Ձեր վստահելի աղբյուրը

Լրագրողներն այսօր ԱԺ-ում փոխարտգործնախարար Արմեն Պապիկյանին խնդրեցին մեկնաբանել ադրբեջանական զորքերի՝  Նախիջևանի տարածքում դիրքային առաջխաղացման մասին տեղեկությունները:

Վերջինս հիշեցրեց, որ ՀՀ պաշտպանության և արտաքին գործերի նախարարները, մինչ Արցախի Հանրապետություն մեկնելը, այց էին կատարել առաջնագիծ՝ տեղում ծանոթանալու իրավիճակին. «Այն տեղեկատվությունից բացի, որը տրամադրել է պաշտպանության  նախարարությունը, այլ բան ավելացնել չեմ կարող»:

Իսկ հնարավո՞ր է, որ ադրբեջանական կողմի ագրեսիվ քայլերի դեպքում Հայաստանը դիմի ՀԱՊԿ-ին, հետաքրքրվեցին լրագրողները: Փոխարտգործնախարարն ի պատասխան հիշեցրեց, որ ՀԱՊԿ-ի հետ ունենք հստակ պայմանագիր և պայմանավորվածություններ, և թեորետիկ խոսել մի դեպքի մասին, ինքը կդժվարանա:

«Կա պայմանագիր, կան  պայմանագրի կետեր, և պայմանագրի կետերը պետք է կիրառվեն»,- շեշտեց դիվանագետը:

Հիշեցնենք, որ Նախիջևանում դիրքային փոփոխությունների թեմային ավելի վաղ անդրադարձել էր նաև ՊՆ մամուլի խոսնակ Արծրուն Հովհաննիսյանը:

«ՀՀ ԶՈւ-երը մշտական մարտական հերթապահություն ու աշխատանք են կատարում ՀՀ ողջ սահմանի երկայնքով: Նախիջևանյան հատվածում այդ աշխատանքները ընթանում են բնականոն և ցանցում հնչեցված հատվածներում ևս կատարվում է մեծ մարտական ու ոչ միայն մարտական աշխատանք»,- գրել էր նա: