Ձեր վստահելի աղբյուրը

«Անունները նշվելու են այն ժամանակ, երբ մենք կունենանք հստակեցված փաստեր»,- այս մասին այսօր լրագրողների հետ զրույցում ասաց ՀՀ առողջապահության նախարար Արսեն Թորոսյանը՝ պատասխանելով Panorama.am-ի հարցին, թե հայտարարել է՝ կոռուպցիայի մեջ ներգրավված պաշտոնյանների անուններ է տալու, երբ է պատրաստվում հնչեցնել:

Նախարարը նշեց, որ պաշտոնավարման առաջին օրերին ինքն արդեն մի քանի դեպքի մասին  նշել էր, մասնավորապես, առողջարանների մասով:

«Պարզապես մեղադրանքներ օդում չեն հնչելու, չնայած շատ մարդականց անուններ բոլորս  հիմա կարող ենք տալ, որ գիտենք, լսել ենք, բայց քանի որ մենք ուզում ենք կառուցել իրավական պետություն ու վենդետաներ չանենք նախկինում արած իրենց վատ արարքներին, մենք պետք է ունենանք այդ փաստերը»,- նշեց Արսեն Թորոսյանը՝ հավելելով, որ  ստուգումներ են անցկացնում, որից հետո արդյունքները կուղարկվեն ԱԱԾ:

Նախարարը հայտնեց, որ, հավանաբար, այսօր արդեն երկու նամակ կուղարկի ԱԱԾ: «Այսինքն, այդ գործերին ընթացք տալու համար ոչ մի խանգարող հանգամանք չկա: Կլինեն նաև կադրային փոփոխություններ, աշխատանքից ազատումներ, իսկ եթե լինեն քրեական գործերի հիմքեր, ապա նաև կհարուցվեն քրգործեր: Երբ դրանք լինեն, դրանց մասին կիմանաք: Հիմա չեմ ուզում անուններ տալ՝ հաշվի առնելով անմեղության կանխավարկածը, բայց ինչպես գրել էի՝ դրանք կլինեն մեծ հիվանդանոցների հետ կապված»,- նշեց Արսեն Թորոսյանը:

Առողջապահության նախարարը նաև ասաց, որ կոռուպցիան եղել է այնքան համակարգային, որ հիմա բոլոր նախարարները աշխատում են նաև որպես քննիչներ: 

Հիշեցնենք, առողջապահության նախարար Արսեն Թորոսյանը ֆեյսբուքյան իր էջում գրել էր՝ «երևի սկսեմ արդեն անուններ տալ զանազան ռազմավարական ծրագրեր տապալած և միլիոններ մսխած պաշտոնյաների»:

«Վերջին տեղեկություններով առողջապահական օլիգարխիան որոշել է հակահարված տալ մեր հակակոռուպցիոն քայլերին` ի դեմս պատվիրված հոդվածների և տարատեսակ ասեկոսեների, որոնք պետք է երկրի ղեկավարության մոտ վարկաբեկեն մեզ ու մեզնից ազատվելու առիթ դառնան, որպեսզի նրանք շարունակեն «հանգիստ ապրել»:

ՉԻ՛ ՍՏԱՑՎԵԼՈՒ: Մենք ունենալու ենք նորմալ առողջապահություն, որտեղ ոչ մի բուժհիմնարկ, կրկնում եմ ՈՉ ՄԻ, ԱՐՏՈՆՅԱԼ ՉԷ` անկախ իր սեփականատիրոջ կամ կառավարչի նախկինում կամ ներկայումս զբաղեցրած պաշտոնից կամ բարեկամական կապից:

Հավանաբար, կոլեգիալ համեստությունս է թույլ տվել նրանց «թպրտալ»: Երևի սկսեմ արդեն անուններ տալ զանազան ռազմավարական ծրագրեր տապալած և միլիոններ մսխած պաշտոնյաների: Դրա ժամանակն էլ կգա...շուտով...»,- գրել էր նախարարը:

Նշենք նաև, որ Գլխավոր դատախազությունից Panorama.am-ի հայտնել էին, որ դատախազությունում կարդացել են առողջապահության նախարարի ֆեյսբուքյան գրառումը, որը հանցագործության հատկանիշներ չի պարունակում:

«Եթե անուններ հրապարակվեն, այդ ժամանակ հստակ կլինի: Հիմա այն, ինչ հրապարակել է նա, հանցագործության հատկանիշներ չի պարունակում»,- ասել էր Գլխավոր դատախազության հանրային կապերի բաժնի պետ Արևիկ Խաչատրյանը, անտեսելով, որ պաշտոնյայի կողմից միլիոննների փոշիացման փաստի բարձրաձայնումը արդեն իսկ հայտարարություն է հանցագործության մասին: