Ձեր վստահելի աղբյուրը

Արտակարգ իրավիճակների նախարարությունից երկու գործ արդեն իսկ գտնվում է ԱԱԾ-ում, նախաքննությունը կպարզի բոլոր հարցերը: ԱԺ-ում լրագրողների հետ զրույցում այսօր այս մասին ասաց ԱԻ նախարար Հրաչյա Ռոստոմյանը՝ կտրականապես չցանկանալով կոնկրետացնել՝ հատկապես որ ստորաբաժանումներին են դրանք վերաբերում:

Իսկ ի՞նչ խնդիրներ կան, որ մնացել են դեռևս նախկին նախարարից, հետաքրքրվեցին լրագրողները: «Խնդիրները բազմազան են, բայց միաժամանակ պետք է ասեմ, որ բավական նորմալ  ժառանգություն ենք ստացել: Հիմնական խնդիրները հակակարկտային կայաններն են, բոլոր սեյսմիկ և հիդրոմետ կայանների, ճգնաժամային կենտրոնի թվայնացումն է: Այս հարցերը պետք է լուծվեն մաքսիմալ արագ»,- ասաց նախարարը:

Անդրադառնալով ԱԻՆ կադրային փոփոխություններին՝ Ռոստոմյանը նշեց, որ դրանք ինքնպատակ չեն եղել: Մնացել և մնալու են նրանք, ովքեր բոլոր առումներով, այդ թվում՝ պրոֆեսիոնալ, համապատասխանում են նախարարության պահանջներին:

Ինչ վերաբերում է կառավարության  ծրագրին՝ Հրաչյա Ռոստոմյանը շեշտեց, որ այն իր կարծիքով բավականին հավակնոտ է: «Այնտեղ ավելի շատ ոչ թե թվեր են, այլ գործողություններ, որոնք պետք է իրականացվեն, ինչյ իմ կարծիքով կարդարացնի հասարակության սպասումները: Մենք բազմաթիվ անգամ տեսել ենք ճոխ-ճոխ գրված թվեր և այնպիսի ծրագրեր, որոնք թվային առումով լավն էին: Բայց կարևորն այն է, որ կառավարության ծրագիրը կենացի մակարդակի չլինի: Յուրաքանչյուր քաղաքացի ուզում է, որ իր երկիրը լավ վիճակում լինի»,- ամփոփեց ԱԻ նախարարը: