի վարչապետի հետ, կներկայացնի իր տպավորություններն ու մտահոգությունները։ Ըստ Արմեն Սարգսյանի՝ զինհաշմանդամների թոշակի հարցը և սոցիալական խնդիրները ուշադրության կենտրոնում պետք է լինեն:

Հաջորդ խնդիրը, նախագահի ներկայացմամբ, վերաբերում է նրանց աշխատանքով ապահովելուն.  «Այն երիտասարդները, որոնք կենտրոնում վերականգնողական բուժում են ստանում և այդ ընթացքում նաև մասնագիտական որակներ են ձեռք բերել, մենք պետք է ամրագրենք օրենքով, որ եթե մարդը այստեղից դիմում է հայտարարագրված աշխատանքի, իրեն առավելություն տան։ Պատկերացրեք, որ Հայաստանում բազմաթիվ  մասնավոր և պետական ընկերություններ կան, և նրանք 3,4 կամ 5 հոգու աշխատանքի ընդունեն և նորմալ աշխատավարձ տան, ոչ 30 կամ 40 հազար դրամ, այլ 100, 200 կամ 300 հազար դրամ, որ մարդիկ իրենց աշխատանքով, ոչ թե օգնությամբ, նորմալ կյանք վերադառնան»:

Արմեն Սարգսյանը նշեց, որ պետք է օգնության հոգեբանությունից դուրս գալ, 20 տարեկան երիտասարդը ինքը պետք է իրեն օգնի, ոչ թե 60 տարի իրեն օգնեն. «Եթե մի ընկերություն են դիմել երկու հոգի՝ մեկն առողջ, իսկ մյուսը հաշմանդամություն ունի, ապա առավելությունը պետք է տրվի հաշմանդամին, հատկապես նրան, որն իր առողջությունը կորցրել է  հայրենիքը պաշտպանելիս»։

Նրա խոսքով՝ պետք է օգնել, որ այս տղաները արժանապատիվ կյանքով ապրեն:

Լրագրողներից մեկի հարցին՝ ինքը, որպես ՀՀ նախագահ, ինչ-որ նվեր կամ աջակցություն կցուցաբերի՞ կենտրոնին, Արմեն Սարգսյանը պատասխանեց. «Իմ մտքով շատ բաներ է անցնում ու ես դա անում եմ, դուք գիտեք, որ ես ու ընտանիքս մեծ բարեգործություն ենք անում, բայց ես չեմ սիրում դրանց մասին հայտարարել: Բարեգործությունը, որ պետք է հայտարարվի՝ ես եկա, այսքան փող տվեցի, այս նվիրեցի, ինչ-որ ձևով վիրավորական է: Բարեգործության արդյունքով կարող ես ուրախությամբ կիսվել»։