«Երևան» հիմնադրամը մի օղակ է, որ կոչվում է «լվացքատուն». Զարուհի Փոստանջյան
Երևանի ավագանու նիստերը ոչ թե բնակարան նվիրելու համար են, այլ Երևանում առաջացած խնդիրներին լուծում տալու, քաղաքը ծաղկեցնելու որոշումներ կայացնելու համար։ Մայիսի 30-ին Երևանի ավագանու նիստում այս մասին հայտարարեց «Երկիր ծիրանի» խմբակցության ղեկավար Զարուհի Փոստանջյանը՝ հավելելով, որ Երևանի որոշ քաղաքացիներ քաղաքապետարանի շենքում են, ցանկանում են մասնակցել նիստին։ Նա կոչ արեց այդ մասնակցությունը թույլ տալու որոշում կայացնել։
«Ժողովրդավարության սկզբունքից ելնելով՝ մենք պարտավոր ենք տեղական ինքնակառավարմանը մասնակից դարձնել քաղաքացիներին։ Յուրաքանչյուր երևանցու տունն է քաղաքապետարանը, եթե ցանկանում ենք որոշում կայացնել հանուն Երևանի՝ պետք է երևանցին դրա մասնակիցը լինի»,- ասաց նա։
Փոստանջյանը նշեց, որ պետք է ավանդույթ դարձնել և ավագանու նիստերի օրակարգում ներառել նաև երևանցիներին լսելու հարցը։ Նա տեղեկացրեց, որ իրենք չեն ընդունել 2017 թ. Երևանում կայացած ՏԻՄ ընտրությունները, չեն ընդունել նաև, որ Տարոն Մարգարյանը Երևանի քաղաքապետ է։
«Երկիր ծիրանի»-ի ղեկավարն ասաց, որ իրենք նաև դատի են տվել Մարգարյանին, իսկ դատարանները և իրավապահ մարմիններն այսօր հեղեղված են բողոքներով, հիմնավոր ապացույցներով, թե ինչպես է Տարոն Մարգարյանը դիրքը չարաշահել՝ լինելով Երևանի քաղաքապետ, ինչպես է ապօրինի հարստացել, քանդել Երևանը, համայնքային սեփականություն հանդիսացող միլիոնավոր դոլարների արժողության գույքը, հողը և այլ միջոցներ նվիրաբերել այս կամ այն անձին կամ յուրացրել։ Իբրև օրինակ Փոստանջյանը նշեց «Երևան» հիմնադրամը, որով տարեկան 4 մլն դոլարի յուրացում է տեղի ունեցել։
«Վերջին յուրացման դեպքը այն քարտերն էին, որ նվիրեցին մարտի 8-ի կապակցությամբ 450 կանանց. Ովքե՞ր էին այդ կանայք, այդպես էլ չիմացանք, ինչ գումարներ էին նրանց նվիրել, այդպես էլ չհասկացանք, որովհետև դրա վերաբերյալ հաշվետվություն չտրվեց։ «Երևան» հիմնադրամը մի օղակ է, որ կոչվում է «լվացքատուն»։ Դրա միջոցով, հարգելի երևանցիներ, ձեր միջոցները յուրացվում են։ Հիմա մենք գտնվում ենք մի տարածքում, որը դեռ բռնազավթված է, հետևաբար մեր քայլերը պետք է լինեն՝ ազատագրելու այս տարածքը։ Դրա լավագույն միջոցը մեր քաղաքացիների մասնակցությունն է»,- ասաց նա։
Փոստանջյանը կրկնեց, որ պնդում է օրակարգի մեջ ներառել Երևանի քաղաքապետարանում գտնվող քաղաքացիներին լսելու հարցը։
Արձագանքելով՝ Երևանի քաղաքապետը տեղեկացրեց, որ համաձայն կանոնակարգի՝ եթե օրակարգի շուրջ տվյալ քաղաքացուն վերաբերող հարց կա, իրենք օրենքով սահմանված կարգով պարտավոր են նրան հրավիրել, բայց քաղաքապետարան եկած և նիստին մասնակցել ցանկացող անձինք երկու անձանց մասնակցությունը թույլ տալու հիմքեր չկան։ «Ինչ վերաբերում է հարցերին՝ մեր աշխատակիցները պատրաստ են լսել, մենք ունենք ընդունելություններ, եթե անհրաժեշտություն է լինում՝ ընդունում ենք, լսում»,- ասաց նա։
Հարակից հրապարակումներ`
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
