Ձեր վստահելի աղբյուրը

Երևանի ավագանու «Ելք» խմբակցության անդամ Թեհմինա Վարդանյանը մայիսի 30-ին Ավագանու հերթական նիստի ժամանակ բարձրաձայնեց մայրաքաղաքի թիվ 16 պոլիկլինիկայում արդեն երկրորդ օրը շարունակվող գործադուլի մասին։ Նա տեղեկացրեց, որ բուժանձնակազմը գրություն է պատրաստել՝ ուղղված Երևանի քաղաքապետ Տարոն Մարգարյանին։ Վերջիններս նշում են, որ պոլիկլինիկայի նախկին տնօրենի հրաժարականից հետո տնօրենի ժամանակավոր պաշտոնակատար Նունե Խաչատրյանին ներկայացնելը բուռն արձագանքի է արժանացել, քանի որ նշանակումն իրականացնելիս հաշվի չեն առել աշխատողների ցանկությունները։ Բացի այդ, նրանք պնդում են, որ ընթացակարգ է խախտվել՝ գործող փոխտնօրեններից որևէ մեկը չի առաջադրվել, Նունե Խաչատրյանը ղեկավար մարմնի փորձ չունի, չի վարել վարչական պաշտոն, չունի վերապատրաստում։

«Բացի մասնագիտական ձեռքբերումներից, կարևոր ենք համարում նաև մարդկային որակները, բուժաշխատողները բացառում են աշխատանքը մի մարդու հետ, ով էթիկայի պահանջներ է խախտում և անհարգալից վերաբերմունք դրսևորում այն անձանց նկատմամբ, ովքեր դեռ իր ենթակայության տակ չեն, ուստի քանի դեռ իրենց օրինական պահանջները չեն բավարարվել, նրանք հրաժարվում են աշխատել»,- տեղեկացրեց Վարդանյանը՝ հավելելով, որ բուժաշխատողներն ակնկալում են ողջամիտ մոտեցում և մանրամասն անդրադարձ այս խնդրին։

Ավագանու անդամը Երևանի քաղաքապետին ասաց, որ նա չի տիրապետում այդ բուժհաստատությունում գործող իրավիճակին։ Տարոն Մարգարյանն արձագանքեց, որ համապատասխան վարչությունները լավ տիրապետում են և տեղյակ են՝ այնտեղ ինչ է կատարվում, իր տեղակալի գլխավորությամբ ուսումնասիրություններ են իրականացվում։
«Ելք» խմբակցության ղեկավար Դավիթ Խաժակյանն օգտվեց արտահերթ ելույթ ունենալու իր իրավունքից, նշեց՝ նիստի օրակարգում առկա չեն այն հարցերը, որոնք պետության օրակարգում են, և զարմանալի կլինի, եթե ավագանու անդամները դրանք չշոշափեն, քանի որ այդ ամենը վերաբերում է իրենց բոլորին։

Նա ևս խոսեց թիվ 16 պոլիկլինիկայի իրավիճակից, ասաց՝ այնտեղ աշխատանքային մի միջավայր է, որտեղ ոտնահարվում են աշխատողների բոլոր իրավունքները։ «Դուք պատկերացնու՞մ եք՝ 20 տարի առանց արձակուրդի, պատկերացնու՞մ եք ձեզ՝ 20 հազար դրամ եկամուտ ստանալով։ Այս մի շաբաթվա ընթացքում հասկացա՝ սա իրականություն է, և այն տիրում է ոչ թե նրա համար, որ Հայաստանը պատերազմական վիճակում է, հարևանների կողմից շրջափակված, այլ՝ որ տնօրենը տարիներ շարունակ կոռուպցիոն սխեմաներով միլիոններով գումարներ է յուրացրել, ատկատներ, կեղծ հաստիքներ, այսինքն՝ տնօրենը վարչական մասից մի քանի հոգու գրանցել է իր բարեկամների, աշխատողների բարեկամների վրա, ամեն ամիս այդ գումարը դնում է գրպանը, եթե դա բաշխենք աշխատողների վրա, կտեսնենք, որ 10 տոկոսով աճում է նրանց աշխատավարձը»,- ասաց նա։

Խաժակյանը խոսեց նաև թիվ 19 պոլիկլինիկայի տնօրենի մասին, ում մի եղբայրն էլ հարևան պոլիկլինիկայի տնօրեն է, մյուսը՝ կադրերի բաժնի վարիչ, տղան՝ բուժաշխատող, ով իր ղեկավարած պոլիկլինիկայի տարածքի ծառերը ոչնչացնում է ու չի էլ հերքում դա, ում ղեկավարած հաստատությունում ամեն ամիս բուժաշխատողների կողմից դրամարկղ են մուտքագրվում գումարներ՝ չգործող ծառայությունների համար։ Խաժակյանը հայտնեց՝ մամոգրաֆիայի համար աշխատակիցներն ամեն ամիս 10 հազար դրամ են վճարում, մամոգրաֆիայի սարքը չի գործում, և հասկանալի է՝ այդ գումարն ուր է գնում։ «Դուք չեք պատկերացնի, բայց այս պոլիկլինիկայում բուժաշխատողները հաճախ իրենք են ձեռք բերում դեղորայքը և բժշկական պարագաները։ Աշխատանք ես ուզում՝ վճարիր, արձակուրդ ես ուզում՝ կրկին վճարիր, ինչ ուզես այդ պոլիկլինիկայում հնարավոր է անել, պարզապես վճարիր»,- ասաց նա։

Խաժակյանը նշեց, թե այս ամենը կատարվում է Երևանի քաղաքապետարանի հովանավորչության ներքո, և իր համար խիստ զարմանալի է՝ մի իրավիճակում, երբ պահանջում են Տարոն Մարգարյանի հրաժարականը, նա որոշում է նշանակել մի անձի, ում շուրջ կա լարվածություն։ «Ո՞րն է իմաստը այս մթնոլորտում մեկ համայնքային պոլիկլինիկա Ձեր վերահսկողության տակ պահելու համար նման նշանակում անել»,- ասաց նա։

Մարգարյանն արձագանքելով՝ հույս հայտնեց, որ Խաժակյանը կսկսի տիրապետել և օրենքներին, և լիազորություններին, և ցանկություններին, ապա առաջարկեց՝ չհրահրել աշխատակիցներին և այցելուներին, որ նման քայլեր անեն։ «Մենք մեր լիազորությունների շրջանակներում մեր աշխատանքները կազմակերպում ենք»,- ասաց նա։