Ձեր վստահելի աղբյուրը

Էրեբունի վարչական շրջանում ապրիլի 22-ին տեղի ունեցած անկարգությունների դեպքի առթիվ հարուցված քրեական գործի շրջանակներում ձերբակալվել են վեց հոգի՝ Մասիսի քաղաքապետը, նրա տեղակալը, նաև ևս չորս անձ: Հունիսի 2-ին լրագրողների հետ հանդիպմանը ձերբակալվածների փաստաբանները որոշ մանրամասներ ներկայացրեցին:

Փաստաբան Տիգրան Աթանեսյանը նշեց, որ հիմա դատարանը քննարկում է հինգի նկատմամբ կալանքը որպես խափանման միջոց ընտրելը և մեկի ձերբակալման օրինաչափությունը. «Պետք է նշեմ, որ մի դատավոր, քննելով երկու կալանավորման միջնորդություն, նախ ճանաչել է ձերբակալումն ապօրինի և մերժել է կալանավորման միջնորդությունը, երկու անձի անհապաղ ազատ է արձակել: Երկրորդ դատավորը հակառակն է գործել՝ նույն փաստական հանգամանքներով, մեկին կալանավորել է, իսկ ձերբակալումը ճանաչել իրավաչափ: Այս պահին երրորդ դատավորը քննել է Դավիթ Համբարձումյանի կալանավորման միջնորդությունը, ժամը երեքին որոշման հրապարակմանն ենք սպասում, որից հետո իր տեղակալի նույն միջնորդությունը կքննի:

Աթանեսյանը նշեց, որ իրենք՝ երեք փաստաբաններն էլ դատապարտում ենք բռնությունը, որը գործադրվել է ցուցարարների նկատմամբ, համարում են, որ այդ վտանգավոր արարքը պետք է ամբողջությամբ բացահայտվի, դրան տրվի ճիշտ քրեաիրավական գնահատական:

Նրա գնահատմամբ՝ այս ձերբակալությունները նոր իշխանություններին հաճոյանալու փորձ են, որը, սակայն, չի հաջողվելու. «Ես իմ կյանքում բախտ եմ ունեցել նոր իշխանություններից մարդ պաշտպանելու, կարող եմ ասել, որ նման ճանապարհով չեք կարող շողոքորթել, մնալ տեղերում, այլ հակառակը»:

Դատական համակարգի ուղղորդված չլինելու հետևանքն, ըստ Աթանեսյանի, այս խայտաբղետ վիճակն է: Կոնկրետ գործի վերաբերյալ՝ նա նշեց, որ յութուբյան տեսանյութը բոլորն են դիտել՝ դիմակավորված անձինք, նաև առանց դիմակի անձինք, բռնության են ենթարկում ցուցարարներին: Փաստաբանի խոսքով՝ այստեղ մի սխեմա է գործում. գտնում են կասկածելի անձանց, որոնք թշնամական հարաբերությունների մեջ են ձերբակալվածների հետ, նրանք գալիս են, տեսանյութը նայելով հայտարարում են, որ դիմակավորված անձը այսինչ-այսինչն է, և այս հայտարարությամբ մարդ են ձերբակալում:

«Հասկանում ենք, որ տգեղ երևույթ է, մեզ՝ փաստաբաններիս համար, սա մարտահրավեր է: Կարևոր մոտեցում է, որ օրենքը պետք է գործի, եթե այն դրժենք, կդրժենք բոլորի համար»,- ասաց նա:

Փաստաբան Էրիկ Ալեքսանյանի խոսքով՝ տպավորություն է ստեղծվում, թե Քննչական մարմիններում ու դատարաններում գործում է կալանավորման կանխավարկածը: Նրա գնահատմամբ՝ վարույթ իրականացնող մարմինը չի ներկայացրել որևէ փաստական տվյալ, թե մյուս խափանման միջոցներն ինչու ի զորու չեն կիրառել. «Քննչական մարմինը այն մարմինն է, ում առաջնային առաքելությունը օբյեկտիվ քննության ապահովումն է: Վարույթ իրականացնող մարմինը պետք է մեղադրանքի թեքում չունենա, լինի օբյեկտիվ և բազմկողմանի»:

Փաստաբան Զորայր Հարությունյանը, միանալով գործընկերների խոսքերին, ուշադրություն հրավիրեց մեկ փաստի վրա. մարդկանց քննիչի գրասենյակ հրավիրելու, պատշաճ ծանուցման կարգը պահպանված չէ. «Ընդհանրապես, ո՞նց են մարդիկ հայտնվում քննիչի գրասենյակում, ծանուցման կարգ կա, սակայն անհասկանալի պատճառներով մարդիկ երբևէ չեն կանչվել հարցաքննության, միանգամից կայացվում է բերման ենթարկելու ու ձերբակալելու որոշում»:

Աթանեսյանը հավելեց՝ յութուբի տեսանյութը չի կարող ապացույց լինել. այն կարող են դիտել, կարծիք ունենալ, սակայն տեսանյութերը պետք է ենթարկվեն համակարգչային փորձաքննության, որ պարզվի՝ ո՞վ է նկարել, ի՞նչ պայմաններում, մոնտաժվա՞ծ է, թե՞ ոչ, արդյոք նկարահանման որակը թու՞յլ է տալիս անձի նույնացում իրականացնել, հետո դիմանկարային փորձաքննություն պիտի իրականացվի, որից հետո եթե հնարավոր է՝ նույնացնել, նրանց փորձել ներկայացնել ճանաչման, իսկ դա ժամանակ է խլում, բացի այդ, ըստ փաստաբանի, մեր երկրում կարծես չկան այդ մասնագետները: Աթանեսյանի պնդմամբ՝ դիմակավորված անձին հնարավոր չէ ճանաչել:

Փաստաբանի համոզմամբ՝ այս պարագայում պատժվում են անմեղ մարդիկ: Նա նաև նշեց՝ Մասիսի քաղաքապետին ու իր ընկերներին մատնացույց են անում մարդիկ, ովքեր նրանց հետ վատ հարաբերությունների մեջ են: Աթանեսյանի խոսքով՝ նախաքննական մարմինը անգամ չի փորձում ճշտել՝ ով է մատնանշողը, առերեսել:

«Ավելի զավեշտալի բան կա, վկայի՝ Արթուր Խանջյանի դեմ ցուցմունք է տվել հորեղբոր տղան: Երկու ընտանիքի մեջ վեճ կա՝ պապական տան համար, թշնամություն կա, ու որ այս ամենը լուծվի, նա ցուցմունք է տալիս եղբոր դեմ»,- ասաց նա:

Աթանեսյանն ընդգծեց՝ սա լինելու է ՄԻԵԴ-ում առաջին գործը նոր Հայաստանի դեմ: Նա նաև զավեշտալի համարեց հիմքը, որով Դավիթ Համբարձումյանը մեղադրվում է զանգվածային անկարգություն կազմակերպելու մեջ. «Տղերքը ասել էին՝ առանց Դավիթի ասելու ոչինչ չեն կարող անել»: