ՊԵԿ փոխնախագահը վկայի կարգավիճակով այսօր կամ վաղը կհրավիրվի ԱԱԾ. Արթուր Վանեցյան

Քաղաքական 16:02 04/06/2018 Հայաստան

ՊԵԿ փոխնախագահը վկայի կարգավիճակով այսօր կամ վաղը կհրավիրվի ԱԱԾ. Արթուր Վանեցյան

Մարտի 1-ի գործով իրականացվելու է քննություն, որը, սակայն, ԱԱԾ-ն չի իրականացնելու: ԱԺ-ում լրագրողների հետ զրույցում այսօր այս մասին հայտնեց ԱԱԾ պետ Արթուր Վանեցյանը:

«Չեմ կարող այս պահին ասել՝ մեր գերատեսչությունը ունեցել է դերակատարություն, թե ոչ: Ես այն ժամանակ դեռ չէի ընդունվել աշխատանքի: Կլինի դա առանձին քննություն, թե հանձնաժողով, ինչ եզրահանգման էլ որ կգան, մենք էլ այդպես կվարվենք»,- ասաց ԱԱԾ պետը:

Հարցին՝ տրամաբանորեն ՀՀ նախկին նախագահ Սերժ Սարգսյանը կարող՞ էր տեղյակ լինել կոռուպցիոն սխեմաներին, ԱԱԾ պետն ասաց. «Ես տրամաբաներոեն չեմ խոսում, ես խոսում եմ փաստերով: Քննություն է ընթանում: Քննությունը բոլոր հարցերի պատասխանները կտա»:

Արթուր Վանեցյանը նաև տեղեկացրեց, որ ՊԵԿ փոխնախագահ Ռաֆիկ Մաշադյանը, որպես վկա, այսօր կամ վաղը կհրավիրվի ԱԱԾ, ցուցմունք կտա, որին էլ գնահատական տալուց հետո կորոշվի գործի շրջանակներում նրա կարգավիճակը:

«Եթե մարդն արել է ինչ-որ արարք, նա պետք է պատասխան տա: Մաշադյանը հայտարարել է, որ եղել է պայմանավորվածություն, ինքը պետք է գա, բացատրություն տա, թե ինչի մասին է խոսքը»,- ասաց Վանեցյանը՝ շեշտելով, որ ԱԱԾ-ն ունի անհրաժեշտ քաղաքական կամք՝ պատասխանատվության կանչելու նախկին և ներկա բոլոր այն պաշտոնյաներին, որոնք կհայտնվեն Ազգային անվտանգության ծառայության տեսադաշտում:

Վերջում Վանեցյանն անհրաժեշտ համարեց ընդգծել, որ ԱԱԾ հիմնական սպառնալիք ինքը համարում է հարևան երկրների հետ Հայաստանի չլուծված խնդիրները:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: