Ձեր վստահելի աղբյուրը

Տեսանյութում լսվող կրակոցները հնչում են Երևանի ամենակենտրոնում՝ քաղաքապետարանի շենքից քիչ այն կողմ:



Մինչ ՀՀ զինված ուժերի խաղաղապահ բրիգադն իր օրն էր տոնում, հարակից շենքերի բնակիչները երկմտանքի մեջ էին՝  ի՞նչ կրակոցներ են, ո՞ր ուղղությամբ, ո՞ւմ դիպան, փախչե՞ն, երեխաներին ինչ անեն,...:  Երիտասարդ կանայք, որ երևի երեխաներին ցերեկային քնի էին դրել ու հազիվ շունչ էին քաշում, դուրս էին եկել պատշգամբներ ու չհասկացող ու խոժոռ նայում էին կրակողների կողմը:

Երևանի կենտրոնում տեղակայված գնդի տարածքում տոնական քայլերթին հաջորդող կրակոցների մասին ոչ պաշտպանության նախարարությունը, ոչ էլ գնդից քիչ հեռու տեղակայված քաղաքապետարանը որևէ իրազեկում ու հայտարարություն չէին տարածել:

Հրավառության սահմանափակումների մասին ակտիվացած խոսակցությունների ֆոնին հետաքրքրիր է սպասվելիք  կրակոցների մասին լռելը, երևի «հարակից շենքերի բնակիչները պետք է որ սովորած լինեն» տրամաբանությամբ:

ՊՆ խոսնակ Արծրուն Հովհաննիսյանն ի պատասխան քաղաքացիների դժգոհության պատասխանում է. «Տոնական միջոցառում է, ցուցադրական պարապմունքներով։ Արդեն ավարտվել է։ Գնդի տարածքից դուրս էլ դա չի լինում»:

Հարցին, թե ինչու նախարարությունը չի իրազեկել քաղաքացիներին ու քաղաքապետարանին, Ա. Հովհաննիսյանը նշեց. «Իրազեկում չի եղել, քանի որ դա մեծ մասշտաբի միջոցառում չէ: Պայթուցիկ միջոցներ չեն կիրառվել»:

Համոզված ենք, որ երեխամայրերը միանգամայն հանգստացան Արծրուն Հովհաննիսյանի նետած պատասխանից: Արդեն որքան ժամանակ է՝ բնակիչները բողոքում են, իսկ ՊՆ-ն տղամարդավարի է վերաբերում նրանց  «հիստերիաներին»՝ պայթուցիկ չի, ուրեմն «օկ» է:

Արծրուն Հովհաննիսյանի պատասխանը ակամա հիշեցրեց տարիներ առաջ դատարանում մի դատախազի ելույթը, որով նա «հանգստացրեց»  ծնողների, ովքեր բողոքով էին դիմել իրենց մանկահասակ աղջկան փախցնելու համար. «Տարել էր ամուսնանալու, հո չէ՞ր ուտելու»: