Ձեր վստահելի աղբյուրը

ԵՊՀ գիտխորհրդի նիստերի դահլիճում մեկնարկել է դասադուլ անող ուսանողների հանդիպումը ԵՊՀ ռեկտոր Արամ Սիմոնյանի և  պրոռեկտորների հետ: Արամ Սիմոնյանը նշել էր, որ պատրաստ են պատասխանել ուսանողներին մտահոգող հարցերին:

Ուսանողներից մեկը՝ Մոնթեն, ԵՊՀ ռեկտոր Արամ Սիմոնյանին հարցրեց, թե որքանո՞վ էր օրինական, հեղափոխության օրերին ուսանողների առաջ դռները փակելը:

Նա պատմեց, որ ապրիլի 18-ին կարմիր բերետավորները ուսանողներին համալսարանական տարածքից բերման էին ենթարկում, որտեղ կանգնած էր պրոռեկտորներից մեկը. «Արդյոք օրինակա՞ն էր»։

«Այո, եղել են, բայց դրանք արվել են անվտանգության պահպանման համար: Մի րոպե պատկերացրեք բուհի ղեկավարության վիճակը, երբ օրական 20-25 հազար մարդ մուտք է գործում բուհ, այն դեպքում, երբ ուսանողների և դասախոսների անվտանգության ապահովումը ոչ բարձր մակարդակի վրա է: Այո,  մենք վախենում էինք, այսօր էլ վախենում ենք, որ կարող էր որևէ անհավասարակշիռ մարդ, որ կապ չունի ոչ շարժման հետ, ոչ էլ համալսարանի, փորձի ինչ-որ վտանգավոր միջոցներ ձեռնարկել, ընդհուպ մինչև ահաբեկչական ակտ կատարի»,-արձագանքեց ռեկտորը։

Ուսանող Վահան Կոստանյանն էլ, մինչ ռեկտորին հարց ուղղելն ասաց. «Այստեղ հավաքված մարդիկ կարող են փաստել, որ Դուք չեք տիրապետում ԵՊՀ-ում ստեղծված իրավիճակին, որևէ դեպքի որը կախված է ուսանողի ազատ արտահայտման, կրթության որակի բարձրացման հետ, դուք չեք տիրապետում»։

Այնուհետև ուսանողը հարցրեց. «Ինչպես եք դուք զգում այս պահին նստած մարդկանց կողքին, որոնց որակել եք «Սորոսի շպիոններ», բայց նույն կազմակերպությունից, «Բաց հասարակությունների հիմնադրամից» Երևանը ստացել է շուրջ մեկուկես միլիոն դոլարի գրանտ, կատարվել են ծրագրեր, որոնցից մի մասը շատ վատ»։

Իրավիճակին չպտիրապետելու հետ կապված ռեկտորն ասաց. «Դա ձեր կարծիքն է, որը ես չեմ կիսում»։

Ինչ վերաբերում է «Բաց հասարակության հիմնադրամից» ստացած գումարներին՝ ասաց, որ դրանց զգալի մասը տրվել է գիտական դրամաշնորհների ձևով. «Իհարկե դա օգուտ է, բայց ես ունեմ իմ ուրույն կարծիքը այդ հաստատության մասին, ով էլ ուզում է լինի, ինձ չի կարող հակառակն ապացուցել, ես գտնում եմ, որ այդ հաստատությունը ստեղծվել է շատ ուրիշ նպատակների համար»։

Դիմելով ռեկտորին ուսանողը նաև ասաց. «Երբ մարդիկ հացադուլի մեջ նստած էին, դուք որևէ անգամ չփորձեցիք գնալ իրենց մոտ և հասկանալ թե ինչ է կատարվում»։

Սրան իր պատասխան էլ Սիմոնյանը նշեց. «Բա այդ հացադուլավորներին որ թույլ էին տալիս ուտելիք, խմելիք տաք, օգտվեին սանհագույցներից, դա իրեն-իրեն էր արվու՞մ»։

Ուսանող, ակտիվիստ Դավիթ Պետրոսյանն էլ ընդհատելով ռեկտորին, արձագանքեց, որ դա բացարձակ սուտ է։