Ձեր վստահելի աղբյուրը

Ոստիկանության կողմից  13,7 մլրդ դրամի չափով տուգանքների չեղարկման հայտարարությունից  մեկ շաբաթ անց հայտնի չէ, թե դրանից քանի վարորդ է օգտվել: ՃՈ-ում դեռ պետք է հաշվեն:

Panorama.am-ի   հետ զրույցում Ճանապարհային ոստիկանության պետի տեղակալ Արմեն Խաչատրյանը չհերքեց տեղեկությունները, որ համաներված վարորդների թվում կան նաև այնպիսիք, որոնց տուգանքները հասնում է մի քանի միլիոն դրամի:

«Կան նաև մի քանի տասնյակ վարորդներ, որոնք պարտքերի պատճառով զրկվել են վարորդական իրավունքի վկայականից, նրանք հիմնականում տաքսիների վարորդներ են, որոնք արգելված վայրերում կանգառ են կատարել, ուղևոր վերցրել կամ իջեցրել: Սրանք այն գումարներն են, որ երբեք պետաբյուջե կամ ՃՈ արտաբյուջե մուտք չեն լինելու, դրանով հանդերձ վնաս են պատճառելու քաղաքացիներին, հետևաբար, սա տնտեսական առումով ճիշտ որոշում էր»,-որոշումը հիմնավորում է ՃՈ պաշտոնյան:

Համաներումից բացի ՃՈ-ն առաջարկել է որոշ խախտումների դեպքում տուգանքի փոխարեն նախազգուշացում կիրառել, նախազգուշացման որոշումը, խախտման տեղի, ժամի մասին տվյալները կտեղադրվեն police.am կայքում, հասանելի կլինեն վարորդի համար:

ՃՈ-ում համամիտ չեն վարչապետ Փաշինյանի այն դիտարկմանը, որ մարդկանց անընդհատ տուգանելու մոլուցք է եղել: Տուգանելու փոխարեն մտադիր են եղել անվտանգ երթևեկություն ապահովել:

Տարիների վիճակագրությունը վկայակոչելով՝ Ա. Խաչատրյանը նշում է, որտեղ արագաչափ սարքեր կան, դրանց գործարկման տիրույթում պատահարներ գրեթե չեն լինում:

|«2012-ին առաջին անգամ Երևան քաղաքից դուրս արագաչափ տեղադրվեց Չայնիի ոլորաններում՝ Երևան-Սևան ճանապարհին, որտեղ արագության սահմանփակման նշան կա՝ 70 կմ/ժ: Ամեն տարի մի քանի զոհ էր լինում, տեղադրումից հետո մինչ այսօր ոչ մի զոհ այդ տարածքում չի եղել: Մարդիկ սովոր չէին, որ պետք է երթևեկեին սահմանված արագությամբ»,-նշում է Խաչատրյանը:

Ոստիկանությունում հետևել ու վերլուծել են խախտումների վիճակագրությունը,  ապա եզրակացրել, որ վերջին վեց տարվա ընթացքում պատկերն էականորեն փոխվել է, վարորդների իրավագիտակցությունը բարձրացել է, ձգտում են խախտումներ չանել: Օրինակ, արագաչափ սարքի տեղադրումից մեկ տարի անց հայտնաբերելիության ցուցանիշը նվազում է առնվազն 70 տոկոսով:

Իրականացրած համաներումը, որոշ խախտումների՝ օրինակ հոծ գծի տրորման դեպքում 5 հազար դրամ տուգանքի փոխարեն նախազգուշացում սահմանելը մտահոգություններ է առաջացրել ՃՈ-ում, չեն բացառում, որ դրանց հետևանքով օրինազանցություն կատարող վարորդների թիվն ավելանա: Չեն բացառում՝ այդ դեպքում կգնան հին մեթոդներին ու խստացումներին:

«Մեր կողմից իրականացրած այս քաղաքականության ազդեցությունը կերևա երթևեկության մեջ: Եթե իրավախախտումների, ճանապարհատրանսպորտային պատահարների քանակը չի ավելանա, դա կնշանակի, որ մեր քաղաքականությունն արդյունավետ է: Այդ դեպքում հնարավոր է մտածենք հետագա մեղմացումների ուղղությամբ: Սակայն, աստված մի արասցե, մենք ունենանք այլ պատկեր, որ առիթից օգտվողների թիվը կմեծանա, նախազգուշացումներից հետո հետևություններ չեն արվի, ինչի հետևանքով երթևեկության անվտանգության մակարդակը կիջնի, Ճանհապարհատրանսպորտային պատահարները կավելանա, ապա սրան արագ արձագանք է տրվելու ու համապատասխան արագ վարչարարություն է իրականացվելու, այսինքն կգնանք խստացումների»,-ասաց Ա. Խաչատրյանը:

Հայտարարությանը հետևած մեկ շաբաթվա ընթացքում տուգանք նշանակելու մասին որոշումները պակասել են, դա, ըստ ոստիկանության պետի տեղակալի պայմանավորված է երկու հանգամանքով՝ շատ խախտումների փոխարեն տուգանք չի կիրառվում, բայցի այդ էլ խախտումներ քիչ են անում:

«Ներկայումս ձգտում են խախտում չունենալ, եղած խախտումներն էլ անմիջապես վճարում են, որպեսզի խնդիրների առաջ չկանգնեն»,-նշեց նա:

ՃՈ-ում, ինչպես իրենք են ասում, աշխատում են «պատասխանատվության էկոնոմիա ռեժիմով», դրա փոխարեն ակտիվացրել են քարոզչական աշխատանքները, հույս ունեն՝ կարդարացվեն իրենց սպասելիքները:

«Անընդհատ միջոցառումներ ենք իրականացնում, իհարկե, ծանր նստել չի կարելի, տեսնենք, ինչ ցույց կտա վիճակագրությունը, հուսով ենք, որ խստացման կամ հին մեթոdներին վերադառնալու անհրաժեշտություն չի լինի»,-ներկայացնում  է Ա. Խաչատրյանը:

ՃՈ պետի տեղակալը տեղյակ է խախտում չկատարած, կատարած խախտումների համար վճարած վարորդների դժգոհություններին: Շտապում է նրանց հիշեցնել, որ տուգանքները տարիներ շարունակ չվճարած վարորդները զրկանքներ են ունեցել՝ օրինակ վերցրել են վարորդական իրավունքի վկայականը, սառեցվել են հաշիվները, աշխատավարձ չեն կարողացել ստանալ, վարկեր չեն տրամադրել բանկերը, գույքն են բռնագրավել, իսկ շատերն էլ ուղղակի տուգանքները վճարելու համար ֆինանսական միջոցներ չեն ունեցել:

«Նույնիսկ հանցագործությունների դեպքում նախատեսված է վաղեմության ժամկետ, ներվում է հանցագործությունը, կա համաներում: Հիմա որպես սոցիալական պետություն որոշում է կայացվել մարդասիրական ակտ կատարել, նման մարդկանց առողջանալու հնարավորություն տալ: Իսկ ովքեր վճարել են, դա արել են իրենց շահերից ելնելով»,-ասում է նա: