Ձեր վստահելի աղբյուրը

««Նորֆոլկը», ըստ էության, բացվել էր այն նպատակով, որպեսզի բեռնափոխադրումները մաքսազերծման գործընթացից տարանջատվի, և մաքսազերծումն իրականացվի մաքսային մարմնի կողմից վերահսկելի գործառույթներով։ Եթե այդ տեսանկյունից նայենք, «Նորֆոլկի» դերակատարումը բավականին մութ և խառը պատմություններ ջրի երես է հանել»,- 2017 թվականի բյուջեի կատարողականի ներկայացման ժամանակ այսօր այս մասին ասաց ՊԵԿ նորանշանակ նախագահ Դավիթ Անանյանը։

Նա չցանկացավ կոնկրետացնել՝ արդյոք «Նորֆոլկն» իր գործունեության ընթացքում հարկեր է թաքցրել է,  թե ոչ, քանի որ  ընթանում է քննություն, և հենց քննությունը կտա հարցերի պատասխանները։

«Ուզում եմ մի շատ կարևոր բան արձանագրենք. «Նորֆոլկը» ի սկզբանե որոշակի կարգավորումներ անելու նպատակով է ստեղծվել: Ինչքանով է դա հաջողվել՝ քննությունը ցույց կտա։ Որպես մասնագետ՝ կարծում եմ, որ նախկինի համեմատ՝ «Նորֆոլկը» շատ ավելի թափանցիկ իրավիճակ է ստեղծել՝ միգուցե նաև իր գործունության մեջ որոշակի շեղումներ անելով»,-ասաց ՊԵԿ նախագահը։

Հիշեցնենք, որ  ԱԱԾ-ն բացահայտել էր հանցավոր սխեմա, որի միջոցով ՀՀ-ում գործող խոշոր ընկերությունը խուսափել է առանձնապես խոշոր չափերով հարկեր, տուրքեր և պարտադիր այլ վճարումներ կատարելուց: «Նորֆոլկ Քոնսալթինգ» ՍՊԸ գլխավոր տնօրեն Արմեն Ունանյանը և պատասխանատու ևս երեք աշխատակիցներ ձերբակալվել են ՀՀ քրեական օրենսգրքի 205-րդ հոդվածի 2-րդ մասով նախատեսված հանցագործություն կատարելու կասկածանքով: