Գլխավոր դատախազությունն արձագանքում է առողջապահության նախարարի գրառմանը

Իրավունք 10:46 30/05/2018 Հայաստան

Գլխավոր դատախազությունն արձագանքում է առողջապահության նախարարի գրառմանը

Դատախազությունում կարդացել են առողջապահության նախարարի ֆեյսբուքյան գրառումը: Panorama.am-ին փոխանցեցին, որ գրառումը հանցագործության հատկանիշներ չի պարունակում:

«Եթե անուններ հրապարակվեն, այդ ժամանակ հստակ կլինի: Հիմա այն, ինչ հրապարակել է նա, հանցագործության հատկանիշներ չի պարունակում»,-ասաց Գլխավոր դատախազության հանրային կապերի բաժնի պետ Արևիկ Խաչատրյանը:

Հիշեցնենք, առողջապահության նախարար Արսեն Թորոսյանը սպառնացել է տալ այն պաշտոնյաների անունները, ովքեր ռազմավարական ծրագրեր են տապալել ու միլիոներ են մսխել:

Նախ նկատենք, որ գրառումը պարունակում է հանցագործության մասին առնվազն մեկ «հատկանիշ»՝ կա փաստորեն միլիոնների կորուստ, ինչի մասին հայտնում է պետական պաշտոնյան: Առնվազն սա հիմք է, որ դատախազությունը, եթե չէր արել, ապա հիմա սկսի հետաքննություն:

Նախարարը ֆեյսբուքյան իր էջում գրել է. «Վերջին տեղեկություններով առողջապահական օլիգարխիան որոշել է հակահարված տալ մեր հակակոռուպցիոն քայլերին` ի դեմս պատվիրված հոդվածների և տարատեսակ ասեկոսների, որոնք պետք է երկրի ղեկավարության մոտ վարկաբեկեն մեզ ու մեզնից ազատվելու առիթ դառնան, որպեսզի նրանք շարունակեն «հանգիստ ապրել»:

ՉԻ՛ ՍՏԱՑՎԵԼՈՒ: Մենք ունենալու ենք նորմալ առողջապահություն, որտեղ ոչ մի բուժհիմնարկ, կրկնում եմ ՈՉ ՄԻ, ԱՐՏՈՆՅԱԼ ՉԷ` անկախ իր սեփականատիրոջ կամ կառավարչի նախկինում կամ ներկայումս զբաղեցրած պաշտոնից կամ բարեկամական կապից:

Հավանաբար կոլեգիալ համեստությունս է թույլ տվել նրանց «թպրտալ»: Երևի սկսեմ արդեն անուններ տալ զանազան ռազմավարական ծրագրեր տապալած և միլիոններ մսխած պաշտոնյաների: Դրա ժամանակն էլ կգա...շուտով...»:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: